Read Tangkhul Naga MISHĀN 9 Bible Online

MISHĀN 9 - Tangkhul Naga bible

MISHĀN 9

¹ Israelnaobingna Egypt ngaleiwui eina shokta kum kakhanewui kachāng kharewui alungli PROHOna Mosesli Sinai lamhāngli hānga,

²“Israelwui mibingna langchin sākahai atam chili makānkhami phanit mayonra.

³Kachāng hiwui tharāda khamatethang ngazin, langchin sākahai atamli shiyan-chikan kala sharphahor mikahai athishurda nathumna mayonra.”

⁴Chieina Mosesna Israelwui mibingli makānkhami phanit mayon khavai hāngchithei.

⁵Chithāda athumna kachāng kharewui tharāda khamatethang ngazin Sinai lamhāngli makānkhami phanit mayona; PROHOna Mosesli kaso kahai saikora chiwui athishurda Israelwui mibingna sai.

⁶Chitharan kathingun saza̱haida, chithang makānkhami phanit mamayonkapai mi kaikha leisai; kala athumna chithang Moses eina Aaronwui mangāli rai;

⁷kala mibing china ali hānga, “Ithum kathingun saza̱da sāmakhaohaira; chiwui vang eina ithum Israelwui mibing khangateili ngasoda langchin sākahai zimiksholi PROHOli kachigat masārumpaimara kajila?”

⁸Mosesna athumli hānga, “Ngarailu, PROHOna nathumwui pongli ili khi hangnikhala.”

⁹PROHOna Mosesli hānga,

¹⁰Israelwui mibingli hānglu, kalikha nathum mi akhana, lah nathumwui ara̱-azāna kathingun saza̱da sāmakhaohaiakha, lah kha̱ram katāli leisaakha ana PROHOwui mangāli makānkhami phanit mayonra.

¹¹Kachāng kakhanewui tharāda khamatethang ngazin athumna mayonra; athumna khawok makazang khamui kala kakhā hannā eina ngasoda shaira.

¹² Ngathor eina tangda mataipaimara, ara̱kui akhala matek ngasakmara, athumna mayonki kaji makānkhami phanitwui ningkhami athishurda athumna mayonra.

¹³Kha mi akhana katharla thar, kha̱ramla mavālaga makānkhami phanit mamayonakha, ali awui miyurwui eina katathaora, kaja ana langchin sākahai zimiksholi PROHOli machigatmana; chieina awui morei akhalatta phungra.

¹⁴“Kala kachikathā kha̱mi akha nathumwui alungli ngasozatta, ana PROHOli makānkhami phanit mayonka jiakha, makānkhamiwui ain kala shiyan-chikanwui athishurda mayonranu; kha̱mi eina Israelnao khaniniwui shiyan-chikan ngaraichāra.”

¹⁵ Tabernacle khaningkāthang, ningkhami oko kachonshimwui tabernacle chi muiyāna ngapuikhamhaowa; kala chi ngazinshong tabernacletungli meizak thāda ngathor eina tangda hora.

¹⁶Chithāda ngashun muiyāna ngapuikhama, kala ngayā mei thāda leishona.

¹⁷Kala kachonshimtungwui eina muiyā chi lankā kahai tharan, Israelwui mibingna zatphoka, kala muiyāna khangasām apam chili Israelnaobingna rāmrah sāpama.

¹⁸PROHOna kakaso eina Israelnaobingna zatphoka, kala PROHOna kakaso eina athumna rāmrah sāpama; muiyāna tabernacleli fakhamda leilakha eina tangda athumna rāmrah chili ngasāmkhuida pama.

¹⁹Kalikha muiyāna tabernacletungli zimiksho sangda fakhamhailala athumna PROHOwui kakaso mayonda mazatphokmana.

²⁰Kachikathā atamli muiyā china khani kathumthang tabernacletungli leilala PROHOwui kakaso athishurda ngasāma; chiwui thili PROHOna kakaso athishurda zatphoka.

²¹Kachikathā atamli muiyā chi ngazin eina thuilaga ngathor eina tangda lei; kala muiyā chi ngathor lānkā kahai tharan athumna zatphoka; lah thangkha kala ngayā leifakha muiyā lānkakā tharan athumna zatphoka.

²²Khanithangranu kachāngkharanu, sangmeiranu tabernaclewuitungli muiyā mangatha̱la leilakha eina tangda Israelwui mibingna mazatphokla ngasāma; muiyā lānkā kahai tharan zatphoka.

²³PROHOwui kakaso eina athumna rāmrah sāpama, kala PROHOwui kakaso eina athumna zatphoka; PROHOna Mosesli hangkhangasak eina kakaso chi athumna mayona.