Read Tangkhul Naga MISHĀN 3 Bible Online

MISHĀN 3 - Tangkhul Naga bible

MISHĀN 3

¹Sinai Kaphungli PROHOna Mosesli samkaphang tharan Moses eina Aaronwui naothotbing chi hina.

² Aaronwui naomayarabingwui aming chi hina: naochizai Nadab, kala Abihu, Eleazar kala Ithamarna;

³hi Aaronwui naomayarabingwui amingna, pāngmonwui otpamli otram ngatha̱ khavai ana thao neomi kahai kala tharchisin kahaibing china.

⁴ Kha Sinai lamhāngli PROHOwui mangāli makathar mei eina kachigatwui vang PROHOna mamayāmada Nadab eina Abihu thihaowa; kala aniwui naongarāla maleimana. Chiwui vang Eleazar eina Ithamarna avāva̱ Aaron ringlakha eina tangda anina pāngmon sāda otram ngatha̱ya.

⁵Kala PROHOna Mosesli hānga,

⁶“Leviwui shangnaoli rānganai ngasaklu kala pāngmon Aaronwuili haimilu, chieina athumna ali otram ngatha̱ngajira.

⁷Athumna tabernacleli otram ngatha̱da awui vang eina samphang khavai kachonshimwui mangāli khalei yarui ashangva̱wui vang otram ngatha̱ranu.

⁸Athumna kazip khavai kachonshimwui thongthāng saikora yangranu, kala tabernacleli otram khangatha̱ thāda Israelnaobingwui vang ngachonranu.

⁹Kala nana Levibing chi Aaron kala naomayarabingli milu; Israel mibingwui ngachai eina athum katonga awui vang mikahaina.

¹⁰Kala nana Aaron kala naomayarabingli kapangsanglu kala athumna athumwui pāngmonpam chi yangranu, kha mi khangatei rāzangakha ali shaothatra.”

¹¹ Kala PROHOna Mosesli hānga,

¹²“Yanglu, Israel mibingwui naopamwui pharākharebingwui mahut sāda ina Levibingli Israelwui mibing ngachaiwui eina phaishok kahaina.

¹³ Athum iwui mi sāra kaja naochizai saikora iwuisera. Egypt ngaleili naochizaibing shaothatserhaithang, Israelwui naochizai, mila, sha̱keila katonga ina ikhalattawui vang tharchigat kahaina; athum iwui ngasāra: I PROHOna.”

¹⁴Kala Sinai lamhāngli PROHOna Mosesli hānga,

¹⁵ “Leviwui naomayarabing, avāva̱ ngarāwui shimlak kala shimkhurwui athishurda shānlu; kachāngkha kākahaiya kala chiwui atung mayarnao kachiva̱ shānkhuilu.”

¹⁶Chiwui vang PROHOna ali kasohaoda PROHOwui kakaso athishurda Mosesna athumli shānkhuisera.

¹⁷ Hi Leviwui naomayarabing; Gershom, Kohath kala Merari athumwui amingna.

¹⁸Kala hi Gershomwui naomayara athum shimkhurbingwui athishurda: Libni kala Shime-ina.

¹⁹Kala Kohathwui naomayara athum shimkhurbingwui athishurda: Amram, Izhar, Hebron kala Uzzielna.

²⁰Kala Merariwui naomayarabing athum shimkhurwui aming: Mahli kala Mushina. Avāva̱ ngarāwui shimlak athishurda athum hi Leviwui shangna.

²¹Gershonwui eina Libnishi kala Shimeishi shimkhur khani hi shoka: shimkhur khani hi Gershon shangna.

²²Ashi shimkhurwui mashing kachāngkha eina thuilaga chiwui atung mayarnao saikora thingshini shāphangāna.

²³Gershonwui shimkhurbingna tabernaclewui khanuk zingtunshong shim sāki kajina.

²⁴Avāva̱ ngarāwui shimlak athishurda Laelwui naomayara Eliasaphli ngasoda Gershonwui shangli yangra.

²⁵Kala Gershonwui naomayarabingna yangki kaji chiya, kazip khavai kachonshimwui tabernacle, khāmongwui chonrān kachonshim fakham khavai eina ngasoda,

²⁶yāngkhupwui kangruitā khavaibing, hanphut eina tabernacle kuimareida yāngkhup khāmongwui chonrān, kala chiwui khara̱bing, otram saikora otbing hiwui vangna.

²⁷Kohathwui eina kata Amramshi shang, Izharshi shang, Hebronwui shang kala Uzzielwui shang hibingna; hibing hi Kohath shangwui mibingna.

²⁸Kachangkha eina thuilaga chiwui atung, ashiwui mayarnao saikora shānkakhui athishurda thing chishat shātharukna, hina katharapamli otram ngatha̱ra.

²⁹Kohatwui naomayarabingwui shimkhurbingna tabernaclewui azingshong rāmrah sāki kajina,

³⁰avāva̱ ngarāwui shimlak athishurda Uzzielwui naomayara Eli-zaphanli ngasoda Kohathwui shangli yangra.

³¹Kala Athumwui otngarutna, tuingashit oko, table, thaomeishong, hanphutbing, pha̱phayā khavai pāngmonna kasing kathara khorkhongbing katonga, kala chili rānkhavai chonrān saikora hina; otram saikora otbing hiwui vangna.

³²Kala Aaron pāngmonwui naomayara Eleazarna Levishi kathāna saikorawuitungli kharei sāda katharawui otngarutbing hili yangmira.

³³Merariwui eina Mahlishiwui shimkhur kala Mushiwui shimkhur; hibing hi Merariwui shimkhurbingna.

³⁴Kachāngkha kākahai kala chiwui atung mayarnao saikora shānkakhui athishurda thingtharuk shākhanina.

³⁵Kala avāva̱ ngarāwui shimlak athishurda Merari shimkhurwui kathāna, Abihailwui nao Zurielna; ashina tabernaclewui atungshong rāmrah sāra.

³⁶Kala Merariwui naomayarabingna sāki kaji otngarut tabernaclewui akombing, khamakharbing, pakra̱-pakrā, nganing khavai apheibing, kala chiwui ot ayur-ayā katonga zangra; otngarut saikora hi otbing hiwui vangna;

³⁷kala kayāng kuimareida khalei pakra̱, pakra̱pheibing thingshun kala khara̱ hibingla zangrumra.

³⁸Kala tabernaclewui mangā zingshoshongwui rāmrahli khaleibing, kazip khavai kachonshimwui mangāli Moses eina Aaron kala naomayarabingna, Israelnaobingwui vang athumna katharapamli otram ngatha̱mira; chili rākhanganai mi chi shaothatra.

³⁹Saikora shānkhui khavai Moses eina Aaronli PROHOwui ningkhami athishurda kachāngkha kākahai eina thuilaga chiwui atung mayarnao katonga shimkhur athishurda mashing thingmaga̱da khanina.

⁴⁰Kala PROHOna Mosesli hānga, “Israel mibingwui pharākhare mayarnao kachāngkha kākahai eina thuilaga chiwui atungbing, kala athumwui aming eina mashing shānkhuilu.

⁴¹Kala nana Israel mibingwui naochizai mayarnao saikorawui mahut sāda Levinaobing iwui vang khuirālu, kaja —I PROHOna — kala Israelnaobingwui pharākhare sha̱kei saikorawui mahut chi Levishiwui pharākhare sha̱kei iwui vang khuirālu.”

⁴²Chithāda sāda PROHOna ali kakaso tākam eina Mosesna Israel mibingwui naochizai saikora shānkhui.

⁴³Kala kachāngkha kākahai eina thuilaga chiwui atung naochizai mayarnao saikora amingbing eina shānkhuida thing maga̱da khani shākhani kala hangshinida kathuma.

⁴⁴Kala PROHOna Mosesli hānga,

⁴⁵ “Israel mibingwui ngachaili naochizai saikorawui mahut sāda Levibing kala athumwui sha̱kei pharākharebingwui mahut sāda Levibingwui sha̱kei khuilu; kala Levi iwui ngasāra: I PROHO china.

⁴⁶Kala Levishi mayarnao mashingli lāngkahai Israel mibingwui naochizai shākhani kala hangshinida kathum chi ngatangkhui khavai,

⁴⁷nana shekel apā phangāngā khuira; katharashimwui shekel aman athishurda gerah maga̱wui shekel mi ava̱va̱wui vang khuida,

⁴⁸athum mashing khalāngbing chi ngatangkhui khavai Aaronshi vānaongarāli pheisā chi milu.”

⁴⁹Chithāda sāda Mosesna Levishili khalāng athumwui eina ngatangkhui khavai pheisā chi khuiya;

⁵⁰Israel mibingwui naochizaiwui pheisā shekel thingkha shākathum kala hangtharukta phangā, kathara shimwui shekel aman athishurda chi ana khui.

⁵¹Kala PROHOna Mosesli kakaso thāda, PROHOwui tui athishurda ana ngatang khavai pheisā chi khuida Aaron kala naomayarabingli mihaowa.