Read Tangkhul Naga MISHĀN 12 Bible Online

MISHĀN 12 - Tangkhul Naga bible

MISHĀN 12

¹Mosesna Cush sha̱nao akha khangakum chiwui vang, Mariam eina Aaronna makhamayā tui matuiya, kaja ana Cush miyurwui sha̱naoli ngakuma.

²Kala anina hānga, “PROHOna Mosesmāngli ngazekla? Ana inilila mangazekmala?” Chieina PROHOna chi shāhaowa.

³Moses malung nimlaka. Okathuiwui mi saikorali malung nimkhamei mina.

⁴Kala kashuirak eina PROHOna Moses, kala Aaron eina Mariamli hānga, “Nashi kathum, kazip khavai kachonshimli shoklu,” kala ashi kathumna chili shoka.

⁵Kala PROHOna muiyāwui pākra̱ eina tāda kachonshimwui khāmongli tānganingda Aaron eina Mariamli hoi; kala ani khanina mangāvāk rai.

⁶Ana hānga, “Iwui tuibing nganālu: nathumwui alungli marānkhame leiakha PROHO I khalattana ali mahāmi kala ina mang eina ngazeka.

⁷ Iwui rao Mosesli chi maningmana, ale iwui shim katonga chisin kahaina.

⁸ Ale ina mai eina mai yangngasungda tharlak eina khangazekna, makashā tui eina khangazek maningmana; kala ana PROHOwui zak theikhui. Chithākha khiwui vang nanina iwui rao Moseswuitungli matuikida katharin maleithu?”

⁹Kala PROHOwui malungkhavāt aniwuitungli leihaowa, kala a thuihaowa,

¹⁰kala muiyā chi kachonshimtungwui eina thuikhaleoda, yanglu, Mariamli phārrei pemhaowa, horam thāda charshihaowa. Aaronna Mariamli yangkhaung eina yanglu, a phārrei pemhaowa.

¹¹Kala Aaronna Mosesli hānga, “O, ishāmei, iniwui mangma̱sak kala morei sākahai chiwui vang inili tandi mamialu.

¹²Sha̱nao hili ava̱wui wuk eina phasā tangkhai shaihailaga pharākatā mathā ngasakalu.”

¹³Chieina Mosesna PROHOli ngakaoda poi, “Ali kharaimihaolu, O PROHO, ina nali poli.”

¹⁴ Kha PROHOna Mosesli hānga, “Avāva̱na awui maili machora̱ mashorrorsi kaja a shinithang maishida mapamarala? Shinithang ali rāmrahwui ayarli vanarhaolu kala chiwui thili ali khuiungpaira.”

¹⁵Chiwui vang eina Mariamli shinithang rāmrahwui ayarli vanarhaowa, kala ali makhuiungranglakha eina tangda mibingna mazatmana.

¹⁶Chiwui thili athumna Hazerothwui eina zatphoklaga Paranwui lamhāngli rāmrah vasāpama.