Read Tangkhul Naga ZECHARIAH 6 Bible Online

ZECHARIAH 6 - Tangkhul Naga bible

ZECHARIAH 6

¹ Kala ina yangkāluishitta thei, kala yanglu, kaphung khaniwui ngachai eina siguigari mati shoka; kala kaphungbing chi pithraiwui kaphungna.

² Khare gari chiwui siguibing chi hunga, kakhanewui siguibing chi zika,

³ kakathuma siguibing chara, kala khamate siguibing hotla machu chukpoma.

⁴Chieina ili khangazeka kazingrao chili “Hibing hi khikhala, iwui amei?” da ina ngahāna.

⁵ Chieina kazingrao china ili ngahānkai, “Hibing hi okathui saikorawui PROHOwui mangāli vānganing kahaiwui thili kazingramwui masi matili vaukida kazatna.”

⁶Sigui kazikbingna kashimena gari chi atungshong shangra, sigui kacharbingna kashimena china zingtunshong vāra, kala hotla machu kachuka siguibing china azingshong tāra.

⁷Siguibing china kashok eina, athumna okathui kuivākhangaina kasaikha mapampaithuwa. Kala ana, “Zatlu, okathuili kuivālu” da kahāng eina athumna okathuili kuivai.

⁸Chiwui thili ana ili panglāk eina hānga, “Yanglu, atungshong shangkahaibing china apam chili iwui Manglā chingrihai ngasakhaira.”

⁹Kala PROHOna ili hānga:

¹⁰“Babylonwui eina rākahaiya raithā kahaibingwui eina Heldai, Tobijah kala Jedaiah athumli khuilu; kala chithang Zephaniahwui naomayara Josiahwui shimli vālu.

¹¹Athumwui eina lupāsā kala sinā khuilaga kuihon akha sākhuida Jehozadakwui naomayara pāngmon kharei Joshuali ngahonmilu;

¹² kala ali hānglu, saikorawui PROHOna hānga, ‘Aphang kaho mi chili yanglu: kaja ana awui pamli reisangra, kala ana PROHOwui Khorumshim sakāra.

¹³PROHOwui khorumshim sakāki kaji chi ana, a khayākālakra, kala awui pamkhongli pamda khamungla mungra. Kala awui wungpamkhong ngalemli pāngmon akha leira, kala ani chingri tāchamhai ngarokra.’

¹⁴Kala kuihon chi Heldai, Tobijah, Jedaiah kala Zephaniahwui naomayara Josiahli phaningung khavai PROHOwui khorumshimli haira.”

¹⁵Kala apam katāva̱li khaleibingna PROHOwui Khorumshim chi rāsākāngachonra; chitharan ili saikorawui PROHOna chihokharāna kaji nathumna theikhuira. Nathumwui Vare PROHOwui kahāng chi ningkachang eina nganaakha hi shokki kajina.