Read Tangkhul Naga MALACHI 4 Bible Online

MALACHI 4 - Tangkhul Naga bible

MALACHI 4

¹“Kaja yanglu, sharkha̱ thāda kachuiya zimiksho akha rāra; chithang lāngkaso kala makaphā kasābing lanji thāhaora; rārāda khalei zimiksho china chibing chuikhuphaida angayungla, aphāngla mashākmimara da saikorawui PROHOna hānga.

²Kha iwui mingli khangacheea nathumwui vanga kazāt raikhavai angachāng kakā khamashung khangarongwui zimik akha shokra. Seinaona seishimwui eina ngalongkashok thāda nathumna ngalongkāra.

³Nathumna makaphā makhayābingli naishānra, kaja ina thuingatha̱thang athum nathumwui pheimayāzingli khalei hotla ngasāhaora da saikorawui PROHOna hānga.

⁴“Iwui rao Moseswui ain, Israel ashangva̱ wui vang Horebli ali ningmi kahai, shiyan chikan kala ainbing chi phaningunglu.

⁵ “Yanglu, PROHOwui kahaka kala khangacheea zimiksho chi marāranglakha ina marān Elijahli chihorāra.

⁶ Kala ana avāva̱ ngarāwui ning chi anao ngarāwuili ngareivā ngasakra, kala anaongarāwui ning avāva̱ ngarāwuili ngareiung ngasakra, maningakha ina rāda ngalei chili khonkashi eina sāshimānhaipaishina.”