Read Tangkhul Naga MICAH 7 Bible Online

MICAH 7 - Tangkhul Naga bible

MICAH 7

¹I kalākashi! kaja I lumkachāngwui athei phākhui kahai, drakhāthei arong eina phākhuiser kahai thāda: amazān akha eina tangda shaikhavai maleithura, iningna shaikhangai minkhare khaorātheila maleithura.

²Vare katheia mi okathuiwui eina shimānhaira, kala mashun eina kasā mi khipākha maleithura; athum saikora asheewui vang rimpama, kala mi kachiva̱ khailan singlaga achināli kharoma.

³Makaphāwui vang athumna themlāk eina sai; wungnao eina bichar kasaana pheizā poi, kala khangama mi china awui makaphā sākhangai chi hāngzata, hithāda athumna otsakruma.

⁴Athumwui ngachaili phāmeikap kaje chiya phanāng kathāna, mashungmeikap kajena ka̱shāt kathāna. Athumli yangki kaji kala athumli tandi miki kaji atam rāhaira, ara athum pa̱ngapāki kaji nganaihaira.

⁵Khongnainaoli machihānalu, ngasotnaoli mashitsangalu; preiva̱li kahāng eina tangda mahangphāphālu;

⁶ kaja anaomayarana avāva̱li ningkachai, anao ngalāva̱na ava̱va̱li ngaruka arihāva̱na aniva̱li chithāpapama, yangkashe chiya a khalatta awui shimkhurwui mipapama.

⁷Kha ichanga, iva PROHOli yangtha̱ra, Iwui huikhame Vareli ngaraitha̱ra; iwui Varena ili shāmira.

⁸O iwui yangkashe, iwuitungli mamathānalu; ina kongluilala ngakarthuiluira; Ina tangkhamangli kapam tharan, PROHOna iwui kahor ngasāra.

⁹PROHOwui malungkhavāt chi Ina phungra. Kaja ina awui mangāli morei sāhaira, ana iwui vang maphayatmiranglakha, kala tuitak matāmiranglakha eina tangda phungra. Ana ili kahorli khuishokmira; awui ngatangkhami chi ina theira.

¹⁰Chiwui thili iwui yangkashena theira, kala “Nawui Vare PROHO kali leikhala?” da kahāngpāva̱ khayāmalāra. Imikna ali yanggazira kala chānreiwui chifa thāda naikazamra.

¹¹Nawui raipan sākakā zimik rārāda lei! chithang nawui thari kachungkha mataisangra.

¹²Chithanghon Assyriawui eina Egypt, Egyptwui eina Kong, shamadruwui eina shamadru kala phungreiwui eina phungrei, chiwui alungli khalei athumna nawuili rāra.

¹³Kha okathui hi mibingwui vang eina, kala athumwui otsakwui vang eina ramcho sāhaora.

¹⁴Ngahong thingpheili ngachakyāng eina khalei, nawui yaobingli khāmshui singda hommilu; achālakhawui thāda athumli Bashan eina Gileadli phazāranu.

¹⁵Egypt ngaleiwui eina nathumna shokthang thāda, Ina athumli matakhak kahai ot sāchitheira.

¹⁶Yurbingna chi theida athumwui pangshap saikorawui vang khayakhaora; athumna athumwui pāng khamor kafara; athumwui khanā ngakhokhaora;

¹⁷athumna phara̱ thāda chifa malekra, ngawokazata yur thāda; athumwui raipanwui eina kathirriri shokra, kala PROHO ithumwui Vareli athumna ngacheerangrang latungra, kala nawui vang eina athum ngacheera.

¹⁸Khayonkhamāng pheokhami na kathā Vare khipā lei? awui shimluikat shākkahaiwui vang salāng kahaili chihokhami khipā lei? Ana katang mavaila awui malungkhavāt makaziphaimana kaja makhangachei leikashili awui ringkaphā lei.

¹⁹Ana ithumwuitungli lumashanluishitra, ithumwui khayonkhamāng phei eina naishanhaora. Nana ithumwui morei saikora kathuka shamadruli horsanghaora.

²⁰Achālakha nana ishāvā ngarāli ngashitkhami thāda, nana Jacobli ningkatong kala Abrahamli leikashi chi chitheira.