Read Tangkhul Naga AMOS 6 Bible Online

AMOS 6 - Tangkhul Naga bible

AMOS 6

¹“Zionli leiyālak eina khaleibing, kala Samariali ningnganungkhun eina khaleibing, Israel shimkhur shok khavai rimeithui kaje yurwui khareia mibing, kakhanang ngasāranu!

²Calneh kankālu, kala yanglu, chiwui eina kahaka Hamathli vālu; chiwui thili Philistinewui Gathli tālu. Nathumwui wungramli athumwui phāmeila? Lha athumwui ngaleina nathumwui ngaleili reimeila?

³O makaphā atam chiho kahaia nathum, khangama̱ khangashao haokaphokla?

⁴Ka̱lākashi ngasāranu: Mafahā petli kapibing, monpaktungli khangayaibing, yaoshangwui eina yaosā shaida, seishimwui eina seinaosā kashaibing;

⁵tingteilākhonli ngachang mengtok laa kasābing, Davidwui thāda athum khalatta khongkhavai akap-akai semkakhuibing;

⁶khorām eina zam khamangbing, kala athum khalatta mathāmeikap kaji thao neoda Josephwui kashimānli makakhanangbing!

⁷Chiwui vang eina, raikathāli rimeithuida athum vāra, kala athumwui lumshilao kasā china katangana.”

⁸Proho VAREna akhalatta khangashit sāhaira (da PROHO, saikorawui Varena hānga): “Jacobwui langkaso ina ningkachaiya, kala awui raipan yangkharinga; kala keinung eina chili khalei saikora ina chihohaora.”

⁹Kala Shim akhali mi tharā leisālala thiserra.

¹⁰Chifa khavai athei-asāna shimwui eina aphasā khuishokra, kala shimlungli khaleipa chili, “Maleiluikhala” da khangahān eina, “Maleimana” da hāngra; chieina ana, “Mamatuilu, PROHOwui ming masingasa” da hāngra.

¹¹Kaja yanglu, PROHOna kakaso eina kahaka shim chi achui-arui sāthuihaora, kala kateowa shim akha̱-akhā sāthuihaora.

¹²Siguina lunghārtungli yongzatla? Yireili seiot kakhuila? Kha mashunli nathumna kathiri sāngasakhaira, khamashung khangarongwui atheili thingkhā sāngasakhaira—

¹³Lo-debarli nathum mathānda, “Ithumwui yāng eina ithum khalattawui vang Karnaim yuikakhui maningmala?” da hānga.

¹⁴“Kaja yanglu, ina nathumli makhamayā yur khangatei akha shokngasakra, O Israelwui shimkhur” da saikorawui Vare, PROHOna hānga, “kala athumna nathumli Hamath zangkhavaiwui eina thuilaga Arabah Kong vāshungda rekharekra.”