Read Tangkhul Naga ZECHARIAH 12 Bible Online

ZECHARIAH 12 - Tangkhul Naga bible

ZECHARIAH 12

¹Israelwui pongli PROHOna kahāngna: Kazingram phayaikashoka, okathui rungkhame kala mili manglā semsangkhame PROHOna hithāda hānga:

²“Yanglu, ina Jerusalem hi kuikhamareili khalei miyurbingwui vang khamalipa tengkot ngasā ngasakra; athumna Jerusalem khuida kuikhanam tharan Judahlila khuihaora.

³Chithanghon Jerusalem miyur saikorawui vang ina kharita lunggui sāngasakra; chi kakhānga saikora zakshilāk eina khalatta khamā sāza̱khuira. Kala okathuiwui miyur saikorana rāda ali ngararra.

⁴PROHOna hānga, chithang ina sigui kachiva̱li khangachee ning zangngasakra, kala katongbingli pāngasakra. Kha ina miyurbingwui siguimik ngapeo khangasak tharan Judahwuitungli iwui mik rakta yangmira.

⁵Chiwui thili Judahwui shangnaobingna athum khalatta hāngra, ‘Athumwui Vare, saikorawui PROHOwui mangā eina Jerusalemnaobingna pangshap samphanga.’

⁶“Chithang Judahwui shangnaoli ina ngahongkashā kachuiwui meiwon thāda, māvāmbingwui ngachaili meilā kashār kathā sāngasakra; kala athumna uivāk yāvāk kuimareida khalei miyurbingli mutngasakra; kha Jerusalemli Jerusalemnaobing leipapamra.

⁷“Kala PROHOna Judahwui shimkhurli maikhayā rida mira, chieina David shimkhurwui tekhamatei kala Jerusalemli pamda khaleibingwui tekhamatei china Judahwuili majuimeimara.

⁸Chithanghon PROHOna Jerusalemli kapamabingli chāngvei akha eina ngākmira, kala athumwui ngachaili ngazanmeithuikaje china David thāhaora, kala Davidwui shimkhurna Vare thāda athumwuitungli khalei kazingraobing thāhaora.

⁹Kala chithanghon Jerusalemli khangarara yur saikorali ina shimān khavai phāra.

¹⁰ “Davidwui shimkhurli kala Jerusalemli kapamabingli ina lumashankathei eina seihā sākatheiwui manglā heirormira, chieina athumna rungthat kahaiapā chili khayang tharan athumna naoho-naotongli chapkhangachā thāda chapngachāra, kala naochizai thikahai thāda ningchotlak eina chapra.

¹¹Chithanghon Jerusalemli chapkhangachā chi Megiddo tampākli Hadad-rimmonli chapngachārei kahai thāra.

¹²Apam chili chapngachāra, shimkhur kachiva̱ kachichāshi chapngachāra; Davidwui shimkhurna ashi khalatta chapngachāra; kala apreiva̱̱ ngarāna athum khalatta chapngachāra; Nathanwui shimkhurna ashi khalatta chapngachāra; kala athum preiva̱̱ ngarāna khalatta chapngachāra,

¹³Levi shimkhurna ashi khalatta chapngachāra kala athum preiva̱̱ ngarāna athum khalatta chapngachāra; Shime-ishi shimkhurna ashi khalatta chapngachāra, kala athum preiva̱̱ ngarāna athum khalatta chapngachāra;

¹⁴kala shimkhur khangatateila kachichāshi khalatta chapngachāra, kala athum preiva̱̱ ngarāna athum khalatta chapngachāra.