Read Tangkhul Naga MATTHEW 1 Bible Online

MATTHEW 1 - Tangkhul Naga bible

MATTHEW 1

¹ Hi David kala Abrahamwui Naomayara Jishu Khristawui mi-un lairikna.

²Abrahamna Isaacli, Isaacna Jacobli, Jacobna Judah kala achinā ngarāli pharai.

³ Judah preiva̱ Tamarna Perez eina Zerahli, Perezna Hezronli, Hezronna Ramli pharai.

⁴Ramna Amminadabli, Amminadabna Nashonli, Nahshonna Salmonli pharai.

⁵Salmon preiva̱ Rahabna Boazli, Boaz preiva̱ Rutna Obedli, Obedna Jesseli pharai.

⁶Jessena David awungali, Davidwui nao Solomonli Uriahwui preiva̱ sākasāva̱na pharai.

⁷Solomonna Rehobomli, Rehobomna Abijahli, Abijahna Asali pharai.

⁸Asana Jehoshaphatli, Jehoshaphatna Joramli, Joramna Uzziahli pharai.

⁹Uzziahna Jothamli, Jothamna Ahazli, Ahazna Hezekiahli pharai.

¹⁰Hezekiahna Manassehli, Manassehna Amonli, Amonna Josiahli pharai.

¹¹ Babylonli khuikhavā atamli Josiahna Jechoniah eina achinā ngarāli pharai.

¹²Babylonli khuivā kahaiwui thili Jechoniahna Shealtielli, Shealtielna Zerubbabelli pharai.

¹³Zerubbabelna Abiudli, Abiudna Eliakimli, Eliakimna Azorli pharai.

¹⁴Azorna Zodokli, Zodokna Achimli, Achimna Eliudli pharai.

¹⁵Eliudna Eleazarli, Eleazarna Matthanli, Mathanna Jacobli pharai.

¹⁶Kala Jacobna Messiah kaho Jishuwui ava̱ Maryli kakhuiya Josepli pharai.

¹⁷Hithada sāda Abrahamwui eina thuilaga David tāshungda saikora chi mithot tharāda matina, kala Davidwui eina haophoklaga Babylonli khuikhavā tāshungda mithot tharāda matina kala Babylonli khuikhavā eina haophoklaga Messiah kapharā tāshungda mithot tharāda matina.

¹⁸ Jishu Khristali kapharā chi hithada shoka. Ashava̱ Mary Josephli khāmhaisai, kha ani mangakumranglakha Manglā Katharawui pangshap eina ali nao vaingasakhaira kaji theihaowa.

¹⁹Agahara Joseph mashun mi ngasāhaoda Maryli makhayak ngasakngaithuda ngathumsāda ali pānghaorada khangarān sai.

²⁰Kha ana hiwui pongli machukta leilakha, yanglu, Prohowui kazingrao akhana awui mangshongli rāhānga, “Davidwui naomayara, Joseph, napreiva̱ Maryli khuikida mangacheealu, kaja ana vaida khalei chi Manglā Katharawui pangshap einana.

²¹ Ana naomayara akha pharāra, nana awui ming Jishu phokra, kaja ana awui mibingli athumwui moreiwui eina huikhuira.”

²²Prohona marānwui khamor eina matui kahai chi ungshung khavai saikora hi rākashokna.

²³ “Yanglu, mafakathui sha̱nao akhana nao vaida mayarnao akha pharāra, kala awui ming Emmanuel phokra” (hiwui kakhalata Varena ithumli ngasomi) kajina.

²⁴Chiwui thili Josephna kapiwui eina ngakarthuilaga Prohowui kazingrao china ali sāluda hāngkhami athishurda Maryli ngakumhaowa.

²⁵ Kha apreiva̱na nao chi mapharāranglakha eina tangda ali phasā mangasomana kala nao chiwui aming Jishu phokmi.