Read Tangkhul Naga AMOS 5 Bible Online

AMOS 5 - Tangkhul Naga bible

AMOS 5

¹Ina nathumwui vang chapchāt laa kasā hi nganālu, O Israelwui shimkhur:

²“Kongluida mathuithukluiki kaji chi kachingva̱ Israelna; a khalattawui ramli nothahaida, khipānakha khāngmathotmi khavai malei.”

³Kaja Proho VAREna hānga: “Raili mi thingthing khavā keinung chili shākhamāng taimara; shākha khavā china tharāmāng taimara.”

⁴Kaja Israelwui shimkhurli PROHOna hithāda hānga, “Ili phāda ringtha̱lu;

⁵kha Bethelli maphaalu; kala Gilgalli mazangalu, lah Beer-shebali mamakānkaalu; kaja Gilgalli mashoilakla raithāhaora, kala Bethel khikha masāvaimara.”

⁶PROHOli phāda ringtha̱lu, maningakha ana Josephwui shimli mei thāda chuipaishina, kala china Bethelli chuida, khipākhana sāshimitmi khavai maleisāmara.

⁷O nathum, mashunli thingkhā ngasā khangasaka, kala khamashung khangarong okathuili hortā kahaiabing!

⁸ Pleiades eina Orionli sākakhuia, kala tangmangting kahai chi ngathor onkhangasaka, kala ngashun chi ngayā onkhangasaka, shamadruwui tara̱ khuilaga ngalei kathengli rotā khangasaka, PROHO chi awui mingna,

⁹kapangali kashuirak eina ana shimān ngasaka, kaja khangazipa raipan sākhai khavai.

¹⁰Ngaveili hāngkhamachin chili athumna chinkai, kala khamashung tui kahāngali athumna ningkachai.

¹¹Chithāda sāda nathumna kachāmbingli naikazamda, athumwui eina kashakazā ngapaikhuida, nathumna shānkakhui ngalungshim sakākhuihaira, kha nathum chili kapam masamphangmara; nathumna drakhā yāmgui khamathāthā sāhaira, kha nathumna chiwui atheira̱ khamang masamphangmara.

¹²Kaja nathumwui khayonkhamāng kayākhakhala kaji ina thei, kala nathumwui morei kayākha hakmahākhala kajila— khangarong mili rekakhareka, pheizā kazābing, khavāta mibingli ngaveili ngareithui ngasak kahaibing!

¹³Chiwui vang thangkhama china atam hitharan kasaikha pamra; kaja hi makaphā atamna.

¹⁴Ringkhavai khamathā phālu, makaphā makahaoalu; kala chithāda PROHO, saikorawui Varena nathumli ngasomira, nathumna hāngkahai thāda.

¹⁵Makaphāli ningkachaida kaphāli leishilu, kha̱lungli mashun leingasaklu; chithākha, PROHO ashangva̱wui Varena, Josephwui shākkahaibingli lumashanra.

¹⁶Chiwui vang, PROHO, ashangva̱wui Vare, PROHO china hithāda hānga; “Kayāngkhareili saikora chapngachāra, chānrei saikorali athumna, ‘Iyavo! Iyavo!’ jira. Athumna chapngachākatheibinglila hosangra,

¹⁷drakhā yāmgui kachida ringngāra; kaja ina nathumli rāza̱serra,” da PROHOna hānga.

¹⁸PROHOwui zimiksho kakahaobing ringkashi ngasāranu! Nathumna khiwui vang PROHOwui zimiksho chi ningchangda? Chiya kahor maningla tangkhamangna.

¹⁹Kazingkha̱li ngacheeda yāmlaga singom samkaphang kathāna; lah shimli yāmzanglaga phāklāngli kashai eina, phara̱na khamara̱ kathāna.

²⁰PROHOwui zimiksho chi kahor maningla tangkhamang maningmalā, kala kahor makhalei kazingkashi kathā maningmala?

²¹ “Nathumwui phanit phanao ina yangkharinga, kala nathumwui khokharum kazipli ina ningyāngkhaung khikha maleimana.

²²Nathumna ili rikkatā kachigat pha̱lala, tharāzat chigatlala ina makhuisangmimara, kala nathumwui ningyatchigatwui asā kakā sā taithatlala, ina mayangsangmimara.

²³Nathumwui laakhon iwui eina khuithuihaolu; mayori kahai tingteilā khon chi ina manganāmara.

²⁴Kha mashun chi tara̱ thāda longtāranu, kala khamashung khangarong kongrā longkatha̱ tharanu.

²⁵ “O Israelwui shimkhur! Zingkum hangmati nathumna ili lamhāngli pha̱kaphayā chigatla?

²⁶Nathum khalattana kasā nathumwui meoma̱ awunga Sakkuthli, kala sirāwui-vare Kaiwanli nathumna phungzatra;

²⁷chiwui vang Damascus kānda nathumli ina raithāhaora,” da saikorawui PROHO Vare kaho PROHO china hānga.