Read Tangkhul Naga MICAH 4 Bible Online

MICAH 4 - Tangkhul Naga bible

MICAH 4

¹ Naoda hithāda shokra kaja PROHOwui shimwui phungrei chi phungrei saikorawuitungli juimeithuida sakāra, phungrābingli juimei ngasakra; kala mibingna chili longsangra.

²Kala yur kachungkha rāda hāngra; “Rālu, ithum PROHOwui phungreili kausa, Jacobwui Varewui shimli; chieina ana ithumli awui shongfa hāngchitheira; kala ithumna awui apongli zatkhavai.” Kaja Zionwui eina ain shokra, kala PROHOwui tui Jerusalemwui eina shokra.

³ Ana miyur kachungkhawuitungli bichar sāra; kala tālak eina khalei kapanga yurbingli tuitak tāmira; kala athumna athumwui raighai chi tin sākhuira, kala athumwui kazei sikao sākhuira, yurna yurwuitungli raighai makhāngmara, athumna rai kasā kaho matamluimara.

⁴ Kha mi kachiva̱ kachichāwui drakhārong kala khaorārongwui azingli pamra, kala khinakha athumli mangachee ngasakmara; kaja saikorawui PROHOna hānghaira.

⁵Kaja miyur saikorana kachichāwui varewui mingli khorumra, kha ithumva ithumwui Vare PROHOwui mingli katang mavaila zatra.

⁶Chithanghon phei katekbing kala kasham kahaibing kala ina khanang ngasak kahaibingli ina kazipkhuira da PROHOna hānga;

⁷kala phei katekbingli ina shākkahai ngasā ngasakra; kala horkahaibingli kapanga yur akha ngasā ngasakra; kala Zion Kaphungli PROHOna athumwuitungli arui eina thuida katang mavaila mungra.

⁸Kala na, O yaoshangwui ngashānphung, Zion nao ngalāva̱wui phungrā, nali hithāda shokra kharewui wungpam chi hanmira, Jerusalemwui nao ngalāva̱wui wungpam chi.

⁹Arui khisāda panglāk eina chapkhala? Nawui alungli awunga maleimala? Nawui machinme shimānhaida naokhara̱ preiva̱̱ thāda ringkhangāla?

¹⁰Preinao akhana naokhara̱ thāda, ngaleolu kala ringngālu O Zionwui naongalāva̱; na ara konungwui eina shokhaora, kala ram khamasaili pānra; na Babylonli vāra. Chili nali kankhuira, chili nali PROHOna ngatangkhuira, nawui yangkashebingwui pāng eina.

¹¹Arui nali makhamayā yur kachungkha kaziplaga hānga, “A makhaohaoranu, kala Zionli ithumwui mikna ngashānranu.”

¹²Kha athumna PROHOwui kaphaning matheimana, athumna awui khangarān matheimana, kaja ana lanpumli māvām kazip kahai thāda athumli kazipkhuihaira.

¹³Thuingapolu, O Zionwui naongalāva̱, kaja ina nawui angaji mari ngasā ngasakra, kala nawui pheimareng pithrai ngasā ngasakra; nana yur kachungkhali ngaphitkazamra, kala athumwui tongkakhui chi PROHOli mira. Athumwui lan chi okathui saikorawui PROHOli mira.