Read Tangkhul Naga MALACHI 1 Bible Online

MALACHI 1 - Tangkhul Naga bible

MALACHI 1

¹Malachina Israelli PROHOwui tui marānkhami.

² “Ina nathumli leishiya” da PROHOna hānga, kha nathumna, “Nana ithumli kathāda leishihairakhala?” da hānga. “Esau hi Jacobwui achinā maningmala?” da PROHOna hānga. “Chithālala ina Jacobli leishi,

³kha ina Esauli ningkachai; ina awui shimlui chi khikha masākhavai kaphung sāngasakmi kala awui shimlui chi lamhāngli kazata ramfali mihaowa.”

⁴Kalikha Edomna, “Ithumli sākhayānghaira, kha sākhayāng kahai chi ithumna sakāluishitra” da hāngakha, saikorawui PROHOna hānga “Athumna sākālapai, kha PROHOna katang mavaila malungkhavāta yur, makaphā makhayā ram da mahoranglakha eina tangda ina sākhaira.”

⁵Nathum khalattawui mikna hi theira, kala nathumna, “Israelwui thari kanvāda PROHO chi Reikhamataina” da hāngra.

⁶“Naomayarana avāva̱li khayāshi, kala raona akhavāli khayāshi. Chithākha, I avāva̱ akhana jilaga ili khayākashi kali leili? Kala I akhavā akhana jiakha ili khangachee kali leikhala? da saikorawui PROHOna awui mingli yangkakharinga, pāngmonbing, nathumli kahāngna. Nathumna hānga, Ithumna nawui mingli kathāda yangkharinghaokhala?

⁷Khamakhao kashakazā eina iwui hanphutli pha̱ya. Laga nathumna ithumna chi kathāda makhao ngasakhala? da hānga. Chi kaphaning eina PROHOwui table yangkharingpai.

⁸ Nathumna pha̱kaphayāli khangapeo sāyur kachigat chi makaphā maningmala? Kala pheikatek, kakazā kachigat chi makaphā maningmala? Chi nathumwui lammungali miyanglu; ana nathumli penrala, kala lumashanmingairala?” da saikorawui PROHOna hānga.

⁹Ara Varewui lukhamashan polu, chieina ana ithumli lumashanmipaira. Nathumwui hikathā kachigat hieina ana nathumli lumashanmipairala? da saikorawui PROHOna hānga.

¹⁰Iwui hanphutpamli aremawui vang mei mathot khavai nathumwui ngachaili khāmong shungmi khavai mi akhamangla leisasi kaja chong! Ina nathumli ringkaphā maleimana, kala nathumwui pāng eina kachigat akhala makhuisangmara da saikorawui PROHOna hānga.

¹¹Khikhalajila zimik kashok eina thuilaga katun eina tangda yurbingwui ngachaili iwui ming hakkhamahāna, kala apam kachida nganamkaphā thao chi iwui mingli chigata, kala kathara kachigat mi; khikhalajila yurbingwui ngachaili iwui ming hakkhamahāna da saikorawui PROHOna hānga.

¹²Kha nathumna PROHOwui table chi makatharana kala chiwui kashakazā chi horhaipai da kahāng eina makhao ngasaka.

¹³“Hi kayākha kachot ot khala” da nathumna hānga, kala ili khamor chipita da saikorawui PROHOna hānga. Nathumna ngapaikakhui lah pheikatek, kakazā chi khuirai, kala chi chigat khavai khuirai. Chi ina khuisangmirala? da PROHOna hānga.

¹⁴Kakapika, awui yaoshangli yaovā akha khalei chi thumhailaga achukmakapei chi PROHOli kachigata mipa chili khonkashi ngasāranu, kaja I kahaka Awunga akhana, kala yurbingwui ngachaili iwui mingli ngacheesera, da saikorawui PROHOna hānga.