Read Tangkhul Naga MISHĀN 25 Bible Online

MISHĀN 25 - Tangkhul Naga bible

MISHĀN 25

¹Israelna Shittimli leilakha mibingna Moabwui naongalāva̱ khayorabingli khangasowui otsakli zanga.

²Otsakbing hina mibingli athumwui varebingli pha̱kaphayāli zang ngasaka, kala mibingna sāla shai, kala athumwui varebingli khoruma.

³Hithāda sāda Israel athum khalattana Peorwui Baalli khorumthuihaowa. Kala chiwui vang PROHOna Israelli malungvāthaowa;

⁴chieina PROHOna Mosesli hānga, “Israelwui kathāna saikora khuida PROHOwui mangāli athumli ngashunshong phashi sāhaolu, chieina PROHOwui malungkhavāt chi Israelwui eina ngalanthuihaora.”

⁵Chieina Mosesna Israelwui bichar samebingli hokhuida hānga, “Nathumwui ngachaili Peorwui Baalli khokharuma mi saikora shaothathaolu.”

⁶Kala yanglu, Israelwui mi akhana Midianwui sha̱nao akha ashi shimli khuiunga, khuikhaung chi Moses kala Israel yarui ashangva̱ kazip khavai kachonshimwui khāmongpheili athumna chapngachāda leilakha katheina.

⁷Phinehas kaho Eleazarwui nao, pāngmon Aaronwui ara̱ china chi kathei eina, ana yarui ashangva̱wui eina shoklaga apāngli kazei singkhui,

⁸kala Israelwui mipa chili zangkhamei kāli shurvai, kala Israelwui mipa chieina sha̱naopava̱ ani khanili pharngara̱wuthaowa. Chieina kazātkashi chi Israel mibingwui eina ngasāmhaowa.

⁹Chithālala kazātkashi eina thikahai mi thingmaga̱da matina.

¹⁰PROHOna Mosesli hānga,

¹¹“Eleazarwui nao, pāngmon Aaronwui ara̱, Phinehasna iwui malungkhavāt Israel mibingwui eina ngalanthui ngasakhaira; iwui yuikashi thāda ana yuishikhami ot sāhaira, chiwui vang eina Israelwui mibingli iwui yuikashiwui eina mashimān khangasakna.

¹²Chiwui vang eina yanglu, ina ali chingri kahaiwui tuingashit mihaira;

¹³kala hi awui vang, kala awui ara̱-azāwui vāng katang makhavai pāngmonpam ngasāchingra, kaja ana awui Varewui vang zikhamari ot sai, kala Israelnaobingwui vang pheokhami ot sāmi.”

¹⁴Midianwui sha̱naoli ngasoda rungthat kahai Israelwui mipa chi Simeon shimkhurwui akhavā Saluwui nao Zimrina.

¹⁵Rungthat kahai Midianpava̱ chili Kozbi hoi. Ala Midian yurwui akhavāshi shimkhur Zurwui naongalāva̱na.

¹⁶Kala PROHOna Mosesli hānga,

¹⁷“Midiannaobingli rekharekta chotchāng ngasaklu,

¹⁸kaja athumna nathumli singkharākta Peor varebingwui pongli, kala Peorwui vang eina kazātkashi rāthang rungthat kahaipāva̱ Midian wungnaowui naongalāva̱ Kozbi, kala athumwui azarva̱wui ponglila nguingasaka.”