Read Tangkhul Naga MISHĀN 20 Bible Online

MISHĀN 20 - Tangkhul Naga bible

MISHĀN 20

¹Kala Israelwui mibing, yarui ashangva̱, kachāng khareli Zin lamhāngli vai, kala mibingna Kadeshli angasāma; kala Mariam thihaida chili chifahaowa.

² Chitharan yarui ashangva̱wui vang tara̱ maleisathuwa; kala mibingna Moses eina Aaronwuitungli makhamayāwui kazip khui.

³Kala athumna Mosesli ngasungda hānga, “Ithumla PROHOwui mangāli ichināngarāli ngasoda thihaisasi kaja phālakra!

⁴Khiwui vang nana PROHOwui mi ashangva̱ hi lamhāng hili thānkharākhala? Kaja ithum kala ithumwui sha̱keili chithit khavai thānkharāla?

⁵Kala khiwui vang ithumli Egyptwui eina thānshoklaga makaphā apam hili thānkharākhala? Hi theishirai, khaorāthei, lah drakhāthei, lah kabothei khamathā apam maningmana; kala mangkhavai tara̱ maleimana.”

⁶Chieina Moses eina Aaronna yaruiwui eina shoklaga kazip khavai kachonshim khāmongli zangda mai mashunzanga. Kala PROHOwui tekhamatei anili rāchithei,

⁷Kala PROHOna Mosesli hānga,

⁸“Khāmshui chi khuilu, kala nachinā Aaron nanina yarui ashangva̱ kazipkhuilu, kala athumwui miktāli tara̱ shokkhavai lunghār chili hānglu; hithāda nanina yarui ashangva̱wui mangkhavai tara̱ khuishokmira, chithāda sāda yarui kala athumwui sha̱keila tara̱ khamang samphangra.”

⁹Chieina Mosesna ali kaso kahai athishurda khāmshui chi PROHOwui mangāli khuiya.

¹⁰Kala Moses eina Aaronna yaruili lunghārwui mangāli kazip ngasakta hānga, “Ara nganālu, ngakaikashe nathumwui vang lunghār hiwui eina inina tara̱ khuishokmirala?”

¹¹Kala Mosesna apāng khāngkāda lunghār chili awui khāmshui eina khanishida ngaphita; kala tara̱ kachungkha shokta ashangva̱ kala athumwui sha̱keila manga.

¹²Kala PROHOna Moses eina Aaronli hānga, “Khikhalajila Israel mibingwui mangāli iwui tharkhamatheng chi chithei khavai ili mashitsangthukada, ina athumli mikahai ngalei chili nanina yarui ashangva̱ hili mathānzangmara.”

¹³Hi Meribahwui tara̱na, Israelwui mibingna PROHOli ngasung khavai, kala ana akhalatta athumwui ngachaili katharanada chithei kahai apamna.

¹⁴Mosesna Kadeshwui eina Edomwui awungali paomebing chihovai, “Israel nachinā ngarāna hi kahāngna: Ithumwui kachotkachāng nana thei;

¹⁵kathāda ishāvā ngarāna Egyptli tākhala, kala chili atam kasāngkha Egyptwui mibingna ishāvā ngarali kala ithumli kayākha sāshilak eina sākhala da nana thei;

¹⁶kala ithumna PROHOli khangakao tharan, ana shāmida awui kazingrao chihorai kala Egyptwui eina ithumli khuishokmi; ara ithum Kadeshli leida lei, hi nawui keinungwui leiretna.

¹⁷Chieina ithumli nawui ngalei hi eina kakān ngasakmilu. Ithum nawui lui, lah drakhā yāmguili makānmara, ra̱khongwui tara̱ eina tangda mamangmara; Wungnaowui Shongrei eina kānda yāvāk, lah uivāk mangareila nawui leiretlung kānthuihaora.”

¹⁸Kha Edomna ali hānga, “Nathum makānpaimara, raakha ina raighai singlaga shokra.”

¹⁹Chieina Israelwui mibingna ali hānga, “Ithum shongreimāng eina kānra; ithumna kala sha̱keina tara̱ mangmihaisālala ina chiwui vang aman mira, shongfamāng kānngasakmilu, chimara.”

²⁰Kha ana hānga, “Nathum makānpaimara.” Kala Edomna athumli mamayāmada awui raimi shirting eina shokrāsai.

²¹Hithāda Edomna awui leiret kānkhavai mamayāmithuwa, chieina Israelwui mibingna awui eina ngalatthuihaowa.

²²Chiwui thili Israelwui mibing, yarui ashangva̱ Kadeshwui eina zatlaga Hor Kaphungli vai.

²³Kala PROHOna Moses eina Aaronli Edom ngaleiwui tharili khalei Hor Kaphungli hānga,

²⁴“Aaronli awui awo-ayiwuili khuiunghaora, kaja Israelwui mibingli ina ngashit kahai ngalei chili a mazangmara, khikhalajila Meribahwui tara̱pamli nanina iwui kakaso chi masāla ili ngakaishihaowa.

²⁵ Aaron eina anaomayara Eleazarli hokhuilu, kala anili Hor Kaphungli thānkalu.

²⁶Chili Aaronwui sāri raikhuilaga Eleazarli sangmihaolu, kala Aaronli awui mibingwuili khuivāhaora, a chili thihaora.”

²⁷Mosesna PROHOwui kakaso athishurda sai; kala athum Hor Kaphungli yarui ashangva̱wui mangāli kai.

²⁸ Chili Mosesna Aaronwui sāri raikhuilaga anaomayara Eleazarli sangmi, kala Aaron phungreiton chili thihaowa. Chiwui thili Moses eina Eleazar phungrei chiwui eina tai.

²⁹Kala Aaron kathi theilaga Israelwui shang saikorana Aaronwui vang zimiksho thumrāthang chapngachai.