Read Tangkhul Naga MISHĀN 6 Bible Online

MISHĀN 6 - Tangkhul Naga bible

MISHĀN 6

¹Kala PROHOna Mosesli hānga,

²“Israelwui mibingli hānglu, kachikathā mayarnao nilala sha̱nao nilala PROHOli Naziritewui tuingashit, khamataiya khangashit akha kasā tharan,

³ ana khorla kala maripkapaiya zamla khāmranu; drakhātheiwui eina surkakhui atheira̱; kala drakhāra̱ mamangpaimana, kala drakhāthei khanganao, lah akaola mashaipaimana.

⁴Awui ngashit kahai atam peida drakhārongwui eina samkaphang saikora athā, lah akor eina tangda mashaipaimana.

⁵“Awui ngashit kahai atam peida awui kuili kuisighai maparpaimana; PROHOli chigatchao kahai atam makupranglakha eina tangda a tharmathengra; kuisam phungda sāngsang ngasakra.

⁶“PROHOli chigatchao kahai, atam makupranglakha eina tangda a kathingunli mavānganaipaimara.

⁷Avāva̱ ranu, ava̱va̱ ranu, agato ranu, lah azarva̱ ranu, thihailala mavāpaimara; athumwui vang eina masāmakhaopaimana, kaja ava Vareli chigatchao kahai chi awui kuitungli khaleina.

⁸Awui chigatchao kahai atam peida ava PROHOwui mangāli katharana.

⁹“Kashuirak eina awui ngalemli kachikathā mi akha thihaida awui tharchigat kahai kuisam sākhamāng ngasakhaiakha, awui tharki kaji zimikshothang kui sira; kashinethang ana kui sitāra.

¹⁰Kachishatathang ana nāsha̱nao, lah kha̱na̱nao kazip khavai kachonshimwui khāmongli pangmonli khuirāmira,

¹¹kala suiham chigatwui vang akha kala rikkatā kachigatwui vang akha da pāngmon china chigatmira, kala awui vang chamnākhami sāra, kaja kathingun chiwui vang eina a morei sākahaina, chieina chithang awui kui tharchigatra,

¹²kala mi china PROHOli akhalatta chigatchaoda ngashit kahai atam peikhavai, khayon chigatwui vang kumkhawui yaovā akha khuirāra. Thuikahai atam mashānmimara, kaja awui chigat kahai sākhamānghaowa.

¹³ “Kala ain hi Naziritewui vangna, chigatchao kahai atam peichao kahai chitharan ali kazip khavai kachonshimwui khāmongli khuirāra.

¹⁴Kala ana PROHOli awui khami chi chigatra, kala rikkatā kachigatwui vang kumkha kākahai achuk kapei yaonao akha, kala suihamchigatwui vang kumkha kākahai achuk kapei yaova̱ akha, kala ningyatchigatwui vang kumkha kākahai achuk kapei yaovā akha,

¹⁵kala khawok makazang khamui luk akha, mathir eina thao manātlaga sākakhui khamui, kala thao neokahai katheng khamui, kala athumwui tharāzātchigat eina ra̱shakchigat chi PROHOli chigatra.

¹⁶“Kala pāngmon china chi PROHOwui mangāli khuivāda awui suihamchigat eina rikkatā kachigat chi chigatra,

¹⁷kala ana PROHOli yaovā chi khawok makazang khamui luk akha eina ngasoda ningyatchigat chigatra; tharāzāt kachigat eina chiwui ra̱shakchigatla chigatra.

¹⁸Kala Nazirite china awui tharchigat kahai kui chi kazip khavai kachonshimwui khāmongli sira, kala chigat kahai kuisam chi khuilaga ningyatchigat sākhavaiwui azingli khalei meili horsangra.

¹⁹“Kala pāngmon china hāngkahai yaovāwui asai, kala lukwui eina khawok makazang khamui akha, thao neokahai katheng khamui akha da khuilaga tharchigatta kui sitā kahaiwui thili Naziritepawui pāngli sangmira,

²⁰kala pāngmon china PROHOwui mangāli chi khayitta khayitchigatra; hi eina ngasoda khayitchigat kahai asuk eina chigat kahai khaishāng pāngmonwui kathara yarna; hiwui thili Naziritepa chi drakhāra̱ mangpaira.

²¹“Hi khangashit kasaa Naziritewui ainna. Nazirite akha sāda ana khangashit athishurda ana tuingashit kakhui athishurda PROHOli chigatranu, chithāda sāda ana Nazirite akha sākida chigatchao kahaiwui ain athishurda sāra.”

²²PROHOna Mosesli hānga,

²³Aaron eina awui naomayarabingli hānglu, nathum Israelwui mibingli hithāda somira: athumli nathumna hāngra.

²⁴PROHOna nathumli somiranu kala yangmiranu:

²⁵PROHOna awui mai nathumwui mangāli horngasakranu, kala nathumli lumashanmiranu.

²⁶PROHOna awui mai nathumli ngareirāmiranu, kala nathumli chingrihai ngasakranu.

²⁷“Chithāda sāda athumna iwui ming Israel mibingwuitungli haira, kala ina athumli somira.”