Read Tangkhul Naga MICAH 1 Bible Online

MICAH 1 - Tangkhul Naga bible

MICAH 1

¹ PROHOwui tui Moreshethwui Micahli, Jotham, Ahaz kala Hezekiahlongna Judahwui awunga sālaga Samaria eina Jerusalemwui pongli khamahā kachitheina.

² Nganālu, miyurbing, nathum zaikora; nganālu, O okathui, kala chiwui alungli khalei saikora; PROHOna awui kathara shim eina Proho VAREna nathumli makhamayāwui shākhi ngasāranu.

³Kaja yanglu, PROHOna awui apamwui eina shokrāda lei, kala ana tāda okathuiwui kajuipambing tānaikazamra.

⁴Kala phungreibingna awui azingli menghaora, tampākbing amaitaren ngasāhaora, khuira̱ mei ngalemli kahai thāda, tara̱ arapli heikatā thāhaora.

⁵Saikora hi Jacobwui khayonwui vang Israel shimkhurwui moreiwui vangna. Jacobwui khayonkhamāng chi khi? Chi Samaria maningmala? Kala Judah shimkhurwui morei khi? Chi Jerusalem maningmala?

⁶Chiwui vang eina ina Samariali shimān ngasakhailaga, khamasaili thingkhor lungkhor khor kahai thāngasakra, drakhāthei lingsang khavai ngasā ngasakra; kala awui lungguibing ina tampākli shireotāhaora, kala awui shimphungabing masai ngasakhaora.

⁷Awui meoma̱ saikora akha̱-akhā sāmihaora, khayorva̱̱bingwui eina samkaphang saikora mei eina thottāmihaora, kala awui meoma̱ saikora ina khikha masāvai ngasakmara; kaja khayorva̱̱ sāda khamasāwui eina meoma̱bing chi kazipkhui, kala chibing chi khayorva̱̱ khamasāli hanvāpapamra.

⁸Hiwui vang ina khananglāk eina chapngachāra; Ina raihokhailaga mahonghat eina zatra; ramfawui kakhong thāda chapngachāra; kala ostrichbing kakhong thāda chapra.

⁹Kaja awui khamā maraikapaiyana, kala chi Judahli rāshunghaira, chi iwui miyurwui ngaveili rāpeihaira, Jerusalemli raza̱haira.

¹⁰Chi Gathli mahāngalu, machaplakalu; Beth-le-aphrahli nathum chifali ngaleolu.

¹¹Nathumwui shongfali zatlu, Saphirli kapamabing, mahonghat eina, maishiri eina; Zaananli kapamabing mashokalu; Bethezelwui khanangda kachap china nganing khavaipam chi nathumwui eina khuithuihaora.

¹²Kaja Marothli kapambingna kaphā chili honchingching hondalei, kaja makaphā chi PROHOwui eina Jerusalem ngaveili rāhaira.

¹³Siguigari siguibing khalapshanhaolu, Lachishli kapamabing; Zionwui naongalāva̱li morei kasā haokaphok chi nathumna, kaja nathumwui alungli Israelwui khayonkhamāng chi samphanga.

¹⁴Chiwui vang eina nathumna Moresheth-gathli kapangwui lemmet mira; Achzibwui shimkhurbing Israel awungabingli mikhanam ngasāra.

¹⁵Ina nathumwuitungli khayuiya akha rāngasakra, Mareshahli kapama mibing; Israelwui tekhamatei chi Adullamli rāra.

¹⁶Nathum khalatta kui sikokhaolu, nathumwui leikashiya naomayarabingwui vang; khalāng sāsha thāda kui sikokhailu, kaja athum nathumwui eina raithāhaora.