Read Tangkhul Naga AMOS 7 Bible Online

AMOS 7 - Tangkhul Naga bible

AMOS 7

¹PROHO Varena ili hithāda chithei: Yanglu, awungawui mā hāt kahaiwui thili kakhane shomshānda akhar shokkaphok tharan yanglu, ana khaoh shemsai.

²Ngalei chiwui khawo athumna shaikhupmi kahai thili ina hānga, “O PROHO Varivara, kapheomilu, ina nali poli! Jacobna khi sāthukrakhala? Ava kateonaona!”

³PROHOna ning ngacheida, “Hi mathāmara” da PROHOna hānga.

⁴Proho VAREna ili hithāda chithei: Yanglu, Proho VAREna mei eina mashun bichar sākhavai hoi, kala china shamadru kahaka kathuka chi mayuisanghaowa kala shaisangphokhaowa.

⁵Chieina ina hānga, “O PROHO VARE! ngasāmmihaolu, ina nali poli! Jacobna kathāda nganingrarrakhala? Ava kateonaona!”

⁶PROHOna ning ngacheiluishita; “Hila chi mathā ngasakmara.” da Proho VAREna hānga.

⁷Ana ili chithei: yanglu, urum yangda sakharik kahai phaklāng akhali apāngli urum singlaga Proho nganingsai.

⁸Kala PROHOna ili hānga, “Amos, nana khi theikhala?” Ina ngahānkai, “Urum akha thei.” Chieina PROHOna hānga, “Yanglu, iwui mibing Israewui alungthungli ina urum akha haihaira; ina chibingli mamakānluimara;

⁹Isaacwui apam kajujui chi ramcho sāngasakra, kala Israelwui katharpam hupta sākazamhaora; kala ina Jeroboamwui shimkhurli makhamayā raighai eina ngararra.”

¹⁰Chiwui thili Bethelwui pāngmon Amaziahna Israelwui awunga Jeroboamli pao chiphunda hānga, “Israelwui shimkhurli Amosna nali mithit khalen sāhaira; ngalei hi awui tui maphungrarthura.

¹¹Kaja Amosna hithāda hānga, ‘Jeroboam raighai eina thira, Israelli awui ram eina raithāphalungra.’”

¹²Kala Amaziahna Amosli hānga, “O marān, Judah ngaleili yāmvaulu, kala chiwui zāt zāda chili amarānlu;

¹³kha Bethelli marāmarānluilakalu, kaja chi awungawui katharapamna, kala wungramwui khorumshimna.”

¹⁴Chieina Amosna Amaziahli ngahānkai, “I marān maningmana, marānwui naomayarala maningmana; kha iva yaokahoma akhana kala sycamore thing khayoka mi akhana,

¹⁵kala yao ashangli homkazatwui eina PROHOna ili hokhuida, ‘Vāda, Iwui Israel mibingli amarānlu’ da hānga.

¹⁶Chiwui vang eina PROHOwui tui chi nganālu; Israelli makhamayā mamarānalu, kala Isaacwui shimkhurli makhamayā pao mahāshokalu da nana hāngdalei!

¹⁷Chiwui vang PROHOna hithāda hānga: ‘Napreiva̱̱ keinungli khayorva̱̱ sha̱nao ngasāra, kala nanaomayara ngarā kala nanaongalāva̱ ngarā raighai eina thira, nathumwui ngalei nap tamlaga ngayarmihaora, nakhalattala makathar lamli thisangra; kala Israelli, apam hiwui eina raithā kachangkhathaora.’”