Read Tangkhul Naga ZECHARIAH 4 Bible Online

ZECHARIAH 4 - Tangkhul Naga bible

ZECHARIAH 4

¹Kala ili khangazeka kazingrao china rāluishitta ili, mi akhana pida leilakha mathotkakhui thāda rāmathota.

²Kala ana “Nana khi theikhala?” da ili ngahāna. Ina hānga, “Ina thaomeishong sinā kachanga eina kasā akha thei, chiwui atungli khongsai akha lei, kala chiwui atungli akhamor shini kakā thaomei shini khalei chi thei.

³ Kala chiwui ngalemli oliverong khani lei, akhana khongsai chiwui yāvāk, akhana uivāk lei.”

⁴Kala ili khangazeka kazingrao chili ina hānga, “Iwui amei, hibing hi khikhala?”

⁵Chieina ili khangazeka kazingrao china ngahānkai, “Hibing hi khikhala na theila?” Ina hānga, “Matheimana, iwui amei.”

⁶ Chiwui thili ana ili hānga, “Hi PROHOna Zerubbabelli kahāng tuina: yāng einala maningma, pangshap einala maningmana, kha iwui Manglā eina kasāna, da saikorawui PROHOna hānga.

⁷O kahaka phungrei na khikhala? Zerubbabelwui mangāli na tampāk sāhaora; kala juimeikap kaje lunggui chi ana ‘Lukhamashan, lukhamashan’ da vaolaga khuirāra.”

⁸Chili lāngda PROHOwui tui chi ili hithāda rāhānga,

⁹“Zerubbabelwui pāng eina shim hiwui shimphunga sakāhaira; awui pāng eina shim hi kakupla sākupra. Chieina saikorawui PROHOna ili nawuili chihokharāna kaji nana theira.

¹⁰ Khikhalajila kachikathāna kateowa otwui vang ngalang shivāmakha ringphāra, kala Zerubbabelwui pāngli tamkhavai ngalung kasing theira. Shini hi okathui hupta yangkhavai PROHOwui mikna.”

¹¹ Chieina ina ali hānga, “Thaomeishong hiwui uiui-yāyā oliverong khani khalei hi khikhala?”

¹²Kala kakhane sāda ina ngahānlui, “Thaora̱ heishok khavai sinā lengkhor khaniwui ngalemli khalei oliverongwui aphāng khani chi khikhala?”

¹³Ana ili hānga, “Hi khikhala kaji na matheimala?” Ina hānga “Matheimana, iwui amei.”

¹⁴Chieina ana hānga, “Hi okathui saikorawui PROHOwui ngalemli khanganinga thao neomi kahaia khani china.”