Read Tangkhul Naga ZECHARIAH 5 Bible Online

ZECHARIAH 5 - Tangkhul Naga bible

ZECHARIAH 5

¹Ina yangkāluishit kaji eina, yanglu, yongkazata lairik akhalui akha thei;

²Kala ana ili hānga, “Na khi theikhala?” Ina ngahānkai, “Ina yongkazata lairik khalui akha thei; chiwui asān khuining maga̱ya kala aret khuining tharāya.”

³Chiwui thili ana ili hānga, “Hi ngalei katongawuitungli khavā khonkashi china; hiwui thili khalei mi kachiva̱li hiwui athishurda katathaora, kala minamda shākhi kasā mi kachiva̱li hiwui athishurda katathaora.

⁴Ina hi chihovāra, da saikorawui PROHOna hānga, kala china khalewui shimli kala minamda shākhi kasā awui shimli zangda shim chili khalei thingla lungguila chuitāhaora.”

⁵Chiwui thili ili khangazeka kazingrao chi rālaga ili hānga, “Namik kapeikālu, kala kashok chi khikhala da yanglu.”

⁶Kala ina “Chi khikhala?” da ngahāna; chieina ana hānga, “Hi zatta khalei tamkhavai khuiluina.” Kala ana hānga, “Hi apam kachiva̱li khalei athumwui khayonkhamāng china.”

⁷Kala yanglu, mishiwui asham chi kaphut eina sha̱nao akha khuilui chiwui alungli pamsai.

⁸Kala ana hānga, “Hi Makaphā makhayā kaho china.” Kala sha̱nao chi khuilui chili tuksangluilaga mishiwui asham chieina shingkhamhaowa.

⁹Chiwui thili ina yangkakā eina yanglu, sha̱nao khani rākharā chi thei! Aniwui angachāngli masi zanga; aniwui angachāng chi varokwui angachāng thai, kala anina khuilui chi kazingram eina okathuiwui angachaili khāngkai.

¹⁰Chieina ili khangazeka kazingrao chili, “Ani khuilui chi kali khuivāki kajikhala?” da ina ngahāna.

¹¹Ana ili hānga, “Shinar ngaleili khuivāda hiwui vang shim akha sāra; kala chi ngarānkup kahai eina anina khuilui chi apam chili runghaora.”