Read Tangkhul Naga MISHĀN 27 Bible Online

MISHĀN 27 - Tangkhul Naga bible

MISHĀN 27

¹ Chiwui thili Josephwui naongarā Manasseh shimkhurwui eina, Machirwui naomayara, Gileadwui naomayara, Hepherwui naomayara, Zelophehadwui naongalāva̱bingna rāhānga. Athum chiya: Mahalah, Noah, Hoglah, Milcah kala Tirzahna.

²Athumna kazip khavai kachonshimwui khāmongpheili Moses, pāngmon Eleazar kala Israel ashangva̱wui kathānabingwui mangāli nganingda hānga,

³“Ishāvā lamhāngli thihaira, a PROHOli makhamayābing Corahna thānda kakazipli mazangmana; kha akhalattawui moreiwui vang kathina, kala awui nao mayarnao maleimana.

⁴Awui nao mayarnao makhaleiwui vang shangwui eina khuithuihaorala? Ishāvāwui chinaongarāwui ngachaili ithumlila shimlui yarlu.”

⁵Athumwui tuingaphun chi Mosesna PROHOwui mangāli khuirai.

⁶Kala PROHOna Mosesli hānga,

⁷ “Zelophehadwui naongalāva̱bing mashunga; athumli avāva̱wui chinaongarāna samkaphang thāda shimlui yarphalungra, kala shimluikat chi athumwui ngasāra.

⁸Kala Israelwui mibingli hānglu, ‘Mi akhana naomayara maleila thihaiakha awui shimlui naongalāva̱na khuira.

⁹Kala anaongalāva̱la maleisaakha agatona khuira.

¹⁰Kala awui chinaongarā maleisaakha avāva̱wui avāgatona khuira.

¹¹Kala avāva̱wui chinaongarā maleisaakha awui nganaimeithui kaje shimkhurwui mina shimlui chi khuira. PROHOna Mosesli kakaso athishurda hi Israel mibingwui ain kala shiyan-chikan ngasāra.’”

¹² PROHOna Mosesli hānga, “Abiramwui phungreili kāda ina Israelwui mibingli mikahai ngalei chi kāngashānyanglu.

¹³Kala nana ngashānkhui kahaiwui thili nalila Aaronwui thāda nawo nayiwui pamli khuiunghaora,

¹⁴khikhalajila nana Zin lamhāngli tara̱wui vang mibingna pa̱ngapāthang, mibingwui miktāli iming mathar ngasakla nana iwui tuili ngakaishihaowa.” (Hi Zin lamhāngli khalei Kadeshli Meribahwui tara̱lina).

¹⁵Mosesna PROHOli hānga,

¹⁶“Phasā khavai manglā saikorawui Vare PROHOna yarui ashangva̱wuitungli mi akha kapangmiranu

¹⁷ ana athumwui mangāli rizatra, athumli thanshokmira kala thānzangmira; chithāda sāda PROHOwui ashangva̱ yaokahoma makhalei yaonao thāda mazatmara.”

¹⁸ Kala PROHOna Mosesli hānga, “Nunwui nao Joshuali khuilu; a sāshapa mina, kala awuitungli napāng khāngkāmilu,

¹⁹kala ali pāngmon Eleazar kala yarui ashangva̱wui mangāli nganing ngasaklu, kala nana ali ot chi chisinlu.

²⁰Nana nawui pangshap ali mida, chieina Israelwui mi ashangva̱na awui kahāng nganāra.

²¹ Kala ana pāngmon Eleazarwui mangāli kānganingda pāngmon china awui vang PROHOwui mangāli Urim singda ngahānra; ala kala Israelwui mi ashangva̱, ana shoklu jiakha shokra, kala awui tui eina zangra.”

²²Kala Mosesna PROHOwui kakaso athishurda sai; ana Joshuali hokhuida pāngmon Eleazar eina yarui ashangva̱wui mangāli kānganing ngasaka,

²³ kala PROHOna Mosesli kaso kahai athishurda ana awuitungli pāng parmida awui ot chisina.