Read Tangkhul Naga MICAH 2 Bible Online

MICAH 2 - Tangkhul Naga bible

MICAH 2

¹Makaphā-makhayā phākashoka kala mapivāla makaphā makhayā khangarān kasaa kala pettungli makaphā kaphaning athum kalākashi ngasāranu! Ngathor kharā eina athumna ot chi sai, kaja chi sākashap pangshap athumwuili lei.

²Athumna lui ngamara, kala ngapaikhui; shimla ngamarda khuithui haowa; athumna milila shimlila singkharenga, khalaleilila singkharenga.

³Chiwui vang PROHOna hithāda hānga: Yanglu, shimkhur hiwuitungli Ina makaphā shokkhavai khangarān sādaleiya, chiwui eina nathumwui akahung mangatha̱thukmara, kala nathum langsosor mazatmara, kaja chi makaphā atam ngasāra.

⁴Chithanghon athumna nathumli mana̱kashi laa sāra, kala wukkhananglak eina chapngachāra, kala hithāda hāngra, “Ithum shimānchao haira; ana iyurwui yar chi ngacheimi haira; kathāda ana iwui eina khuithuimihao khala! Ithumwui lui ithumli raikathābingli ngayarmihaira.”

⁵Chiwui vang eina PROHOwui yarui kazipli nawuivang kalā yangmikhavai khipākha maleisāmara.

⁶“Pao mahāshokalu” — da athumna tamchithei— “Khipānakha hikathā hi mahāshokpai mara; maikashi chi ithumli marāshung mara.”

⁷Hi hāngngayila, O Jacobwui shimkhur? PROHOwui Manglā chi majimirarthula? Hibing hi awui otsakla? Mashun eina kazata a chili iwui tuina khamathā masāmimala?

⁸Kha nathumna iwui miyurli yangkashe thāda ngasunga; chingrikahaibing, raiwui kaphaning maleila chihansa̱ zatta khaleibingwui kachon raitāmi hai.

⁹Iyur sha̱naobingli athumwui ringkaphā shim eina kashamshokhai, athumwui naoshinaobingwui eina iwui tekhamatei nathumna khuithuichao haira.

¹⁰Ngakarthuida zatlu, kaja hi ngasām khavai pam maningmana; makatharwui vang zakshilāk eina shimān khangasakwui vang.

¹¹Mi akhana masitui kala kakapik tui matuida, “Ina nathumli drakhāra̱ eina zamwui pao hashokra” da hāngshang hangtāakha, a miyur hiwui pao hākashokana.

¹²O Jacob, Ina kachangkhat nathum saikorali kazipkhuira. Ina Israelwui shākkahai chi manākhuira; yaoshangwui yaonao thāda; yaohomphungli khalei yao thāda, ngarungningkahai Ina mi saikora kazipkhuira.

¹³Raipan shokhame china mangāli zatra; athumna sakhailaga ngavei kānzangra, chieina shokluira. Athumwui awunga PROHOna mangāli rida zatra,