Read Tangkhul Naga JONAH 4 Bible Online

JONAH 4 - Tangkhul Naga bible

JONAH 4

¹Kha china Jonahli ningyāng maung ngasaklakthuwa, kala a malungvātlakhaowa.

² Kala ana PROHOli seihā sāda hānga, “Iram ngaleili leilakha hithārada ina nali mahāngmala? Hiwui vang ina thaklāk eina Tarshishli yāmkhavāna kaja ina thei, na lukhamashan leikashe, malungkhanima, leikashili nganingtit kaje kala makaphāwui eina ning khangacheia Varena.

³ Chiwui vang eina, ara, O PROHO, ina nali kapona, iwui manglā khuimihaolu, kaja I kharingliva thikahaina phāmei.”

⁴PROHOna hānga, “Na malungvāt khavai mashun leila?”

⁵Chieina Jonahna keinungwui eina shokta zimikshoshong akhalattawui vang rāmrahnao akha sākhuida apama. Kala chiwui khaya̱li pamda keinung chili khi shoknikhala kaji ana kathei eina tangda yangpama.

⁶Kala PROHO Varena arong akha shokngasakta Jonahwuitungli ngareikā ngasakta china awui kuili khaya̱ samida ali maningrāk ngasakmana. Arong chiwui vang eina Jonah ringphālakhaowa.

⁷Kha akhama ngathor kathā kazing kathang eina, Varena kalom akhali arong chi shaingasakta ngahuihaowa.

⁸Zimik kashok eina zingshoshongwui kasā masi Varena phanrā ngasaka kala Jonahwui kuili zinghām za̱haoda ning shimānhaowa; kala ana ali thingasakhaolu da poi, kala hānga, “Iwui vanga kharingli kathina phāmei.”

⁹Kha Varena Jonahli hānga, “Nana arong chiwui vang malungvāt khavai mashun leila?” Ana ngahānkai, “Ina vātngayilaka, vātnahaida kathila thingai.”

¹⁰Chieina PROHOna hānga, “Nana nawui yāng makazang kala nana kharkhangasak makhaninga thangngayākha leilaga, thangngayākha shimān kahai arong chili lumashana.

¹¹Chithākha uishong yāshong matheithangkhamei kahaka keinung mi lakh akha thing maga̱ lāngda khalei, kala sha̱keila kachungkha khalei Ninevehli I malumashan ngayimala?”