Read Tangkhul Naga ZECHARIAH 11 Bible Online

ZECHARIAH 11 - Tangkhul Naga bible

ZECHARIAH 11

¹Nawui khāmong sholu, O Lebanon, nawui cedarthing mei chuikhavai!

²Sifalu, O cypress, kaja cedarthing tekhaira; kaja tekhamatei thingrong arema sāserhaira. Sifalu, Bashanwui shirimthing, kaja ngahong kashāshā wuthaira.

³Nganālu, yaokahomabingwui kachapkhon, kaja athumwui seihomphung chuikhup tāhaira, kazingkha̱wui kakhangang nganālu; kaja Jordanwui ngahong sāshimānhaira.

⁴Iwui Vare PROHOna hithāda hānga: “Taithat khavai yao ashangvawui kahoma ngasālu.

⁵Athumli khalobing china taithāta khikha tandi mamimana; kala athumli khayorbingna ‘PROHOli solu, I shānghaira’ da hānga, kala athumli kahomabingna athumli lukhamashan maleimana.”

⁶“Kaja ngalei hili okathuibingli ina malumashanluimara, da PROHOna hānga. Yanglu, mi kachiva̱ kachichāwui yaokahoma kala kachichāwui awungawui pāngli pitā ngasakra; kala athumna ngalei hi sākazamra, kala ina athumwui pāng eina makanmimara.”

⁷Chieina I leihkhalon athumwui vang sāthatki kaje yaobingli kahoma ngasāhaira. Kala ina khāmshui khani khuiya; akhale aming Lukhamashan hoi kala akhapale Khokkha hoi. Kala ina yaobingli homa.

⁸Kachāngkhawui alungli ina yaokahoma kathum shimān ngasaka. Kha ina athumli maja̱mirarthuwa, kala athumnala ili yangkharinghaowa.

⁹Chiwui vang eina “I nathumwui yaokahoma masāmara. Thiki kaje chi thihaoranu; shimānhaoki kaje chi shimānhaoranu; kala kataibing china akha eina akha shaingarokhaoranu,” da ina hānga.

¹⁰Kala Lukhamashan kaho iwui khāmshui chi ina khui kala chi ina sātekhaowa, ina saikorali tuingashit sākahai chi arema sāngasaka.

¹¹Chithang eina thuida arema sāhaowa, kala yao leihkhalonbingna ili yanglaga hi PROHOwui tuina da thei.

¹² Chieina ina athumli hānga, “Nathumnala mashunga da phaningakha iwui ngalangman milu; maningakha thāhaolu.” Kala athumna iwui ngalangman lupāsā shekel thumra shānmi.

¹³Chieina PROHOna ili hānga, “Chi lupāchumli sanghaolu”— athumna ili pāngtonglak eina khami chi. Chieina ina lupāsā shekel thumrā chi khuilaga PROHOwui shimwui lupāchumli sanghaowa.

¹⁴Chiwui thili iwui khāmshui kakhane “Khokkha”, chi sāteka, Judah eina Israelwui ngachaili chinaongarāwui khamashit chi sāshimitmihaowa.

¹⁵Chieina PROHOna ili hānga, “Makankhanā yaokahomawui khutlai akhashida singluilu.

¹⁶Kaja yanglu, kashimānbingwui vang ning makakharika, ma̱kazatbingli maphākhuikhame, sheikasha̱abingli mayangkhame, kazāt makhaleibingli mangakuikhame, kha asā kakā kapangshaida akhomareng eina tangda serkakazama yaokahoma akha ina shokngasakra.”

¹⁷“Makānkhanā iwui yaokahoma, yao chipen kahai, nali kakhanang ngasāranu! Awui pāngthei kala yāmikla raighai eina shātranu! Apang tongda thihaoranu, awui yāmik ngapeochanghaoranu.”