Read Tangkhul Naga ZECHARIAH 3 Bible Online

ZECHARIAH 3 - Tangkhul Naga bible

ZECHARIAH 3

¹ Chiwui thili pāngmon kharei Joshua PROHOwui kazingraowui mangāli nganingda khalei ili chithei kala Satanna ali khayon phenkhavai awui yāshong nganingsai.

² Kala PROHOna Satanli hānga, “PROHOna nali hangkhamachinna, O Satan! Jerusalem kapangkakhuia PROHO china hangkhamachinna; hi mei chuida khalei eina sutkakhui meira̱hun maningmala?”

³Chitharan Joshuana makhaotot kahai kashankachon ngavailaga kazingrao chiwui mangāli nganingsai.

⁴Kala kazingrao china awui mangāli khanganingbing chili hānga, “Makhaotot kahai kashankachon chi awui eina khuimihaolu.” Kala ali hānga, “Yanglu, ina nawui khayonkhamāng khuithuimihaora kala nali aman kasaka kashankachon ngavaimira.”

⁵Kala ina hānga, “Awui kuili tharzā kahai kuitei akha teimi ngasaklu.” Chieina athumna awui kuili tharzā kahai kuitei akha teimi; kala PROHOwui kazingrao chiwui ngalemli nganingsai.

⁶Kala PROHOwui kazingrao china Joshuali kasoda hānga,

⁷Saikorawui PROHOna hithāda hānga: “Nana iwui shongpongli zatakha kala iwui kakaso mayonakha, nana iwui shimli mungra, kala iwui karotwui otsin singra, kala hili khaleibingwui ngachaili zangkhavai nali mayāmira.

⁸ Ara nganālu, O pāngmon kharei Joshua, nala kala nali ngasokapama nawui ngasotnaobingla, kaja athum khamathā machutkakhuiwui misera: yanglu, iwui rao Aphāng chi ina khuirāra.

⁹Kaja yanglu, ina Joshuawui mangāli shunmi kahai lungguitungli, lunggui akhawui lungmai shini khalei chili, tui chi kapisanghaora da saikorawui PROHOna hānga kala ngalei hiwui khayon chi thangkhawui alungli khuishokmihaora.

¹⁰ Chithang nathum kachiva̱na kachichāwui khongnainaoli ngahotta drakhārong kala khaorārongpheili pamngarumra,” da saikorawui PROHOna hānga.