Read Tangkhul Naga ZEPHANIAH 2 Bible Online

ZEPHANIAH 2 - Tangkhul Naga bible

ZEPHANIAH 2

¹Rālu, rākazipserlu, O kakhayak makathei yur,

²phanthui kahai māhik thāda nathumli makashamranglakha, PROHOwui sākashi malungkhavāt chi nathumwuitungli matāranglakha PROHOwui malungkathuiwui zimiksho nathumwuitungli matāranglakha.

³PROHOli phālu, ngalei hiwui malungkhanimbing, awui kahāng khanganābing; khamashung khangarong phālu, kala ngahuiri kahai phākhuilu; PROHOwui malungkathui zimiksholi nathumli thummihaipai.

⁴ Khikhalajila Gaza ramcho ngasāhaora; Ashdodwui mibingli ngashunshong kashamshokhaora, kala Ekronli angayung eina phurhaora.

⁵Yireipheili kapama, Chereth yur nathum kakhanang ngasāranu! PROHOwui tui china nathumli mamayāmana, O Canaan, Philistinenaowui ngalei; nathum akhala mashāklakla shimān ngasakra.

⁶Kala O shamadrupheiwui ngalei, na yaohomphung ngasāhaora, yaokahombingwui seizat katimpam ngasāhaora, kala yaoshangwui shim ngasāhaora.

⁷Shamadrupheiwui ngalei chi Judahshi shāk kahaibingwui shimlui ngasāhaora, chili athumna yao hompamra, kala Ashkelonwui shimli athumna ngazinshong ungngasāmkhuira. Kaja Vare PROHOna athumwui vang phaningmida athumwui shimlui hanmira.

⁸ “Moabnaona khamashāt kala Ammonnaona mana̱kashi athumna iwui mibingli kathāda mana̱shi kala athumwui ngaleili matheikhamiwui pongli ina shāhaira.

⁹ Chiwui vang Moab eina Ammonnaobing Sodom eina Gomarrah thāhaora, akhar mashokkapai ka̱shātmāng kaji kala machi kotkhavai, makānkhanā lam ngasāchanghaora, iwui shāk kahai mibingna athumli ngaponra, kala iwui yurwui thishāk kahaibingna chili pānra,” da saikorawui PROHO, Israelwui Vare ina kahāngna.

¹⁰Hi athumwui langkasowui atheina, khikhalajila athumna saikorawui PROHOwui miyurli mautshitla mana̱shi.

¹¹PROHOna athumli sāshilak eina sāra; mha, okathuili khalei varebing saikorali ana khumngasakra; kala yur kachiva̱na kachichāpamwui eina ali khoruma.

¹² O Ethiopiawui mibing, nathumlila iwui raighai eina yortāra.

¹³ Kala ana atungshongwuitungli mamayāmada pāng khāngkāra, kala Assyria sākazamhaora; kala ana Nineveh ramcho sāngasakra, siwuk thāda thengchenghaora.

¹⁴Seishang eina luiwukwui sāyur saikorana chiwui alungthungli ngaleovaira, chiwui keinungli ngaleihok eina khalāng sāsha pemra; pawungna charfali khongra, hangkhāna lamzanli khongra; kaja awui cedarthing eina kasā ot saikora masaikonghaora.

¹⁵Hi nganongrei kahai leikhayā keinung akhana, akhalatta, “Ilaka, ili lāngda khangatei maleiluimana” da kahānga china. Ramcho kathāda ngasāhao, sāyurbingwui pikhavai ngasāhaira! Ali rākhamakāna mi kachiva̱na kasirora, kala pangkhum heimachita.