Read Tangkhul Naga MISHĀN 32 Bible Online

MISHĀN 32 - Tangkhul Naga bible

MISHĀN 32

¹Chitharan Reubenwui naomayara eina Gadwui naomayarabingwui sha̱kei sorngasaihaowa, kala Jazer eina Gilead ngalei seihomphung phālakra kaji athumna thei.

²Chieina Gad eina Reubenwui naomayarabingna Moses, pāngmon Eleazar kala Israel yarui ashangva̱wui kathānabingli rāda hānga,

³“Ataroth, Dibon, Jazer, Nimrah, Heshbon, Elealeh, Sebam, Nebo kala Beon,

⁴PROHOna Israel yarui ashangva̱wui mangāli shaothat kahai ngaleibing hi sha̱kei haikhavai phālakra; kaja narao ithumwui sha̱kei kachungkha lei.

⁵Kala athumna hānga, nathumwui mikyanli ithumli lukhamashan leiakha ngalei hi narao ithumwui shimlui sākhavai milu, ithumli Jordan makānkā ngasaklu.”

⁶Kha Mosesna Gadshi naomayarabing eina Reubenshi naomayarabingli hānga, “Nathumna hili kasaikha pamlaga nachinā ngarāna rai asārala?

⁷Israelwui mibingli PROHOna ngashit kahai ngalei akhuiki kaji hili khisāda ning suitā ngasakkhala?

⁸ Navā ngarāli ina Kadesh-barneawui eina ngalei chi ayang khavai kachiho tharan athumnala hithāda sai.

⁹Athumna Eshcol tampākli ayangda ngalei chi thei, PROHOna ngashit kahai ngalei chili mavāzang khavai Israelwui mibingli ning suitā ngasaka.

¹⁰ Kala PROHOna chithang malungkhavāt eina ana ngashitta hānga,

¹¹‘Kachangkhat eina Egyptwui eina kashoka mibing kum maga̱ eina thuida chiwui atung saikora, ina Abraham, Isaac kala Jacobli ngashit kahai ngalei chi athum matheimara, kaja athumna ili ningtongda shurchao majimana.

¹²Jephunnehwui naomayara Caleb eina Nunwui naomayara Joshua animāng zangra, kaja anina ili ningtongchaoda shura.’

¹³Hithāda PROHOna Israelli malungvāt kahaiwui vang, awui mangāli makaphā kasā mithot chi makānranglakha eina tangda zingkum hangmati lamhāngli zatkhangasakna.

¹⁴Kala yanglu, navā ngarāwui mahut, morei kaphungbingwui mithot nathum shokrali, hieina PROHOwui malungkhavāt chi Israelwuitungli mataimeida tāra!

¹⁵Kaja nathumna PROHOwui eina mai ngareithuihaiakha, ana nathumli lamhāngli horluihaora; kala mi saikora hi nathumna shimān ngasakluihaora.”

¹⁶Chieina athumna ali rānganaida hānga, “Ithumna hili yaoshim kala ithumwui naongarā pamkhavai keinung sākāra,

¹⁷kha ithum raisāri shaksāda Israel mibingwui rai mangāli ithum zatra kala ngalei chili athumli machipamranglakha eina tangda rai ngararra. Kala ithumwui naongarāli ngalei hiwui mina masāza̱ khavai raipan sākahai keinungli chipamhaisāra.

¹⁸Israelwui mibingna ngalei chili athumwui samphangrān masamphangranglakha eina tangda ithum mahanungmara.

¹⁹Khikhalajila Jordanwui lākhavāk kala kānkālaga athumli ngasoda ithum mapammara; kaja ithumwui shimlui Jordan makānkāla hivāk zingshoshong leikahaina.”

²⁰Mosesna athumli hānga, “Nathumna PROHOwui mangāli raisāri shaksāda rai vālakra jiakha,

²¹kala nathumwui raimi saikora Jordan kānkāda PROHOwui mangāli ana yangkashebingli ngalei chiwui eina athumli makashamshokranglakha eina tangda rai ngarara jiakha,

²²kala ngalei chi PROHOwui mangāli yuikhuihaiakha; PROHOli kala Israelli sāmikhangayi kuphaida nathumwui ngaleili hanungpaira; kala ngalei hi PROHOwui mangāli nathumwui ngasāhaora.

²³Kha nathumna hithāda masaakha, yanglu, nathumna PROHOli makhamayā morei sāhaira; kala nathumwui moreina nathumli phāshokra kaji theilu.

²⁴Nathumna naongarāwui vang keinung sālu kala yaobingwui vang yaoshim sālu, kala nathumna ngashit kahai chithāda sālu.”

²⁵Kala Gadwui naomayarabing eina Reubenwui naomayarabingna Mosesli hānga, “Ameina kakaso tākam eina narao ithumna sāra.

²⁶Ithumwui prei-naosan, yaoshang kala sha̱kei saikora Gilead keinung chili haisara;

²⁷kha ishāmeina kakaso thāda narao ithum makānda vāra, raisāri shaksāda raimi kachiva̱ PROHO mangāli rai sāra.”

²⁸ Chieina Mosesna pāngmon Eleazar eina Nunwui nao Joshua kala Israel shangwui shimkhur akhavābingli khangashit apong chili kasoda hānga,

²⁹“Kalikha Gadwui naomayarabing kala Reubenwui naomayarabingna PROHOwui mangāli raisāri shaksāda nathumli ngasoda Jordan kānlaga nathumwui mangāli khalei chi yuikhuimiakha, nathumna Gilead ngalei athumwui shimlui sākhavai mira.

³⁰Kha athumna raisāri sāda nathumli ngasoda makānrarakha, athum nathumli ngasoda Canaan ngaleili pampapamra.”

³¹Chieina Gadwui naomayarabing kala Reubenwui naomayarabingna ngahānkai, “PROHOna naraobingli kaso kahai chithāda ithum sāra.

³²Ithumna PROHOwui mangāli raisāri shaksāda kānlaga Canaanwui ngaleili zangra, kha ithumwui shimlui Jordan hivāk leira.”

³³Chieina Mosesna Gadwui naomayarabing eina Reubenwui naomayarabing kala Josephwui nao Manassehwui shang tangkhaili Amorwui awunga, Sihonwui wungram kala Bashanwui awunga, Ogwui wungram, keinungbing kala leiretbing eina ngasoda mihaowa.

³⁴Kala Gadwui naomayarabingna Dibon, Ataroth, Aroer,

³⁵Atroth-shopan, Jazer, Jogbehah,

³⁶Beth-nimrah, kala Beth-haran, hibing hili keinung sakāda raipan sākāhai, kala yaoshimla sākai.

³⁷Kala Reubenwui naomayarabingna Heshbon, Elealeh, Kiriathaim,

³⁸Nebo, Baal-meon (amingbing chi ngacheihaira) kala Sibmah hibing hili keinung sākai; kala athumna sakā kahai keinungbingwui ming ngateida phoka.

³⁹Kala Manassehwui nao Machirwui naomayarabingna Gilead akhuida chili leikasā Amornaoli kashamhaowa.

⁴⁰Kala Mosesna Manassehwui nao Machirli Gilead mida ana chili pamhaowa.

⁴¹Kala Manassehwui nao Jairna chiwui kha̱bing ayuikhui kala chili Havvoth-jair phokmi.

⁴²Kala Nobahna Kenath eina chiwui kha̱bing ayuikhui, kala ngalei chili awui ming Nobah phokmi.