Read Tangkhul Naga JONAH 1 Bible Online

JONAH 1 - Tangkhul Naga bible

JONAH 1

¹ Amittaiwui naomayara Jonahli PROHOwui tui chi hithāda rāhānga.

²“Ngakarthuida kahaka keinung Ninevehli vālu, kala chili makhamayā tui avaolu; kaja athumwui makaphā makhayā chi ili shākāhaira.”

³Kha Jonahna PROHOwui eina Tarshishli yāmvā khavai thuihaowa. Ana Joppali tai; kala chili jahas akha Tarshishli vākida leisai; chieina ana PROHOwui eina yāmkhavai bhārā mihailaga athumli ngasoda Tarshishli vāhaowa.

⁴Kha PROHOna shamadru chili siphan zingrot panglāk eina shokngasakta jahas chi kaiki jihaowa.

⁵Jahas kahuibing chi ngacheenāhaida kachichāwui vareli ngakaowa; kala ngavengmei khavai ot khuikaphungbing chi shamadruli horsanga. Kha Jonahva jahaswui alungshong zangpamda piphuphaowa.

⁶Chieina jahaswui captain china zanglaga, “O kape, na khisāli? Ngakarthuida nawui Vareli seihā sālu. Chithākha varena phaningmida ithumli mashimān ngasakpai” da hānga.

⁷Kala athum akha eina akha, “Khipāwui vang kalākashi hi kharākhala da theikhavai kalā yangsa” da ngazek ngaroka. Chieina kalā yangda, kalā chi Jonahwuitungli tāhaowa.

⁸Chieina athumna ali ngahāna “Khiwui vang eina hikathā kalākashi hi ithumwuitungli katākhala? Na khiot kasā mi? Kachiwui eina kharā? Na khi ngaleiwui mi kala khiyurkhala?” da ngahāna.

⁹Chieina ana athumli ngahānkai, “I Hebrewnaona; kala ina kazingramwui Varivara kala ngaleila ngayila kasaa PROHO chili shitkasanga mi akhana” da hānga.

¹⁰Chieina mibing chi ngacheekhailakhaowa, kala ali hānga, “Nana khi sāhaoda hithā kahaikhala!” Kaja a PROHOwui eina yāmkazatna kaji hi athumna theihaowa, kaja ana athumli hānghaowa.

¹¹Chiwui thili athumna ali hānga, “Ithumwui vang shamadru va̱rihai khavai nali khi sārakhala?” Kaja shamadruwui siphan zingrot markhangai marhaowa.

¹²Ana athumli hānga, “Ili khāngkhuida shamadruli horsanghaolu; chithākha shamadru nathumwui vang varihaora; kaja hakkhamahā siphan zingrot hi iwui vang eina nathumwuitungli kharāna da theihaira.”

¹³Chithālala mibing china jahas chi ngalei kathengli khuishok khavai panglāk eina hotnai, kha mararthuwa; kaja siphan zingrot chi athumwuitungli markhangai marmeihaowa.

¹⁴Chiwui vang athumna PROHOli ngakaoda hānga, “O PROHO, mi hiwui manglāwui vang ithumli mashimān ngasakmialu, kala khayon makhaleiwui ashee ithumwuitungli matā ngasakmialu. Kaja O PROHO, nana sākhangai athishurda kasāna.”

¹⁵Chieina athumna Jonahli khāngkhuilaga shamadruli horsanghaowa; kala shamadru chi mangaphaoluithuwa.

¹⁶Chiwui vang mibing china PROHOli ngacheeshunhaida pha̱kaphayā ot sai kala khangashit khuiya.

¹⁷ Kala PROHOna khaih kahakva akha ngarānmida Jonahli mayuisang ngasakhaowa; kala Jonahna khaihwukli ngashun kathum ngayā kathum pama.