Read Tangkhul Naga MISHĀN 21 Bible Online

MISHĀN 21 - Tangkhul Naga bible

MISHĀN 21

¹ Canaanwui mi Negebli kapama Aradwui awungana, Israelna Atharimshong eina rārāli kaji shāda ana vāngarara, kala Israelnao kaikhali tukthuihaowa.

²Chieina Israelna PROHOwui mangāli khangashit sāda hānga, “Nana mibing hi ithumwui pāngli mira jiakha, ithumna athumwui keinung saikora sāshimānmihaora.”

³PROHOna Israelwui kapo shāmida Canaannaobing athumwui pāngli sangmi; keinung chi peichaoda sāshimānmihaowa; chiwui vang eina apam chiwui aming Hormah [1] hoi.

⁴Edom ngalei kuida zatkhavai athumna Horwui eina zatphokta Red Sea tākhavai shongfa shura; kha shongfali mibing makhāngtheithuwa.

⁵Kala mibingna Varewuitungli kala Moseswuitungli mamayāmada hānga, “Khiwui vang ithumli lamhāngli chithit khavai Egyptwui eina thānkashokkhala? Kaja hili zāt kala tara̱la malei, kala makānkhanā zāt hila sānhaira.”

⁶Chieina PROHOna mibingwui alungli meiwon phara̱ chihorada mibingli makeiya, kala Israelwui mi kachungkha thihaowa.

⁷Chieina mibingna Mosesli rāda hānga, “Ithumna morei sāhaira, PROHOwuitungli kala nawuitungli makhamayā tui matuihaira. Phara̱bing hi ithumwui eina khuithuimihai khavai PROHOli pomilu.” Chieina Mosesna mibingwui vang seihā sai.

⁸Kala PROHOna Mosesli hānga, “Mei phara̱ akha sākhuilaga thingtungli hailu; kala phara̱na makei kahai kachiva̱na chili khayang tharan ringra.”

⁹ Chieina Mosesna pithrai eina phara̱ akha sākhuida thingtungli shaoshānhai; kala phara̱na mili makeiakha pithraiwui phara̱ chili yangkāda ringa.

¹⁰Kala Israelwui mibingna zatphoklaga Obothli rāmrah vasāpama.

¹¹Kala athumna Obothwui eina zatphoklaga zimikshoshong khalei Moabli kāroda Iyeabarimwui lamhāngli rāmrah vasāpama.

¹²Chiwui eina athumna zatphokta Zered tampākli rāmrah vasāpama.

¹³Chiwui eina zatphoklaga Amornaobingwui thari vāshungda khalei, Arnonwui lākhavāk lamhāng chili rāmrah vasāpama. Kaja Arnon hi Moab eina Amornaobingwui ngachaili khalei tharina.

¹⁴Chiwui vang PROHOwui Raiwui Lairikli hi hānghaida lei. “Suphahli khalei Waheb, kala Arnonwui tampākbing,

¹⁵kala Tampākwui leishāmbing, Arwui pam vāshunga, kala Moabwui thari ungshunga.”

¹⁶Kala chiwui eina athumna Beerli zatvāmamanuwa; hi PROHOna Mosesli, “Mibingli kazipkhuilu, ina athumli tara̱ mira.” da kahāng ra̱khongpam china:

¹⁷Chieina Israelna laa hi sai: “Okshoklu, O ra̱khong; Chili laa sālu!—

¹⁸Wungnaobingna chuikahai ra̱khong, khangam khareibingwui khānthing, lijei singlaga chuikahaina.” Kala lamhāng chiwui eina thuilaga athumna Mattanahli vāshunga,

¹⁹Mattanahwui eina Nahaliel, Nahalielwui eina Bamoth,

²⁰kala Bamothwui eina Moab ngaleiwui tampāk, Pisgahwui atung eina yangkazang siwuk chili vai.

²¹ Chiwui thili Israelna Amorwui awunga Sihonli paomebing chihovāda hānga,

²²“Ili nawui ngalei kakānshok ngasakmilu; ithumna lui, lah drakhā yāmguili mazatmara; ra̱khongwui tara̱la mamangmara; ithum naram leiret makānthuiranglakha eina tangda Wungnaowui Shongreili zatra.”

²³Kha Sihonna Israelli awui leiret makān ngasakmana. Ana awui mibing kazipkhuilaga lamhāngli vāda Jahazli Israelli ngarara.

²⁴Kala Israelna ali raighai eina sāthathaowa, kala awui ngalei Arnon eina thuilaga Jabbok kala Ammon ngalei vāshungda khuihaowa; kaja Jazerna Ammonnaowui tharina.

²⁵Kala Israelna Amorwui keinung saikora khuilaga, Heshbon alungli khalei keinung kala kha saikorali pamhaowa.

²⁶Kaja Heshbon hi Amor awunga Sihonwui keinungna. Ana khare Moabwui awungali rai sālaga Arnon vāshungda athumwui ngalei ngapai kakhuina.

²⁷Chieina lungchān laa kathemabingna hithāda hānga: “Ralu, Heshbonli, hi sakāranu, Sihonwui keinung chi semkāranu.

²⁸ Kaja Heshbonwui eina mei shoka, Sihonwui keinung eina meiwon shoka. China Moabwui Ar chuitai, Arnonwui akhokabing pitai.

²⁹Nali ringkashi ngasaranu, O Moab! Na kuphaira, O Chemoshwui mibing! Anaomayarabingli yāmkazata ngasā ngasakhaira, naongalāva̱ ngarā tuknarhaira, Amorwui awunga Sihonwui pāngli.

³⁰Chiwui vang Heshbon eina thuilaga Dibon vāshungda, awui lan shimānhaira, kala ithumna Medeba vāshungda mei thottamihaira.”

³¹Hithāda Israelna Amor ngaleili sompama.

³²Kala Mosesna Jazer ngalei ayang khavai chihovai, kala chiwui kha̱bing yuikhuilaga chili pamkasa Amornaobingli kashamhaowa.

³³ Chiwui thili athumna chiwui eina kuikhuilaga Bashan shongfa eina shanga; kala Bashanwui awunga Ogna awui mibing saikorali thānda Edre-i apamli rai sākhavai shoka.

³⁴Kha PROHOna Mosesli hānga, “Ali mangacheelu, kachiwui vangkhala jila ina a kala awui mibing kala ngalei nawui pāngli sangmihaira; kala Heshbonli sompamkasa Amorwui awunga Sihonli sākhami thāda alila sāmipapamra.”

³⁵Chieina athumna ali, awui naomayarabing kala awui mibingli sāthatserhaowa; khipākha maringshokmana. Chieina ngalei chi athumwui ngasāhaowa.