Read Tangkhul Naga MISHĀN 14 Bible Online

MISHĀN 14 - Tangkhul Naga bible

MISHĀN 14

¹Chiwui thili chithang ngayā yarui ashangva̱na akhon panglāk eina shokta chapngachai.

²Kala Israelwui mibingna Moses eina Aaronwuitungli kharopa; yarui ashangva̱na anili hānga, “Ithum Egypt ngaleili lah lamhāng hili thihaisasi kaje phameira!

³ PROHOna kachiwui vang eina ithumli raighaili thisang khavai ngalei hili thānkharākhala? Ithumwui preiva̱ kala naongarā athumwui sāshai ngasāhaora; ithumwui vanga Egyptli latung kahaina maphāmeimarala?”

⁴Kala athum akha eina akha hāngngaroka, “Ithum raikhoka akha kapangkhuilaga Egyptli latunghaosa.”

⁵Chiwui thili Moses eina Aaronna Israel katongawui mangāli mai mashunzanga,

⁶kala Canaan akhayangli kazanga Nunwui nao Joshua eina Jephunehwui nao Calebna kachon serkhākta Israel ashangva̱li hānga,

⁷“Ithumna vākhayang ngalei chi mathalak kahai ngaleina.

⁸PROHOna ithumli ningyāng ungakha, ana ithumli ngalei chili thānzangda seina̱ eina khuira̱ khalonga apam chi ithumli mira.

⁹ PROHOli mangakaishilaklu; kala ngalei chiwui mili mangacheelu, kaja athum ithumwui hanyarna; athumli kanmi khavai maleimana, kala PROHOna ithumli ngasoda lei; athumli mangacheealu.”

¹⁰Kha yarui ashangva̱na anili ngalunggui eina horthat khavai hānga. Chieina PROHOwui tekhamatei chi Israelnaobing saikorali kazip khavai kachonshimli rāchithei.

¹¹ PROHOna Mosesli hānga, “Miyur hina karankha ili makhuisangmarakhala? Kala athumwui alungli matakhak kahai ot ina kachungkha sāchitheihailala athumna karankhawui vang ili mashitsangmarakhala?

¹²Ina athumli kazātkashi za̱ngasakra kala shimān ngasakhaora, kala athumli hakkhamei kala pangkhamei yur akha ina nawui eina sākhuira.”

¹³ Kha Mosesna PROHOli hānga, “Chithakha Egyptnaobingna shāhaora, kaja miyur hili nana nawui pangshap eina athumwui eina khuikashokna,

¹⁴kala athumna ngalei hili pānda khaleibingli hānghaora. Athumna shāhaira, kaja O PROHO, na miyur hiwui alungli lei kaji; kaja nali, O PROHO, mai eina mai ngasungda theihaira, kala nawui muiyāna athumwuitungli ngasāmda kala ngashunshong muiyāwui pakra̱ kala ngayāshong meiwui pakra̱ eina nana athumli rizatmi.

¹⁵Ara nana mibing hili thitkha sāngasakhaiakha, nawui mingkhamayāng shākahai miyurbingna,

¹⁶‘PROHOna mibing hili ngashit kahai ngaleili mathānzangrarthuda, chiwui vang athumli lamhāngli shaothatser kahaina da hāngra.’

¹⁷Chieina arui, ina nali seihā kasāna, nana ngashit kahai thāda PROHOwui pangshap reimeiranu,

¹⁸ ‘PROHOva malung mavātzarmana kala makhangachei leikashi pemtinghaida morei kala khayonkhamāng pheomi, kha PROHOna khayonali shongrān mida avāva̱ ngarāwui moreiwui vang anaongarā, kala ara̱-azā thot kakathuma kala khamate eina tangda shongrān mi.’

¹⁹Nawui hakkhamahā makhangachei leikashi chiwui athishurda, kala mibing hili Egyptwui eina thuilaga arui rāshungda pheomichingda khalei chiwui athishurda ina poli, mibing hiwui khayonkhamāng kapheomilu.”

²⁰Chieina PROHOna hānga, “Nawui tui athishurda ina pheomihaira;

²¹kha kachangkhat eina, I leilakha eina tangda, kala okathui katonga hi PROHOwui tekhamateina pemngasakki jihaoda,

²² iwui tekhamatei kala khudam Egyptli kala lamhāngli ina chithei kahai chi theilala ili tharā shida chāng yangda kala iwui tui manganāsang thuda,

²³avāva̱ ngarāli ina ngashit kahai ngalei chi matheimara; kala ili ningkakachaibingna ngalei chi kathei masamphangmara.

²⁴ Kha iwui rao Calebna ngateihang kahai ning leida ili shurchao kajiwui vang, ana ayang kahai ngalei chili ina zangngasakra, kala awui ara̱-azāna ngalei chi samphangra.

²⁵Ara tampāk chili Amaleknaobing eina Canaannaobing pamhaoda, akhama ngareikhuida Red Sea shongfa shurda lamhāngvāk vaulu.”

²⁶PROHOna Moses eina Aaronli hānga,

²⁷“Karankha makhayā yarui ashangva̱ hina iwuitungli ngurngur matuira? Israel mibingna iwuitungli ngurngur khamatui saikora ina shāhaira.

²⁸Athumli hānglu, ‘I leilakha eina tangda’ da PROHONA hānga, ‘Nathumna iwui miktāli hāngkahai chiwui athishurda ina nathumli sāra:

²⁹ Nathumwui kathingun lamhāng hili pitāra; mishānli shānnar kahai nathum saikora kum maga̱ eina thuida chiwui atungbing iwuitungli kakharopbing,

³⁰Jephunnehwui naomayara Caleb eina Nunwui naomayara Joshua maningla khangatei khipākha ina nathumli pamngasakra da ngashit kahai ngalei chili mazangmara.

³¹Kha nathumwui ara̱-azā, nathumna sāshai ngasāhaora da kahānga, naongarābing ina khuizangda nathumna horkahai ngalei chi athumna theira.

³²Kha nathumva, nathumwui kathingun lamhāng hili pitāra.

³³ Kala nathum lamhāngli mathingakanranglakha eina tangda, nathumwui mashitkasangwui vang nanaongarāli kum hangmati chotchāngda lamhāngli yao kahoma sāra.

³⁴Nathumna Canaanli akhayang zimiksho hangmati thangwui athishurda, thangkhana kumkha sāda, zingkum hangmati nathumwui khayonkhamāng phungra kala iwui ningyāng makhaung chi nathumna theira.’

³⁵PROHO, ina, hānghaira; makhayā katonga, chiya ili mamayāmada kazip kakhui ashangva̱li makahatlakla ina hi sāra: lamhāng hili athum ngachangchaohaora, kala chili athum thira.”

³⁶Ngalei chili ayang khavai Mosesna kachiho kala hanunglaga ngalei chili makhamayā khangui pao ungkhamiwui vang ali ashangva̱na ngurngur matui khangasaka mibing,

³⁷kala khangui pao khuikhaunga mibing chi PROHOwui mangāli kazātkashi eina thihaowa.

³⁸Kha ram chi akhayang mibingwui ngachaili Nunwui naomayara Joshua eina Jephannehwui naomayara Caleb mathila ringa.

³⁹Kala Mosesna tui chi Israelwui mibing saikorali hānga, kala mibingna sifalak eina soso chapngachai.

⁴⁰Kala athumna ngathorthak ngakarthuida phungreiram chili kāda hānga, “Yanglu, ithum hili lei, PROHOna ngashit kahai apam chili ithum mavāmara, kaja ithumna morei sāhaira.”

⁴¹Kha Mosesna hānga, “Khisāda arui nathumna PROHOwui kakaso chili mangānathukhala, kaja china kalikha maungshungmarala?

⁴²Makālu, nathumwui yangkashibingwui mangāli nathum pitāhaora, kaja PROHOna nathumli mangasomimana.

⁴³Khikhalajila Amaleknaobing kala Canaannaobing nathumwui mangāli lei, nathum athumwuili pitāra; kaja nathumna PROHOli kashurwui eina yāmhaira, PROHOna nathumli mangasomimara.”

⁴⁴Kha PROHOwui tuingashit oko eina Moses rāmrahwui eina zatkaphokli mazanglala athumna phungreiram chili kāhaira da phaninga.

⁴⁵Chitharan Amaleknaobing kala Canaannaobing phungreiram chili pamkasābing tārāsai kala athumli yuihaida Hormah eina tangda kharomvāhaowa.