Read Tangkhul Naga MISHĀN 11 Bible Online

MISHĀN 11 - Tangkhul Naga bible

MISHĀN 11

¹Kala mibingna athumwui kachotkachāngwui vang PROHOwui miktāli ngurngur matuiya; kala chi PROHOna kashā eina, ali malung thuingasakhaoda, PROHOwui mei athumwui lungli chuihaoda ayarwui rāmrah kaikha chuitāhaowa.

²Chieina athumna Mosesli khangakao eina Mosesna PROHOli seihā sāda mei chi mithaowa.

³Chiwui vang eina apam chiwui ming Taberah phokmi, kaja PROHOwui mei china athumli rāchui.

⁴ Chitharan ngaunlop kahai Israel mibingwui alungli kha̱minao sā shaingaihaida; kala chili Israelwui mibingla zangda chaplaga hānga, “O ithum sā shaikhavai leisasi kaja chāng!

⁵Ithumna Egyptli leilakha khalem eina khaih kashai chi phaningunga, karoptheibing, khaimaithei, shomri, pyas, janam shaisai;

⁶kha ara ithumwui yāng pangshap thenghaira, kala manna hi maningla khangatei maleithura.”

⁷ Manna chi phatikomwui atha thai kala bdelliumwui azak khuiya.

⁸Mibingna chi ngamuikhuilaga jakrili takka, lah shimkhurli rungkhui, kala ham eina hanglaga khamui sākhui, kala shaiakha thao eina khareikakhui khamui tākamhai.

⁹ Rāmrahli ngayāshong ikra̱ katā tharan, chili ngasoda manna tai.

¹⁰Mosesna shimkhur katongawui mi kachiva̱ kachichāshiwui kachonshim khāmongli nganingda kachap chi shai, kala PROHOwui malungkhavāt haklak eina katā theida, Moses maringphāthuwa.

¹¹Mosesna PROHOli hānga, “Khisāda nawui raobingli hiyākha rekharekkhala? Kala nawui miktāli khisāda ina lukhamashan masamphangpaithu, kaja athumwui kachot katonga khisāda iwuitungli haimihaokhala?

¹²Mi saikora hi ina vaikhuila? Athumli ina pharākhuida nana ili ‘Na̱ khamanga naoli kaphung thāda,’ nana athumwui avāva̱ ngarāli ngashit kahai ngalei chili phungvālu kajila?”

¹³Mi saikora hili ina kachili sā akhuida mirakhala? Kaja athumna, “Ithumli sā shaikhavai milu” da iwui mangāli chapta hānghaira.

¹⁴Mi saikora hili imāngna maphungrarmara, otphun hi iwui vang ritnai.

¹⁵Nana ili hithāda sāra jiakha ili sāthatlakhaolu, nana ili lumashanakha iwui sitkhamahui hi I matheiluingaiga.

¹⁶Chieina PROHOna Mosesli hānga, “Iwui vang Israelwui khararnaobing hangshini kapangkhuilu, athum chi nana kathei khararnao kala otva̱bing ngasāphalungra; kala athumli kazip khavai kachonshimli thānrāda nali ngasoda kānganing ngasaklu.

¹⁷Chieina ina nali chili tāngazekra; kala nawui eina ina manglā kakhuilaga athumli sangmira, chieina athumnala mibingwui kachot chi nali phungrumra, namāngna maphungluimara.

¹⁸Kala mibingli hithāda hānglu, ‘Akhamawui vang nathum khalatta tharchigatlu; nathum sā shaira. Kaja PROHOwui mangāli, “Ithumli khipāna sā mishaira? Kaja ithum Egyptli sā mavātla shaisai” da nathumna chapta kahāng chiwui vang eina PROHOna nathumli sā mida nathumna shaira.

¹⁹Nathumna thangkha, lah khanithang, phangāthang, tharāthang, maga̱ thangmāng shaiki kaji maningmana,

²⁰kha nganamkashina mamalongairanglakha eina tangda kachāng peida shaira, kaja nathumli khangayur PROHOli nathumna mamayāmada “Kachiwui vang eina ithum Egyptwui eina shoksākhala?” da chapa.’”

²¹Kha Mosesna hānga, “Ina thānkazat mibing hi mashing thingshātharukna; laga nana ‘Ina athumwui shaikhavai sā mira, chieina athumna kachāngkha peida shaira!’ da hānga.

²²Athumli ngarin khavai seishang, yaoshang taithatmirala? Lha athumli ngarin khavai shamadruwui khai katonga kazipkhuirala?”

²³Chieina PROHOna Mosesli hānga, “PROHOwui pāng sha̱nāhaola? Ara iwui tui nawui vang ungshungnika maungshungnikhala yanglu.”

²⁴Chieina Mosesna PROHOwui tui chi mibingli shokhānga; kala ana mibingwui eina khararnaobing hangshini kazipkhuilaga kazip khavai kachonshim chi kuimareida nganing ngasaka.

²⁵Chieina PROHOna muiyalung eina tāda ali ngazeka, kala awui eina manglā ngayarda arar hangshini chili sangmi, kala manglā chi athumwuili zangkahai eina, athumna marānuwa. Kha naoda athumna chithāda masāluimana.

²⁶Athumwui ngachaili mi khani, akhana Eldad kala akhapā Meldad hoda mingchanlala kachonshimli marāla rāmrahli pamhaowa, kala manglā chi anilila rāzangda anila rāmrahli marāna.

²⁷Chieina yaronnao akhana Mosesli ngasamvāda ahānga, “Eldad eina Meldad rāmrahli marānpamdalei.”

²⁸Kala chi shāda Nunwui naomayara Mosesli otram ngathakhame, kapangkhui kahaiya Joshuana hānga, “Iwui amei Moses, anili khāmhaolu.”

²⁹Kha Mosesna ali hānga, “Iwui vang eina na mikpaishihaola? PROHOwui mi saikora marān ngasāsāsi kaja, PROHOna awui manglā athumli sangmisāsi kaja jong!”

³⁰Chieina Moses kala khararnaobing chi rāmrahli unghaowa.

³¹Kala PROHOwui eina masi phanshokta kongkui kachungkha shamadruwui eina yongshok ngasaka, kala athumwui rāmrah ngalemli hivāk thangzatkhawui vāng kala lākhavāk thangzatkhawui vāng da rāmrah kuimareida, kala ngaleiwui eina khuining khani shāda tatung ngasaka.

³²Kala mibingna chithang ngashun, ngayā kala akhama kathā langpongda kongkuibing chi ngamuikhui; teomeikapta ngamuikakhuiapana homer tharā kazipkhuiya; kala athumwui rāmrah kuimareida chi ungkhorhai.

³³Sā chi sheida mamayuitāranglakha, PROHOwui malungkhavāt mibingwuitungli tāda, kazātkashi shokngasaka.

³⁴ Chiwui vang eina apam chiwui aming Kibroth-hattaavah phokmi, kaja sā ningchangkhai kahaibing chili chifaya.

³⁵Kibroth-hattaavahwui eina mibingna zatphokta Hazerothli vai; kala athumna Hazerothli angasāma.