Read Tangkhul Naga NAHUM 2 Bible Online

NAHUM 2 - Tangkhul Naga bible

NAHUM 2

¹Sakakathāna china nali rāngasunghaira. Raishaophungli mi hailu; shongfa yangkazaklu; nawui shānneira̱ neikhuilu; nawui yāng katonga kazipkhuilu.

²(Israelwui khangamkharei tākam eina PROHOna Jacobwui khangamkharei hanmidalei, kaja khangaponbingna athumli kashankachon raimihaira kala athumwui aphāng sākazamihaira).

³Awui rai kapingbingwui chāngvei hunga, awui raimibing hungshi kahai eina sāri sai. Siguigaribing ngaherda kakazip tharan meiwon thāda phik-phik ngasheiya; — raikhokabingna raichak sai.

⁴Sigui garibingna chānreili lar-lar zata, athumna kayāng-khareili yongshang yongtā sai; athumna zingrān thāda hāna, rikhān khangashei thāda pharvai.

⁵Athumwui akhavābingli hokhuisera, athumna kongluimamānda zata, athumna katotsisi raipanli vai, kuinamkhuida nganinghaowa.

⁶Kongwui ngaveibing shohaira, awunga keinung kaiyānghaira;

⁷chiwui philava̱wui kashankachon raimihaida, ali khuithuihaowa, awui rao sha̱naobingna chapngachai, malung kapheda nāsha̱ thāda chapa.

⁸Nineveh hiya tara̱ longthui kahai ra̱khong kathāna, “Nganinglu! Nganinglu!” da athumna vaowa; kha khipānakha mangareiungmana.

⁹Lupā chi ngaponlu, sinā chi ngapaikhuilu! lupāchum kala aman kasasaka lan kakān mavaimana.

¹⁰Ramcho! achoro ngasāhao! ning thenghao, khuksao kathira, akashān tongda ngasheihao, amai saikora thengchenghaowa!

¹¹Kazingkha̱ khur kali lei, anaoli khikhana sheikakhaut maleila, kazingkha̱na awui sāshai khuiungmi khavai akhur chi?

¹²Kazingkha̱na anaongarāwui vang shapkha tukmihaira, kala kazingkha̱va̱wui vang kachungkha shimetthatmihaira; ana awui akhur chi sāshaina chipema, awui shim asāna pema.

¹³Yanglu, ina nali mamayāmana da saikorawui PROHOna hānga, awui siguigaribing ina meikhutwui alungli chuitā ngasakra kala nawui kazingkha̱naobing raighai shaira; nawui sāshai chi ina okathuiwui eina katatmihaora kala nawui paomebingwui akhon mashāluimara.