Read Tangkhul Naga MICAH 3 Bible Online

MICAH 3 - Tangkhul Naga bible

MICAH 3

¹Kala ina hānga; Nganālu, Jacobwui akhavābing kala Israelwui shimkhur khamungabing! Mashun kathei hi nathumwui vang maningmala?

²Kaphāli ningkachailaga makaphāli leikashe nathum, iwui mibingwui ahui laishokkhamebing; kala athumwui aphi ara̱kuiwui eina hemkakhuibing;

³Iwui mibingwui aphi kashaibing, kala athumwui ahui khalaibing, kala athumwui ara̱kui sākakazambing, sā thada sāhamli katatkasangbing, kala sā thāda hampaili kahangbing.

⁴Chiwui thili athumna PROHOli chapta vaora, kha ana athumli mangahānkāmara; chitharan ana athumwui eina mai ngareithuihaora, kaja athumna athumwui otsak zakshi ngasakhaowa.

⁵Iwui mibingli thanngui kahaia marānbingwui pongli PROHOna hithāda hānga, athumna zākhavai kateokha leiakha, “Mashithaosa” ji, kha athumwui khamorli khikha masangkhamebingli rai sāra jihaowa.

⁶Chithāda nathumwui vang khamahā makhalei ngayā ngasāra, maphongkhami khangami ngasāra. Zimikna marānbingwui vang tunhaora, kala ngashunla athumwuitungli tangmangra;

⁷marānbing maishihaora, khanongbing khayakhaora; athum saikora khamor kafahaora, kaja Varewui ngahānkākhami maleithuwa.

⁸Kha ichanga pangshapna pemtinghai, PROHOwui Manglā eina, kala mashun eina kala yāng eina, Jacobli awui khayonkhamāng kala Israelli awui morei phongmi khavai.

⁹Hi nganālu, Jacobwui shimkhurwui akhavābing, kala Israel shimkhurwui khamungabing, mashunli ningkakachaibing, khamashungli masho khangasakbing,

¹⁰ashee eina Zion kala khayon eina Jerusalem sākakābing.

¹¹Chiwui akhavābingna pheizāwui vang bichar sai, pāngmonbingna aman khuida tamchithei, marānbingna pheisāwui vang phonga; chithālala athumna PROHOli chihānda hānga, “PROHO ithumwui ngachaili maleimala? Ithumwuitungli makaphā marāmara.”

¹² Chiwui vang eina, nathumwui vang eina Zionli lui kasao thāda saora; Jerusalem katek-kakai khorkahai thāra, kala khorumshimwui kaphung chila ngahong kashā ngasāhaora.