Read Tangkhul Naga MALACHI 3 Bible Online

MALACHI 3 - Tangkhul Naga bible

MALACHI 3

¹ Yanglu, iwui vang shongfa khangarān sākhavai iwui paome rida chiholi, kala nathumna phāda khalei PROHO chi kashuirak eina awui khorumshimli rāra; nathumna ningyāngkhaunga tuingashitwui paome chi, yanglu, a rārāli, da saikorawui PROHOna hānga.

² Kha ana kharā zimiksho chili khipāna khāngshaprakhala, kala a kharā tharan khipāna nganingshapra? Kaja a hiya sharkha̱wui mei kathāna, kala kachon khangasa̱wui sāpon kathāna;

³ana marisā kala lupāsā khalanga thāda pamra, kala ana Leviwui naomayarali samathākhuira, kala athumna PROHOli khamashung kachigat chi mamiranglakha eina tangda sinā kala lupāsā khalang thāda la̱ngra.

⁴Chiwui thili Judah eina Jerusalemwui kachigat chi achālakhawui kala kharekumwui thāda PROHOna penra.

⁵“Chiwui thili nathumli bichar sākhavai ina rānganaira; ina sha̱ khangasobing, shām kasābing, kapikta shākhi kasābing, ngalangman mamila singkakharengbing, marānao, ra̱meinaoli malukhamashanbing, kha̱ram kazatabingli kakashambing kala ili makhangacheebingwuitungli mashun shākhi mira da saikorawui PROHOna hānga.

⁶“Kaja iya makhangachei PROHOna; chiwui vang eina Jacobwui naomayarabing, nashi makashimāna.

⁷Nawo ngarāwui eina thuilaga nathumna iwui ningkhami mamayonla shiyan chikanwui eina mai ngareithuihaira, ili latunglu, chieina ina nathumli latungra, da saikorawui PROHOna hānga. Kha nathumna, ‘Ithumna kathāda latungrakhala?’ da hānga.

⁸Mikumona Vareli ngaponpaila? Kha nathumna ili ngaponkhuida lei. Laga nathumna ithumna nawui eina kathāda ngaponkhuikhala? ji. Nathumwui tithe kala kachigat khamilina.

⁹Nathumli khonshāt akha khonshihaira, kachiwui vangkhala kaja nashi yur katongana ili ngaponda lei,

¹⁰ kazip khavai shimli tithe peida khuirālu, chieina iwui shimli zākhavai kashakazā leisāra; kala chili ili chāng yanglu, da saikorawui PROHOna hānga; kala kazingramwui charfa shoda nathumwuitungli sokhami pemtha̱-pemtaida maheirorminikhala da yangnaolu.

¹¹Nathumwui heiun shimān khangasaka chili ina machinda nathumwui luiwui theishirai masākazamara, kala luiwui drakhārongna athei makhamathei mavaimara da saikorawui PROHOna hānga.

¹²Chieina yur saikorana nathumli somi kahaia yurna da hora, kaja nathum ringkaphā ngalei ngasāra, da saikorawui PROHOna hānga.

¹³“Nathum iwuitungli zakkashi tui matuihaira,” da saikorawui PROHOna hānga. “Laga nathumna, ‘Ithumna nawuitungli kathāda matuihairakhala?’ ji.

¹⁴Nathumna hānga, ‘Vareli otram khangatha̱ makānāmana. Awui kakaso khamayon kala saikorawui PROHOwui mangāli chapkhangachā thāda kazatwui kaphā khi leikhala?

¹⁵Arui eina thuilaga ithumna langkasoli sokhame jira; makaphākasaana ringkaphāmang maningla Vareli chāng yanglala kalākashi maleimana da khuira.’”

¹⁶Chiwui thili PROHOli khangacheebing akha eina akha hāngngaroka; PROHOna athumwui tui khuisangmi kala shāmi, PROHOli khangacheea kala awui mingli kaphaningabingli phaning ungkhavai awui mangāli lairik akha kapi.

¹⁷“Athum iwui ngasāra, kala ina ot kasā tharan iwui shimlui ngasāra, kala mi akhana ali otram ngatha̱khame anaomayarali yangkhami thāda inala athumli yangmira, da saikorawui PROHOna hānga.

¹⁸Chiwui thili akhashida nathumna khamashung khangarong eina makaphā makhayā, Vareli otram khangatha̱ eina makhangatha̱ mibingwui khangatei nathumna theikhuira.