Read Tangkhul Naga MATTHEW 10 Bible Online

MATTHEW 10 - Tangkhul Naga bible

MATTHEW 10

¹Jishuna awui sākhangatha̱ tharāda khani chili hokhui kala makathar manglā kashamshok khavai kala kazātyur ayāyāva̱ kala kazāt saikora raimi khavai pangshap mi.

²Paokazat tharāda khaniwui amingbing chi hina, kharena, Peterla kaho Simon, kala agato Andrew; Zebedeewui naomayara James eina agato John;

³Philip eina Bartholomew; Thomas eina khāshinā khaloka Matthew; Alphaeuswui naomayara James kala Thaddaeus;

⁴yurli leikashe Simon kala Jishuli yankasaia Judas Iscariot.

⁵ Jishuna tharāda khani chili ningmida shivāta: “Gentilebingwuili mavālu, kala Samarianaowui keinungli mazangalu,

⁶ kha shimān kahai Israel shimkhurwui yaonaobing chili vātha̱lu.

⁷ Kala nathumna khavāvāli pao hāshokta ‘Kazing wungram chi nganaihaira’ da hānglu.

⁸Kakazābingli raimilu, kathebingli ringngasaklu, phārrei kakazābingli tharmilu, kameobing kashamshokmilu. Nathumna aman mamila samkaphangna, chithada aman makhuila milu.

⁹ Nathumwui lupākhaoli sināla, lupāla, pheisāla makhuiphungalu.

¹⁰ Nathumwui kha̱ram khavāli paidula, phahon khanila, pheihopla, khāmshuila makhuiphungalu; kaja ot kasā mi china awui kashakazā samphang ngayia.

¹¹“Nathumna keinungli nilala, kha̱li nilala akazang apam chili khipāli zunngayikhala kaji phākhuilu kala chiwui eina mazatranglakha eina tangda nathum ashiwuili pamlu.

¹²Nathumna shim chili vāzangkhaleoda sālamtui ahānglu.

¹³Shimkhur china mareojeohaiakha nathumwui sokhami chi ashiwui vang ngasāranu. Kha chi mathaakha nathumwui sokhami chi nathumli latungranu.

¹⁴ Kala nathumli khipānakha marāzang ngasakngaiakha kala nathumwui tui manganāsangmiakha, shim lah keinung chiwui eina zatkathui tharan nathumwui pheiwui chifa chi kathangtāhailu.

¹⁵ Ina nathumli kachangkhat kahāngna, bichar sāthanghon Sodom eina Gomarrahwui mibingli bichar kasāliva chikathā keinungwui mibingli bichar kasāna sakmeira.

¹⁶ “Nganālu! Ina nathumli ramfawui ngachaili yao thada kachihona. Chiwui vang eina nathumna phara̱wui thada themlu kala nāsha̱wui khanim thada nimlu.

¹⁷ Mibingli ngasharlak eina yanglu, kaja nathumli athumna hanga̱shimli hokāra kala athumwui synagogueli sājei eina ngaphitra,

¹⁸ khamungabing, awungabing kala Gentilebingwui mangāli iwui mingli shākhi sākhavai nathumli khamungabing kala awungabingwui mangāli shimenvāra.

¹⁹Nathumli tukkhavā tharan kathada matuira lah khi hangra kajiwui vang malungmaringalu; kaja nathumna khi matuirakhala kaji chi pung chichang chili nathumli hāngmira.

²⁰ Kaja matuiki kaji chi na maningmana, kha nathumwui Avāwui Manglāna nali matui ngasakki kajina.

²¹ “Achināna achināli, avāva̱na anaogarāli shaothat khavai khuivāmira. Anao ngarāna ava̱ avāli mamayāmada athumli shaothat ngasakra.

²² I wui vang eina nathumli mi saikorana yangkharingra. Kha khanao eina tangda khāngkashapa china kahui samphangra.

²³ Athumna nathumli keinung akhali rekakharek chitharan khangatei akhali yāmvālu; kaja Ina nathumli kachangkhat eina kahāngna, miwui Naomayarana marāranglakha eina tangda nathumna Israel keinung saikorali sākikaji ot masākuprangsāra.

²⁴ “Sākhangatha̱ khipākhana awui ojāli mareimeimana lah arao khipākhana awui akhavāli mareimeimana.

²⁵ Sākhangatha̱ china awui ojāwui thada kala araona awui akhavāwui thada ningli kapen chi shapa. Athumna shimva̱ chili Beelzebul hoakha shimkhurwui mi kateibingli kayākha zakshimeikharda horakhala?

²⁶ “Chiwui vang eina athumli mangacheealu; kaja maphongshokmara da faror kahai khikha maleimana, lah matheiki kaji ngathum kahai khikha maleimana.

²⁷Ina nathumli tangkhamangli kahāng chi phongshar eina kahorli hānglu kala nathumna shākhui kahai chi shimtung eina vaomalāntālu.

²⁸ Phasāli sāthatshaplaga manglāli masāthatkharar athumli mangacheealu. Kha kazeiramli phasā eina manglā khanini sāshimānmikashapa Vareli ngacheelu.

²⁹Konghi khanili pheisā akha eina mayormalā? Chithālala nathumwui Avāwui kaphaning mazangla konghi akhala ngaleili matātungmana.

³⁰Kha nathumliva nathumwui kuisam eina tangda shānhaida khaleina.

³¹ Chiwui vang eina mangacheealu, konghi kachungkhali nathum aman sakmeikhara.

³² “Kachikathāna ili mibingwui mangāli phongshar eina mayaakha kazingramli khalei iwui Avāwui mangāli inala ali mayāmira;

³³kha ili mibingwui mangāli kahata chili inala kazingramli khalei iwui Avāwui mangāli ali hatra.

³⁴ “Ina okathuili chingri kahai khuirā khavai kharāna da maphaningalu; I chingri kahai maningla raighai khuirā khavai kharāna.

³⁵Kaja anaomayarana avāva̱li kala anaongalāva̱na ava̱va̱li, arihāva̱na aniva̱li mamayā ngarok khavai kharāna;

³⁶kala mi akhawui yangshimeikap kaje chi shimkhurwui mi ngasāra.

³⁷ “Ili lāngmeida ava̱ lah avāli leishikhameia a chi iwui vang makanāmana; kala ili lāngmeida anaomayara, lah anaongalāva̱li leishikhamei a chila iwui vang makanāmana;

³⁸kachikathāna awui krush makhuiphungla iwui thishurakha a iwui vang makanāmana.

³⁹Kachikathāna awui mirin mashimān khavai saakha shimānra; kha mashivāmla iwui vang eina mirin mikashapa china ringra.

⁴⁰ “Nathumli zang khangasaka china ilila zang ngasaka, kala ili zangkhangasaka a china ili kashirāta ali zangngasaka.

⁴¹Marān akhali a marānna kajiwui vang zangkhangasaka a china marānwui sāman chi samphangra; khangaronga chili khangaronga mina kajiwui vang zangkhangasaka a china khangarongwui sāman samphangrumra.

⁴² Kachikathāna iwui sākhangatha̱bingwui ngachaili teomeikap kaje akhali iwui sākhangatha̱na kajiwui vang tara̱ khamakui kapkhamāngla mimangakha, ina nathumli kachangkhat kahāngna, kachilikha awui sāman chi mashimānlakmara.”