Read Tangkhul Naga ZECHARIAH 8 Bible Online

ZECHARIAH 8 - Tangkhul Naga bible

ZECHARIAH 8

¹Kala saikorawui PROHOwui tui chi ili rāhānga,

²“Saikorawui PROHOna hithāda hānga; Ina Zionli hakmahālak eina shivāma, kala ina kashivāmwui vang malungvātlakhaowa.

³PROHOna hithāda hānga: Ina Zionli latungra, kala Jerusalemwui alungli pamra, kala Jerusalemli ningkatong keinung kala saikorawui PROHOwui kathara kaphung hohaora.

⁴Ashangva̱wui PROHOna hithāda hānga: Kasarala, kasarva̱la, khāmshui singriplaga Jerusalemwui chānreili thot thotwui vang pamluishitra.

⁵Kala keinung chiwui chānrei kachida naoshinao mayarnaola sha̱naola ngareokhanganao pemtinghaora.”

⁶Saikorawui PROHOna hithāda hānga: “Atam hitharan, hi shākkahaibingwui vang matakhakhaowa da, china iwui vangla matakhakhaora kajilā da saikorawui PROHOna hānga.

⁷Saikorawui PROHOna hithāda hānga; Yanglu, zingsho zingtun ram kachida khalei iwui miyurli ina huimira;

⁸kala Jerusalemwui alungli ina athumli ungsom ngasakra; kala ningtongda khamashung khangarong eina athum iwui mi sāra, ina athumwui Vare sāra.”

⁹Saikorawui PROHOna hithāda hānga: “Saikorawui PROHOwui shimphunga ngalung hamkaphok eina thuilaga marānbingwui khamor eina kashā samkaphang nathum khorumshim chi sākāshap khavai nathumwui pāng yāng kāngasaklu,

¹⁰kaja khare kachāng miwuila, sha̱keiwuila ngalangman maleisāmana, khaung khavāli yangkashibingwui eina ningtāphup kahai maleisāmana. Khikhalajila ina mi kachiva̱li akha eina akha yangshi ngarok ngasaka.

¹¹Kha ara, shākkahai mibing hili ridawui thāda masāluimara da saikorawui PROHOna hānga.

¹²Kaja chingri eina yaosangra; drakhārongna athei matheira, ngaleina kashakazā chungmei mira, kazingna ikra̱ tāmira, kala ina saikora hi shākkahai mibingli khuingasakra.

¹³Kala nathum yurbingwui khonshi khavai sākasā chi, O Judah eina Israel shimkhur, ina nathumli huikhuira kala nathum somi kahaia ngasāra. Mangacheealu kha nathumwui pāng pangngasaklu.”

¹⁴Kaja saikorawui PROHOna hithāda hānga: “Navāngarāna ili malungvāt khavai kasā tharan ina nathumli makaphā sākhavai ngarānhailaga ning manemkatā thāda,

¹⁵latluida ina Jerusalem eina Judahli kaphā sami khavai khangarān sāhaira; mangacheealu.

¹⁶ Nathumna saki kaji otbing chi hina; Nathum akha eina akha khamashung tui matui ngaroklu, nathumwui ngaveibingli khamashunga bichar samida chingrihai khavai sālu,

¹⁷nathumwui wuklungli akha eina akha makaphā sākhavai mamachukphāphaalu; minama shākhi kasā malung machāngalu, khikhalajila hikathā saikora hi ina ningkachai,” da PROHOna hānga.

¹⁸Kala saikorawui PROHOwui tui chi ili rāhānga,

¹⁹“Ashangva̱wui PROHOna hithāda hānga: Kachāng khamatewui kakhum, kala kaphangāwui kakhum, kala kashinewui kakhum, kala katharāwui kakhum chi, Judah shimkhurwui vang ringkaphā, khamathān kala ningngai khamathāwui zātkhān sāra; chiwui vang eina khamashung kala chingri kahaili leishilu.”

²⁰“Saikorawui PROHOna hithāda hānga: Mi rāfara, keinung khangateiwui einala kachungkha rāra;

²¹keinung akhawui mina keinung akhali vāda hāngra, ‘Ithumna thākta PROHOwui lukhamashan chi aposa kala saikorawui PROHOwuili aphākhuisa; I vaura.’

²²Miyur kachungkha kala kapanga yur kachungkhana saikorawui PROHOli samphang khavai Jerusalemli pharāra, kala PROHOwui lukhamashan pora.

²³Ashangva̱wui PROHOna hithāda hānga: Chitharan atui-arā khangatei yurbingwui mi tharāna Jehudi akhawui kachon rāsāza̱laga, ‘Ithum nali ngasovāga; kaja Varena nathumli ngasomi kaji ithum shāhaira,’ da hāngra.”