Read Tangkhul Naga MISHĀN 22 Bible Online

MISHĀN 22 - Tangkhul Naga bible

MISHĀN 22

¹Chiwui thili Israelwui mibingna Jordan kānkāda khalei Moabwui tampāk Jericholi rāmrah vasāpama.

²Chitharan Israelna Amornaobingli sākahai saikora Zipporwui nao Balakna theihairasai.

³Kala mibing hiwui vang Moabna ngacheelakhaowa, kaja athum mi tarākhana; Moabna Israelwui mibingli khangacheena pemhaowa.

⁴Chieina Moabna Midianwui ararbingli hānga, “Seina tampākwui khawo khamarop thāda mibing hina ithumli kuimareida khaleibing maropngakānki jihaira.” Atam chitharan Moabwui awunga Zipporwui naomayara Balakna sāsai,

⁵Pethorli khalei Beorwui naomayara, Amaw ngaleiwui kongphei ngalemli kapama Balaamli ahokhavai pao chihovāda hānglu, “Yanglu, mibing hi Egyptwui eina kashokna; athumna okathui ngalei pemhaira, kala iwui ramli kāroda pamdalei.

⁶Ralu, athum iwui vang pingnāhaokada mibing hili iwui vang khonshimilu; chithāda athumli ina yuihaida ngalei hiwui eina kashamshaplapai. Kaja nana somi kahai a chiya sokhamina, kala nana khonshi kahai a chiya kalākashina kaji ina thei.”

⁷Chieina Moab kala Midianwui khararnaobingna khanong yangkhavai athumwui pāngli pheisā khuiphungda Balaamli vai, kala Balakwui paola hāngmi.

⁸Kala ana athumli hānga, “Aja pisanghaolu, kala PROHOwui pao ili kachithei chi ina nathumli khuirāmira.” Chieina Moabwui wungnaobing china Balaamwuili ngasāma.

⁹Kala Varena Balaamli rāhānga, “Nawuili khalei mibing hi khipālongkhala?”

¹⁰Kala Balaamna Vareli hānga, “Zipporwui naomayara Balak, Moab awungana ili mi chihorada hānga,

¹¹‘Yanglu, Egyptwui eina miyur akha shokta okathui ngalei pemhaira; arui rāda mibing hili iwui vang rākhonshimilu; chithāda ina athumli ngararda kashamshokhaipai.’”

¹²Varena Balaamli hānga, “Na athumli mangasovāpaimara; nana miyur chili makhonshipaimara, kaja athum somi kahaiyana.”

¹³Chieina Balaamna ngathorshong ngakarthuilaga Balakwui wungnaobing chili hānga, “Naram hanungulu; kaja nathumli ngasovā khavai PROHOna ili mamayāmana.”

¹⁴Chieina Moabwui wungnaobing china ngakarthuilaga latungda Balakli unghānga, “Balaamna ithumli ngasoung khavai mamayāmana.”

¹⁵Latluida Balakna awui wungnaobing chungmeida kala athumli khayā kāmeida chiholuishita.

¹⁶Athumna Balaamli vāda ahānga, Zipporwui nao Balakna hithāda hānga: “Ili rāki kaji hili khikhana mahapkhanoranu;

¹⁷kaja ina nali khayakālak eina sāmira, kala nana ili kahānghāng chi ina sāra; ralu mibing hili iwui vang khonshimilu!”

¹⁸Kha Balaamna Balakwui raobingli hānga, “Balakna ili sinā lupā awui shim khatkha milala, iwui PROHO Varewui kakaso chi kaida masālakmara, lāngdala suitādala masāmara.

¹⁹PROHOna chungmeida ili khi hāngminikhala kaji theikhui khavai hili aja ngayā pisangluilu da seihā sali.”

²⁰Kala Varena ngayāshong rāda Balaamli hānga, “Mibing china nali rākahona jiakha ngakarthuida athumli ngasoda zatlu; kha ina kahāng chimāng nana sāki kajina.”

²¹Chieina Balaamna ngathorshong ngakarthuida awui gadhā shaksāda tonglaga Moabwui wungnaobing chili ngayurthuwa.

²²Kha ana ngayurthui kahaiwui vang PROHOna malungvāthaowa; kala PROHOwui kazingraona yangkashe thāda shongfali nganingkhamhaowa. Ana gadhā tongda awui rao khani ngasozatsai.

²³Kala PROHOwui kazingraona shongfali raighai sutshoklaga nganingkasā gadhā china thei; chieina gadhā china shongfa kānshokta luili zanghaowa; kala Balaamna gadhā chi shongfali shokkhavai ngaphita.

²⁴Chieina kazingrao china drakhā yāmgui khaniwui matakli, arāp khaninishong phākho khalei khamashi shongfali nganingphina.

²⁵Kala gadhā china PROHOwui kazingrao chi kathei eina phākholi ngaheishānda Balaamwui phei phākholi katitshāna; chieina ana ngaphitluishita.

²⁶Chieina PROHOwui kazingrao chi rithuiluishithaowa, kala shongfa khamashi, uivāk, lah yāvāk shongfa makhalei pamli anganinghaowa.

²⁷Gadha china PROHOwui kazingrao chi kathei eina pamzanghaowa; kala Balaamna malungvāthaida gadhā chili awui lijei eina ngaphita.

²⁸Chieina PROHOna gadhā chiwui khamor makāngasakta Balaamli hānga, “Ina nali khi sāhaoda ili kathum shida khangaphitkhala?”

²⁹Balaamna gadhā chili hānga, “Khikhalajila nana ili sānganao kahaiwui vangna. Iwui pāngli raighai singsasi kaja ina nali sāthathairara.”

³⁰Gadha china Balaamli hānga, “Na achāwui eina thuilaga aja rāshungda nawui mirinli nana katonga nawui gadhā chi I maningmala? Ina nali hithakasaila?” “Maningmana” da Balaamna ngahānkai.

³¹Chieina PROHOna Balaamwui mik rakngasakta raighai sutshoklaga shongfali khanganinga PROHOwui kazingrao chili theihaowa; chi kathei eina ana kui mashunzangda ngakhumshāma.

³²PROHOwui kazingrao china ali hānga, “Nawui gadhāli khiwui vang hithāda kathum shida ngaphitkhala? Yanglu, I nali nganingkham khavai kharāna, kaja iwui mangāli nawui shongfa nguihaira;

³³kala gadhā china ili kathei eina hithāda kathumshida khayāmna. Gadha china mayāmla ili rāsi kaja ina nali arui sāthathailaga gadhāliva ring ngasakhairara.”

³⁴Chieina Balaamna PROHOwui kazingrao chili hānga, “Ina morei sāhaira, kaja nana iwui shongfali nganingkhamdalei kaji I matheisāmana. Chiwui vang eina nawui miktāli makaphā otna jiakha I latunghaoga.”

³⁵Kala PROHOwui kazingrao china Balaamli hānga, “Mibing chili ngasoda vaulu; kha ina kahahāng tui chimāng nana hāngra.” Chieina Balaamna Balakwui wungnaobingli ngasoda vāhaowa.

³⁶Balaam rārāli kaji Balakna kashā eina, ana Moabwui keinungli vāmayarmeithui kaji thari apam Arnonli asamphanga.

³⁷Balakna Balaamli hānga, “Ina nali hokhavai makasorāmala? Khisāda ili marāthukhala? Ina nali khayākashi mamitheithula?”

³⁸Balaamna Balakli hānga, “Yanglu, I nawuili rāhaira! Ina I khalattawui pangshap eina matuikapai leila? Varena ikhamorli sangkhami athishurda I matuiki kajina.”

³⁹Chieina Balaamna Balakli ngasoda Kiriath-huzothli vai.

⁴⁰Kala Balakna sei kala yao pha̱phayālaga Balaam eina ali ngasokazata wungnaobinglila chiphunvai.

⁴¹Kala akhama katha Balakna Balaamli ngasophungda Bamothbaalli shanga; kala ana apam chiwui eina chili nganaida kapam mibing chi thei.