Read Tangkhul Naga AMOS 9 Bible Online

AMOS 9 - Tangkhul Naga bible

AMOS 9

¹Hanphut ngalemli PROHO khanganing chi ina thei, kala ana hānga: “Keinung pakra̱bing chi ngavei manganukranglakha eina tangda ngaphitlu, kala akha̱ sāngasakta mibingwui kuili tākngasaklu; kala kataibing chi ina raighai eina shātthatra, akhanida mayāmshokmara, akhanida machakshokmara.

²Athumna Kathewui ramli chuizanglala, chili ipāngna zangyonkhuira; athumna kazing yāmkālala, chiwui eina ina ngakhuntāra.

³Carmel Kaphungli athumna yāmngathumlala, chiwui eina ina phāshokra kala athumli tukkhuira; iwui mikyan eina athumna shamadrulungli zang yāmngathumlala, chili ina phara̱li kasora kala china athumli mara̱ra.

⁴Kala athumwui yangkashibingna tukthuihailala, chili ina raighaili kasora kala chieina shātthat ngasakra; kala kaphāwui vang maningla makaphāwui vang ina imik yangtitra.”

⁵Saikorawui Vare PROHO chiya, ngaleili saza̱da menga, kala chili pānda khalei saikora sifaya, kala saikora chi Nile kong kathui thāda juikai, kala Egyptwui Nile kong thāda ngasun ngasaka;

⁶kazingramli awui khamato kā sākaka, ngaleitungli fakakham leikhangasaka; shamadruwui tara̱li hokhuida ngalei kathengli rotākhame, PROHO chi awui mingna.

⁷“O Israelwui mibing! iwui vang nathum, Ethiopiawui mi mathāmala?” da PROHOna hānga. “Israelli ina Egypt ngaleiwui eina mathānshokmala? Philistianaobingli Caphtorwui eina, kala Syriabingli Kirwui eina mathānshokmala?

⁸Yanglu, morei kasā wungramtungli Proho VAREna yangdalei; kala chi ina okathuiwui eina shimān ngasakra, Jacobwui shimkhurmāngli mamutchao ngasakmara.”

⁹“Kaja yanglu, ina kasora, kala yur saikorawui alungli Israelwui shimkhurli khanukra, sikhavai khavai eina khanuklala, lungguinao akha eina tangda ngaleili matātungmara.

¹⁰Morei kasā iwui mibing saikora, ‘Ka̱lākashina ithumli marālakmara’ da kahāngbing, raighai eina thira.

¹¹ Atam chili Davidwui shim konglui kahai chi ina khāngmathotluira phākho kakai chi chipholuira, kala ngayāng kahai chi sākhuiluira, kala achālakhawui thāda sākāluira,

¹²Kaja Edomwui shākkahaibing, kala iming eina theikasābing saikora; athumna samphangpai khavaina,” da hi ngarān kahaia PROHOna hānga.

¹³ “Yanglu, zimikshobing chi rārali” da PROHOna hānga, “chitharan luikasaona kahātapāli ngaphankhuira, kala drakhāthei khamazokana athā khayaopāli ngaphankhuira; phungreibingna kashima drakhāra̱ ngayira kala phungrānao kachida longra.

¹⁴Iwui Israel mibingli ina kalākhamahai ngasā ngasakluira, ngayāng kahai keinungbing sakāluida athumna pānra; athumna drakhā yāmgui vāsangra kala chiwui ara̱ mangra, yāmguila vāsangda chiwui athei shaira.

¹⁵Athumwui ngaleili ina athumli chipamra, kala athumli ina mikahai lam chiwui eina maphurshokluimara,” da PROHO nathumwui Varena hānga.