Read Tangkhul Naga MISHĀN 8 Bible Online

MISHĀN 8 - Tangkhul Naga bible

MISHĀN 8

¹ PROHOna Mosesli hānga,

²“Aaronli hānglu, nana thaomei chi shārkā kahai eina, thaomei shini china thaomeishong chiwui mangāli kahor mira.”

³Chieina Aaronna chithāda sai; PROHOna Mosesli kaso kahai thāda thaomeishong chiwui mangāli kahor mikhavai thaomeibing chi ana sharkai.

⁴Kala thaomeishong chi hithāda sai, apam eina thuilaga aphāng kashungda sinā eina shaokhui; aphei eina thuida thaomei kāshungda sinā eina shaokhui, PROHOna Mosesli chithei kahai maong tāzak eina ana thaomeishong chi sākhui.

⁵Kala PROHOna Mosesli hānga,

⁶ “Levinaobingli Israel mibingwui eina khuishokta athumli tharngasaklu.

⁷Kala nana athumli hithāda tharngasaklu: pheomi khavaiwui tara̱ chieina athumli kasirrorlu, chiwui thili phasā katonga kuisighai eina sitālu, kala kashankachon ngasa̱da athum khalatta tharngasaklu.

⁸Chiwui thili athumna mukkānao akha kala tharāzātchigatwui vang manaktak kahai mathir thao manātlaga khuirāranu, kala nana khangatei mukkānao akhala suiham chigatwui vang khuirāra.

⁹Kala nana Levinaobingli Israel ashangva̱na kazipta leilakha kazip khavai kachonshimli khuirāra.

¹⁰Nana Levinaobingli PROHOwui mangāli khuikharā chitharan Israelwui mibingna Levinaobingwuitungli pāng parra,

¹¹kala Aaronna Levinaobingli chi Israelwui khayitchigat sāda PROHOwui mangāli chigatra, chieina PROHOli chigatchaoda athumna otram ngatha̱paira.

¹²Chiwui thili Levinaobingna mukkā khani chiwui kuili pāng parra, kala nana akha chi suihamchigatwui vang kala akhapāna rikkatā kachigatwui vang PROHOli chigatra. Hi Levinaobingli pheomi khavaiwui vangna.

¹³“Kala nana Levinaobing chi Aaron eina awui naomayarabingwui azingli leingasakta athum chi khayitchigat sāda PROHOli chigatra.

¹⁴Hithāda sāda nana Levinaobingli Israel mibingwui eina ngatei ngasakra, kala Levinaobing iwui ngasāra.

¹⁵Kala nana athumli tharmida kala khayitchigat sāda chigat kahaiwui thili Levinaobingna kazip khavai kachonshimwui otram khangatha̱li zangpaira.

¹⁶Kaja athum Israel mibingwui eina ningtongda ili michao kahaina; naopam shokaphok Israelnaobingwui naochizaibing saikorawui mahut ina Levinaobingli ikhalattawui vang khuikahaina.

¹⁷ Kaja Israel mibingwui pharākhare saikora iwuina; mila, sha̱keila iwuisera; Egypt ngaleili pharākhare katonga sāthatthangwui eina thuida athumli ina ikhalattawui vang tharchigat kahaina,

¹⁸ kala ina Israel mibingwui naochizaibingwui mahut Levinaobingli kakhuina.

¹⁹Kala Levinaobingli Israel mibingwui eina Aaron eina awui naomayarabingli lemmet sāda ina mikahaina, kala athumna kazip khavai kachonshimli Israelnaobingwui vang otram ngatha̱ra, kala Israelnaobingwui vang pheomi khavai, chithāda sāda Israel mibingna katharapamli rākhanganai chitharan kalākashi mashokmara.”

²⁰Chithāda Moses, Aaron kala Israel ashangva̱na Mosesli PROHOna kaso kahai athishurda Levinaobingli chithāda sāmi.

²¹Kala Levinaobingna athum moreiwui eina athum khalatta sāmathākhui kala athumwui kashankachonbing ngasa̱sera; chieina Aaronna athumli khayitchigat sāda PROHOli chigata, kala Aaronna athum tharkhavai pheomi.

²²Chiwui vang Levinaobingna Aaron eina anaomayarabingwui azingli kazip khavai kachonshimwui otram angatha̱uwa. Levinaobingwui pongli PROHOna Mosesli kaso kahai chithāda athumna sai.

²³Kala PROHOna Mosesli hānga,

²⁴“Levinaobingna hithāda ot sāra; zingkum maga̱da phangā kāshung kahaiwui eina thuida chiwui atungbing, kazip khavai kachonshimwui otram khangatha̱li zangra;

²⁵kala zingkum hangphangā kākahai saikora otpamwui eina ngasāmhaora kala athum otram mangatha̱luimara.

²⁶Kha kazip khavai kachonshimli otram khangatha̱li achinā ngarāli ngachonpai, kala athum khalatta otphunli mazangpaimara. Hithāda nana Levinaobingli otngarutbing ngayarkhamili chithāda sāra.”