Read Tangkhul Naga ZECHARIAH 9 Bible Online

ZECHARIAH 9 - Tangkhul Naga bible

ZECHARIAH 9

¹ PROHOwui tui china Hadrach ngaleili mamayāmana, Damascuswuitungli ngasāmra. Kaja Aramwui keinung saikora, Israel shang saikorala, PROHOwuisera.

²Chili thari sāda khalei Hamathla thangmeilala Tyre eina Sidonla zanga.

³Tyrena raikānphung akha sakāhaira, kala lupāsā chifa thāda, sināla shongfawui chifa-chihā ngayāda kazipkhui.

⁴Kha yanglu, PROHOna awui khalei ngapaikhuihaora, kala awui lan shamadruli horsanghaora, kala ali mei eina shimān ngasakra.

⁵ Ashkelonna chi theira, kala ngacheera, Gazala chotta reorangra; Ekronla kachihān maungshungmada chithāra. Awungana Gazawui eina shimānhaora. Ashkelonli mi masomluimara.

⁶Khamānga yurna Ashdodli pānra; kala Philistiawui lāngkaso chi ina ngalat ngasakra.

⁷Mashaikhangayi kashakazā kala ashee kazanga asā athumna mashailuimara, shākkahai mi saikora Varewui ngasāra, Judahwui shang kathā ngasāra, kala Ekronna Jebusnao kathā thāra.

⁸Chiwui thili iwui shimli ina kashina sāda pamra, chithāda khipānakha mashok mazangpaimara; singkakharengana athumli khikha masāthukmara, kaja ina imik eina theihaira.

⁹ Ringphālu, O Zionwui naongalāva̱! Pangda vaolu, O Jerusalemwui naongalāva̱! Yanglu, nawui awunga gadhā alānao akhali tongda nawuili rārāli; maikhayā kala khayuiya chi alaka,

¹⁰ Ephraimwui eina siguigari, kala Jerusalemwui eina raisigui ina katathaora. Kala ngararphungwui malā chi katathaida, ana yurbingli chingrihai khavai kasora; Shamadruwui eina thuilaga shamadru vāshungda, Kong chiwui eina thuilaga okathui akatanga eina tangda ana mungra.

¹¹ Nawui vangla, ashee eina ini tuingashit sākahaiwui vang, tara̱ makhalei chomwui eina nawui tuknar kahaibingli ina chihomira.

¹²Nawui raipanli latunglu, O kachihān khalei phātopnaobing; khanishida mataida hanmira da aja ina hāngtā kahaina.

¹³Kaja Judahli ina malā thāda hunhaira; Ephraimli chiwui malāthing sāngasakhaira. Ina nawui naomayarabingli khayitra, O Zion, nanao mayarabingwuitungli O Greece, kala nali raimi akhawui khutlai thāda singtitra.

¹⁴Chiwui thili PROHOna athumli rāchitheira, kala awui malāthing rikhān thāda vāra; Proho VAREna talla̱ khongra, kala azingshongwui sur kakhaningwui ngachaili muivāra.

¹⁵Saikorawui PROHOna athumli makānmira, kala athumna lunggui eina kahorbingli tukkhuilaga naitāhaora; kala athumwui ashee drakhāra̱ khamang thāda mangra, tengkot kapem thāda pemtinghaora, hanphutwui achikunbing thāda ya̱sophaora.

¹⁶Chithang PROHO athumwui Varena athumli huikhuira; kaja athum awui yaoshangwui mibing kathāna; kala kuihonwui muktā thāda awui ngaleili horngasakra.

¹⁷Mha, chi kayākha phā, kayākha mathāra! Mayar ngalābingli theishirai kala kadhara drakhātheina pangsang ngasakra, kala mayā ngasakra.