Read Tangkhul Naga ZECHARIAH 1 Bible Online

ZECHARIAH 1 - Tangkhul Naga bible

ZECHARIAH 1

¹ Dariusna mungda kum kakhanewui kachāng kachishatali Iddowui naomayara Berechiahna kapharā Zechariah marānli PROHOwui tui rāhānga.

²“PROHOna navā ngarāli malungvātlakhaira.

³Chiwui vang eina athumli hānglu, saikorawui PROHOna hithāda hānga: ‘Ili latunglu, da saikorawui PROHOna hānga, chithākha inala nathumli latungra, da saikorawui PROHOna hānga.

⁴Marān kharebingna, ‘saikorawui PROHOna hithāda hānga, Nathumwui makaphā shongfa kala makaphā otsakwui eina latunghaolu, da machin kahai navā ngarāwui thāda masālu.’ Kha athumna mashāmana kala manganāsangmana, da PROHOna hānga.

⁵Navā ngarā, athum kali leili? Kala marānbing, athum ringchingda leila?

⁶Kha iwui rao marānbingli ina kakaso iwui tui kala iwui shiyan china navāngarāli mayuimala? Chieina athumna ningngateida hānga, ithumwui shongfa kala ithumwui saki kaji chiwui vang saikorawui PROHOna ngarān kahai thāda, chi tākam eina ungshung ngasaka.’”

⁷Dariusna mungda kum kakhanewui Tharao (Shebat) kachāng tharāda kharewui zimiksho maga̱da khamatethang PROHOwui tui chi Iddowui naomayara Berechiahwui nao marān Zechariahli rai, kala Zechariahna hānga,

⁸ Ina ngayāshong, mi akhana sigui kahunga akha tongkazat thei! A tampāk akhali myrtle thingwui ngachaili nganingsai; kala akhanukli kahunga, hungreoseo kala kachara siguibing leisai.

⁹Chieina ina hānga, “Hibing hi khikhala, PROHO?” Ili khangazeka kazingrao china ili hānga, “Chibing chi khikhala kaji ina nali chitheira.

¹⁰Chieina myrtle thing ngachaili khanganinga mi china ngahānkai, hibing hi okathuili kuimareida yangzat khavai PROHOna chihokharāna.”

¹¹Kala myrtlething ngachaili nganingda khalei PROHOwui kazingrao chili athumna ngahānkai, “Ithumna okathuili kuimareida yanghaira, kala yanglu, okathui katonga chingri eina ngasāmdalei.”

¹²Chieina PROHOwui kazingrao china hānga, “O saikorawui PROHO, nana zingkum hangshini malungvātrā kahai Jerusalem eina Judahwui keinungli atam karankha malumashanmimarakhala?”

¹³Kala ili khangazeka kazingrao chili PROHOna lukhamashan kala ningkhaluma tui eina ngahānkai.

¹⁴Chieina ili khangazeka kazingrao china ili hānga; vaolu, Hithāda saikorawui PROHOna hānga: “Ina Jerusalem eina Zionwui vang mikpaishilaka.

¹⁵Kala lekngasaisor eina pamda khalei yurbingli malungvāthaira; khikhalajila ina iwui yurli malungmavātngaiga jiakha athumna kalākashi chi mataisang ngasaka.

¹⁶Chiwui vang eina PROHOna hithāda hānga, Ina Jerusalemli lumashanda latunghaira; iwui shim chili sakāhaora, da saikorawui PROHOna hānga, kala tamkhavai khara̱ chi Jerusalemwuitungli rānhaora.”

¹⁷Yaruili vaoluishitlu, da saikorawui PROHOna hānga: “Iwui keinungbing nganantāp eina okthuiluishitra; PROHOna Zionli ringpha ngasakluishitra kala Jerusalemli kapangkhuiluishitra.”

¹⁸Kala ina mik yangkakā eina, yanglu mukvāngaji mati thei!

¹⁹Kala ili khangazeka kazingrao chili, “Mibing hi khikhala?” da khangahān eina ana hānga, “Hibing hi Judah, Israel kala Jerusalemli ngapha̱yānghai khangasaka angaji china.”

²⁰Chiwui thili PROHOna ili marikasā mi mati chithei.

²¹Kala ina hānga, “Athum khi rākasākhala?” Ana ngahānkai, “Hibing hina Judah sākathānmihaida, mi khipākhana kui machongkākapai, angajibing china; athumli ngachee khavai hili kharāna, Judahwui ngalei sākathānmihailaga hiwui mibingli ngapha̱yāng khangasaka yurbingwui angajibing sātek khavai rākahaina.”