Read Tangkhul Naga MISHĀN 19 Bible Online

MISHĀN 19 - Tangkhul Naga bible

MISHĀN 19

¹Chitharan PROHOna Moses eina Aaronli hānga,

²PROHOna kakaso ainwui shiyan-chikan chi hina: Israelwui mibingli hānglu, achuk kapei khānkhanang makhaleiya kala seiot maphunglakrang kaji kahunga seila akha khuirā ngasaklu.

³Kala nathumna chi pāngmon Eleazarli mira, kala seilā chi rāmrah ayarli khuishokta awui mangāli sāthatra.

⁴Chieina pāngmon Eleazarna awui pāngmareng eina ashee ngayarda khuida kazip khavai kachonshim mangāli shini shida kasirrorra.

⁵Kala seilānao chi awui miktāli riktāra; ahui, aphi, ashee kala awui pai chi riktāra.

⁶Kala pāngmon china cedarthing, maharnā kala hungshi kahai kazaira̱ khuida seilānao riktāda khalei chiwui alungli horsangra.

⁷Chiwui thili pāngmon china awui kashan-kachonla ngasa̱da phasā tara̱ eina ra̱vaira, kala chiwui thili ana rāmrahli ungra; kala zimik matunranglakha eina tangda pāngmon chi matharmara.

⁸Seilānao riktakhame china awui kashankachon ngasa̱da ra̱vaira, kala ngazin eina tangda a matharmara.

⁹Kala kathara mi akhana seilānao riktā kahaiwui hotla chi kazipkhuilaga rāmrahwui ayarli kathar apam akhali haira; kala chi Israelnaobingwui vang kaziphailaga tara̱li sanghaida hotlāwui tara̱ china morei pheokhavaiwui vangna.

¹⁰Seilānao riktāda chiwui hotla kazipkakhuipa chila awui kashankachon ngasa̱ra kala ngazin eina tangda ala matharmara. Hi Israelnaobing kala kha̱mi athumli ngasokazatabingwui vang katang makhavai ningkhamina.

¹¹Kathingunli sakaza̱ mi chi zimiksho shinithang matharmara.

¹²Akhalattana kakathumathang kala kashinethang tara̱ eina ra̱vailaga tharngasakra, kha ana kakathumthang eina kashinethang mara̱vaiakha a matharluimara.

¹³Kachikathāna mi kathi angunli saza̱laga akhalatta mara̱vaimathaakha PROHOwui tabernacle sākhamāng khangasakna, chieina mipa chili Israelwui eina katathaora; khikhalajila makathar pheokhavai tara̱ chi awuitungli maheirorthuda a matharmara; makathar chi awuili leichinga.

¹⁴“Hi kachonshimli mi kathi chitharanwui ainna: kachonshimli mi thihaiakha rākazanga milapai, leikasā milapai shinithang matharmara.

¹⁵Kala rāmrah chiwui hamkhong asham mashingla leikasā saikora matharmara.

¹⁶Kachikathāna kayang khareili raighai eina sākathat angun, lah thikahaiya angun, lah mira̱kui, lah chikhurli saza̱akha, zimiksho shinithang matharmara.

¹⁷“Makatharbingwui vang suihamchigat kachigatwui hotla khuilaga longkazat tara̱ eina akhong akhali manātra.

¹⁸Chieina kathara mi akhana maharnā chi tara̱ chili chumkhuilaga kachonshim chili, thongthāng saikorali, kala chili khalei mibing kala mira̱kuili, lah thikahai, lah chikhurli sakaza̱ mipa chili kasirrorra.

¹⁹Kala kathara mi china makatharawuitungli kakathumathang kala kashinethang kasirrorra; hithāda a kashinethang tharhaora, kala ana tara̱ eina ra̱vailaga kashan-kachonla ngasa̱ra kala zingyinlam a tharhaora.

²⁰“Kha makathara mi china akhalatta tharkhavai masaakha ali mibingwui eina katathaora; kaja PROHOwui katharapam chi ana sākhamānghaowa; khikhalajila ana makathar pheokhavai tara̱ aphasāli heirorda mara̱vaithuda a matharmana.

²¹Kala hi athumwui vang katang makhavai shiyan-chikan sāchingra. Makathar pheokhavai tara̱ kasirkharora a china awui kashankachon ngasa̱ra; kala tara̱ sakaza̱pa chi ngazin eina tangda matharmara.

²²Kala makathara mina sakaza̱za̱ chi matharmara; kala chi sākaza̱a mi chi ngazin eina tangda matharmara.”