Read Tangkhul Naga MISHĀN 16 Bible Online

MISHĀN 16 - Tangkhul Naga bible

MISHĀN 16

¹ Chitharan Leviwui naomayara Kohathwui naomayara Izharwui naomayara Corahna Eliabwui naomayara khani Dathan eina Abiram kala Pelethwui naomayara On, Reubenwui ara̱-azābingli ngasoda,

²yarui kazip chiwui eina hākakhui, ashangva̱wui kathāna Israelwui mibing shākhani hangphangā thānkhuida Moseswui mangāli rai;

³kala athumna Moses eina Aaronli makhamayāwui kazip akha khuida hānga, “Nani hennāhaira! Kaja yarui ashangva̱, athum kachiva̱ katharasera, kala PROHOna athumli ngasomida lei; laga kachiwui vang PROHOwui kakazip mibing hili lāngmeida nani khalatta sochikatkhala?”

⁴Mosesna chi kashā eina, a mai mashunzanghaowa;

⁵ kala ana Corah eina ali khangasobing chili hānga, “Ngathorshong PROHOna awui mi khipa, kala mi khipā katharakhala kaji chitheira, kala ana kapangkakhui mi chili angalemli rānganai ngasakra.

⁶Hithāda sālu: Corah eina ali ngasokazata, nathum thaokhong khuirālu;

⁷akhama PROHOwui mangāli thaokhong chili thao sangda mei shārkalu, chili PROHOna kapangkakhui mi chi katharapana, Leviwui naomayara nathum hennāhaira!”

⁸Kala Mosesna Corahli hānga, “Nganālu, Leviwui naomayarabing:

⁹Israelwui Varena nathumli Israel yarui ashangva̱wui eina ngateida kapangkhuida ali nganai khangasak, PROHOwui tabernacleli otram ngatha̱ khangasak, kala yarui ashangva̱li nganing ngasakta otram ngatha̱ khangasak hi nathumwui vāng teolak kahai otna da phaningla?

¹⁰Ana nali kala Leviwui naomayarabing nachinā ngarāli ngasoda awui ngalemli rāngasak kahai maningmala? Laga nathumna pāngmon otpamla phāluifarala?

¹¹Chiwui vang eina nathum kala nathumli ngasokazatabing kazip kakhui hi PROHOli makhamayāna; Aaron khipāda nathumna awuitungli ngurngur khamatuikhala?”

¹²Chieina Mosesna Eliabwui naomayara Dathan eina Abiramli aho ngasaka, kha anina hānga, “Ini marāmara.

¹³Nana ithumli seina̱ eina khuira̱ khalonga ngaleiwui eina hoshoklaga lamhāngli chithit khavai kala nakhalatta ithumwui wungnao sākhavai kasā hi kapai otla?

¹⁴Chili lāngda nana ithumli seina̱ eina khuira̱ khalonga ngaleili mathānzangmana, lah lui kala drakhā yāmguibingla mamirarmana. Mibing hiwui mik latshokmihaoga kajila? Ini marāmara.”

¹⁵Chieina Moses malungvātlakhaowa, kala PROHOli hānga, “Athumwui kachigat makhuimialu, athumwui eina ina gadhānao akhala makhuiranga, kala athum akhalila khangui masāranga.”

¹⁶Kala Mosesna Corahli hānga, “Akhama na kala nawui mibing PROHOwui mangāli rālu, Aaronla chili leisāra;

¹⁷nathum ava̱va̱na PROHOwui mangāli thaokhong ava̱va̱li thao sanglaga nathum katongawui thaokhong shākhani hangphangā khuirālu; Aaron, nala, kachichāwui thaokhong khuirālu.”

¹⁸Chiwui vang athum kachichāwui thaokhong khuida mei sharkāda chiwuitungli nganamkaphā yur sangda Moses eina Aaronli ngasoda kazip khavai kachonshim khāmongpheili anganinga.

¹⁹Chieina Corahna anili mamayāmada yarui ashangva̱li ngasoda kazip khavai kachonshim khāmongpheili kazipa. Kala PROHOwui tekhamatei chi yarui ashangva̱li rāchithei.

²⁰Kala PROHOna Moses eina Aaronli hānga,

²¹“Nani yarui ashangva̱ hiwui eina ngateida pamlu, kaja ina mibing hili hunkhawui alungli shimān ngasakhaora.”

²²Anina mai mashunzangda hānga, “O Vare, manglākapai saikorawui Vare, mi akhana morei kasāwui vang yarui ashangva̱li malungvātrala?”

²³Kala PROHOna Mosesli hānga,

²⁴“Yarui ashangva̱li hānglu, Corah, Dathan kala Abiram athumna pamkhangarumwui eina thuihaolu.”

²⁵Chieina Mosesna ngakarthuida Dathan eina Abiramwuili vai, kala Israelwui khararnaobing ali shura.

²⁶Kala ana yarui ashangva̱li hānga, “Makhayā mibingwui rāmrah hiwui eina yāmulu, kala athumwui moreiwui vang nathumla mashimānrum khavai athumwui khikhanidala masāza̱alu.”

²⁷Chiwui vang athumna Corah eina Dathan kala Abiramna pamkhavaiwui eina yāmhaowa; kala Dathan eina Abiramna athumwui preiva̱ kala naomayara ngarāli ngasoda rāmrahwui khāmongli shoknganinga.

²⁸Mosesna hānga, “Hieina nathumna theira kaja PROHOna saikora hi sākhavai ili kaso kahaina kala hi ikhalattawui eina maningmana.

²⁹Kalikha mibing hi mikumowui khangachā mithit eina thiakha, lah kalikha athum mikumowui kalāshāt samphangakha, PROHOna ili chihokharā maningmana.

³⁰Kha PROHOna ngateihang kahai kadhar sākhuida, kala ngaleina khamor khamakā eina athum kala athumwui khalalei saikora mayuisangda Kathewui ramli kharing eina zanghaiakha nathumna theira, kaja athumna PROHOli chipathaira.”

³¹Kala ana tui saikora hi matuikup kahai eina, athumwui azingli khalei ngalei chi ngachakkhaihaowa.

³²Kala ngaleina khamor makāda athum shimkhurwui mibing kala Corahwui mibing kala athumwui ot saikora eina ngasoda mayuisanghaowa.

³³Chiwui vang athum kala athumwui thongthāng saikora kharing eina Kathewui ramli vāhaowa; kala ngalei chi ngashimluida athum yarui kazipwui eina shimānhaowa.

³⁴Kala chiwui ngalemli leikasā Israelwui mibing chaplaga yāmuwa, kaja athumna hithāda hānga, “Ithumlila ngaleina mayuisangpaishina!”

³⁵Kala PROHOwui eina mei chihorada thaokhong kasing mi shākhani hangphangā chila chuitahaowa.

³⁶Chieina PROHOna Mosesli hānga,

³⁷“Aaronwui naomayara pāngmon Eleazarli hānglu, thaokhong chi chuida khalei mei chiwui eina khuiranu; chiwui thili meibing chi tālāk eina chaiyānghaolu. Kaja chibing chi katharana,

³⁸morei kasābing china manglā hamlaga kasing thaokhongbing chi tharhaira; chieina chibing chi shaokhuida hanphutsham sākhuiranu; kaja hibing hi PROHOwui mangāli athumna chigat kahai otna chiwui vang hi katharana. Hithāda sāda Israelwui mibingli machutkhui khavai khudam sāngasakra.”

³⁹Chieina pāngmon Eleazarna chigat kahai athumwui pithraiwui thaokhongbing chi shaokhuiluida hanphutsham sākhui,

⁴⁰hina Israelnaobingwui phaningung khavai sai, chiwui vang pāngmon makhaninga kala Aaronwui ara̱-azā makhaninga china PROHOwui mangāli nganamkaphā mariktāpaimana, riktaakha Corah kala awui mibingli kasā thāda shokngasakra kaji theingasaka — hi PROHOna Moseswui khamor eina Eleazarli theingasaka.

⁴¹Kha akhama kathā Israel yarui ashangva̱na Moses eina Aaronwuitungli kharopta ngurngur eina hānga, “Nanina PROHOwui mibing sāthathaira.”

⁴²Kala yarui ashangva̱ china Moses eina Aaronli makhamayāwui kazip kakhui tharan, athumna kazip khavai kachonshimvāk yangvai; kala yanglu muiyāna shim chili ngapuirorda PROHOwui tekhamatei rāchithei.

⁴³Chieina Moses eina Aaronna kazip khavai kachonshimwui mangāli vai,

⁴⁴kala PROHOna Mosesli hānga,

⁴⁵“Yarui ashangva̱ hiwui eina yāmulu, hunkhawui lungli ina athumli shimān ngasakhaora.” Kala anina mai mashunzanghaowa.

⁴⁶Kala Mosesna Aaronli hānga, “Nawui thaokhong khuida hanphutwui eina mei shārkākhuilu, kala nganamkaphā thao sanglaga yarui ashangva̱wui alungli thāklāk eina khuivālu, kala athumwui vang pheomiranu; kaja PROHOwui eina malungkhavāt chishothaida kazātkashi haophokhaira.”

⁴⁷Chieina Mosesna kahāng thāda Aaronna chi khuilaga kazip chiwui alungli vai; kala yanglu, kazātkashi chi mibingwui alungli haophokhairasai; kala ana nganamkaphā thao sangda mibingwui vang pheomi.

⁴⁸Kala ana kathi eina kharingbingwui ngachaili anganinga; kala mimao chi ngasāmhaowa.

⁴⁹Chitharan Corahwui otshot chili thikahaibing mazangla kazātkashina thikahai mi thingtharāda mati shāshinina.

⁵⁰Kala kazātkashi chi ngasām kahai tharan, Aaronna kazip khavai kachonshim khāmongpheili Moseswuili latunga.