Read Tangkhul Naga JONAH 3 Bible Online

JONAH 3 - Tangkhul Naga bible

JONAH 3

¹Chiwui thili kakhane sāda PROHOwui tui chi Jonahli, hithāda rāhānga,

²“Ngakarthuida kahaka keinung Ninevehli vāda ina kahāng tui chi atamchitheilu.”

³Chieina Jonahna ngakarthuida PROHOwui kakaso athishurda Ninevehli vai. Nineveh hiya hakkhamahā keinungna, hiwui aret kathumthang shongzāna.

⁴ Jonahna keinung chili vākhavai zatphokta thangkhawui shongza zata. Kala ana vaoda, “Zimiksho hangmatithang leilaga Nineveh shimānhaora!” da hānga.

⁵Chieina Ninevehwui mibingna Vareli shitsanga; kala khareia eina thuida khangazana tāshungda bora ngavailaga kakhum eina pama.

⁶Pao chi Ninevehwui awungali vāshunga, chieina ana awui pamkhong horhai kala sāri raihaida bora ngavailaga hotlāli ngakhorpama.

⁷Kala Nineveh katongali pao chishatta hānga, “Awunga kala wungva̱-wungvābingwui kakasona kaja miranu, sāranu, sha̱keiranu, khikha mamazapailakmara, maphauipaimara, mashimanpaimara;

⁸kha mila, sāla bora ngavaida Vareli thuklak eina poranu, kala mi kachiva̱ kachichāwui makaphā makhayāwui eina ning ngateiranu.

⁹ Khipāna theira, Varena malungkhavāt ngacheihaida ithumli mashimān ngasaklapai?”

¹⁰Athumwui makaphā chihohaida ningkhangatei chi theilaga, Varena athumwuitungli makaphā sāra da hanghaikasā chi ngachei ngasakta ana athumli masāthuwa.