Read Tangkhul Naga MISHĀN 18 Bible Online

MISHĀN 18 - Tangkhul Naga bible

MISHĀN 18

¹PROHOna Aaronli hānga, “Na kala nawui naomayarabing kala navāwui shimkhurbing nali ngasoda katharapamwui khayonkhamāng phungra; kala na eina nawui naomayarabingmāngna nali ngasoda pāngmonpamwui khayonkhamāng phungra.

²Chieina navā ngarā Levishangwui nachinā ngarābing khuirālu, chieina na eina nanaomayarabingna ningkhami kachonshimli otram ngatha̱lakha athumna ngachonra.

³ Athumna nali kala kachonshimli otram khangatha̱bing saikorali ngachonmira; kha athum katharapamwui khorkhongbing, lah hanphutli manganaipaimara, nala athumla thipaishina.

⁴Athumna nali ngasoda, kala kazip khavai kachonshimwui otram saikorali ngatha̱ngachonra; kala khipākha nali marānganaipaimara.

⁵Kala nana katharapamwui ot kala hanphutwui ot sāra, chieina Israel mibingwuitungli Varewui malungkhavāt maleimara.

⁶Kala yanglu, ina nachinā Levishili Israel mibingwui eina phaishokhaira; athum hi nawui vang lemmetna, PROHOli mikahaina; athumna kazip khavai kachonshimli otram ngatha̱ra.

⁷Kala na eina nanaomayarabingna nali ngasoda nawui pāngmon ot kala mairārwui alungli khalei hanphutwui ot saikora yangsangmira; kala nana otram ngatha̱ra. Ina nawui pāngmonpam lemmet eina khamina, kala chili rākhanganai mi kachiva̱li thingasakra.”

⁸Chiwui thili PROHOna Aaronli hānga, “Kala yanglu, Israelwui mibingna ili kachigat, tharchigat kahai ot saikora kazip kahai chi; ina nali sharuk sāda mikahaina kala nanaomayarabingli mirān yar chi michingra.

⁹Hi nathumwui vang tharmeikap kaji meiwui eina phaishok kahai otna. Athumna ili kachigat kachiva̱, tharāzāt, suihamchigat, kala khayonchigat na eina nanaomayarabingwui vang kathara otna.

¹⁰Tharmeikap kajipamli nathumna chi shaiki kajina; mayarnao kachivana chi shaipaira, kaja hi nathumwui kathara otna.

¹¹“Israel mibingwui lemmetchigat, kala athumwui khayitchigat saikora hila nawuina, na kala nawui naomayarabing, naongalāva̱bing, nali ngasokapamali ina mikharān yar metchang kahaina; nawui shimkhurli kathara mi kachiva̱na chi shaipaira.

¹²“Thao, drakhāra̱, theishiraiwui eina mathāmeikap kaji, matheikhare athumna PROHOli kachigat saikora ina nali mihaira.

¹³Athum ngaleiwui samphangkhare athei-arai PROHOli khuikharā saikora nawui ngasāra; nawui shimkhurli kathara mi kachiva̱na chi shaipaira.

¹⁴ “Israelwui alungli tharchigat kahai saikora nawui ngasāra.

¹⁵“Manglākapai pharākhare, milapai, lah sāyurlapai, PROHOli kachigat chi nawui ngasāra; kha pharākhare mi, kala makathara sāyur nana ngatangkhuira.

¹⁶Kala kachāngkha kāhaiakha athumwui ngatangman chiya lupāsā shekel phangā, kathara shimwui shekelchākwui athishurda gerah maga̱ nana retmira.

¹⁷Kha pharākhare sei, yao, kala me hibing nana mangatangkhuimara, chibing chiya katharana; nana athumwui ashee hanphuttungli kasirrorra, kala athumwui athao meili riktālaga PROHOli ningyāngkhaung nganamkaphā chigat khavaiwui vangna.

¹⁸Kha chiwui aphibing chi nawui sāra; khayitchigat kahai asuk kala yāvākwui akhaishāng nawui sāra,

¹⁹ “Israelwui mibingna PROHOli kathara kachigatbing saikora ina nali, nanaomayarabingli, kala nanaongalāva̱ ngarāli metchang kahaina. Hi na kala nawui ara̱-azāwui vang PROHOwui mangāli katang makhavai machiwui tuingashitna.”

²⁰Kala PROHOna Aaronli hānga, “Athumwui ngalei chili nawui shimlui mavaimara; khangatei yarla maleimara; Israel mibingwuilungli I hi nawui yarna kala shimluina.”

²¹ PROHOna hānga, “Levinaobingna kazip khavai kachonshimli otram ngatha̱ya, kala athumna otram ngatha̱khamiwui vang athumwui shimlui sākhavai Israelwui tithe kachiva̱ ina mihaira.

²²Kala arui eina thuida Israelwui mibing kazip khavai kachonshimli marānganaipaimara, kaja athum morei phungda thira.

²³Kha Levinaobingna kazip khavai kachonshimli otram ngatha̱da athumwui khayon chi athumna phungra; hi katang mavaila thot-thotwui shiyan-chikan ngasāra; kala Israel mibingwuilungli athumwui shimlui mavaimara.

²⁴Kaja Israelwui mibingna PROHOli tithe eina kachigat khami chi Leviwui shimlui sākhavai ina mihaira; chiwui vang eina athumwui pongli ina kahāngna kaja Israel mibingwuilungli athum shimlui maleimara.”

²⁵Kala PROHOna Mosesli hānga,

²⁶“Chili lāngda nana Levinaobingli hāngra, ‘Ina nathumwui shimlui sāda Israel mibingwui eina khami tithe chi kakhui tharan, nathumna chiwui eina PROHOli tithewui tithe sāda chigatra.

²⁷Kala athumwui kachigat chili lanpumwui theishirai thāda kala drakhāthei surkhavaipamwui heiun thāda khuimira.

²⁸Hithāda nana Israel mibingwui eina samkaphang, kala nawui tithe saikora chi PROHOli nana chigatluira; kala PROHOwui kachigat chi nana pāngmon Aaronli khuishokmira.

²⁹Nathumli khami saikora chiwui ngachaiwui eina nana phameikap kaji kala tharmeikap kaji yar chi PROHOli chigatra.’

³⁰Chiwui vang eina nana athumli hāngra, nathumna mathāmeikap kajiwui eina chigat kahai thili, khangatei chiya Levinaobingli lanpumwui eina samkaphang thāda mira, kala drakhāra̱ surkhavaipamwui eina samkaphang thāda mira;

³¹kala chi na eina nawui shimkhurna apam akhali shaipaira; kaja hi kazip khavai kachonshimli otram khangatha̱wui vāng nawui sāmanna.

³²Kala nana mathāmeikap kaji chigat kahai tharan apong hiwui vang nana morei maphungmara. Kala Israel mibingwui kathara otbing chili nathumna masāmakhaopaimara, nathum thipaishina.”