Read Tangkhul Naga MATTHEW 11 Bible Online

MATTHEW 11 - Tangkhul Naga bible

MATTHEW 11

¹ Jishuna awui sākhangatha̱ tharāda khanili hāngchitheihailaga, ana athumwui keinungbingli tamchithei khavai kala pao hāshok khavai apam chiwui eina zatthuwa.

² Chitharan Johnna phātopli leilakha Khristawui otsak saikora kashā eina awui sākhangatha̱ kaikhali chihovada

³ athumna ali hānga, “Rāki kajipā chi nala jika ithumna khangatei akhali ngaraifarakhala?”

⁴Chieina Jishuna athumli ngahānkai, “Ungulu, kala nathumna shākahai kala theikahai chi Johnli unghānglu:

⁵ mik khangapeobingna kathei samphanga, phei katekbing zatpaihaira, phārrei kakazābing tharhaira, khangakhokbing shāpaihaira, kathebingli ringngasakhaira kala kathai kachāmbingli paokaphā hāshokmihaira.

⁶Ili ningkhamaong makhalei a chi sokhamina.”

⁷Johnwui sākhangatha̱bing zatcham kahai eina Jishuna yarui chili Johnwui maramli matui, “Nathumna lamhāngli khavā chi khi yangkhuikida khavākhala? Titina phanung phankhavā chilā?

⁸Chi maningakha khi yangkhui khavai khavākhala? Khamanaka kachon khangavaia mili yangkhavailā? Chikathā khangavaia athum chi awungawui shimli pama.

⁹ Chithākha khiwui vang khavākhala? Marānli yangkhui khavailā? Mha, marānlina, kha ina hāngga, marānli mataikhameiana.

¹⁰ Hithada kapihaikasa chi awui ponglina: ‘Yanglu, ina iwui paome nali rimeida chihora, ana nawui shongfa rida ngarānmira.

¹¹Ina nathumli kachangkhat kahāngna, sha̱naona kapharāwui ngachaili John Ra̱hikmeli reikhamei khipākha mashoklakrangli; chithālala kazing wungramli teomeikap kaje china ali reimei.

¹² John Ra̱hikmewui thot eina thuida aja rāshungda kazing wungram hi rotmarātlak eina rāshuma kala rotkhamarātwui mibingna pangshap eina yuikhui khavai sai.

¹³Kaja Johnwui atam eina tangda marānbing saikora kala ainna wungramwui pongli marānhairasai.

¹⁴ Nathumna chi khuisangngaiakha a hi rāra da phongmi kahai Elijah china.

¹⁵ Shākhui khavai khanā kakā a china shākhuiranu!”

¹⁶ “Kha mithot hili ina khi eina chānjamsikhala? Hiya naoshinaobingna leihngapha̱li pamlaga athumwui ngasotnaobingli ngavao khangarok kathana.

¹⁷‘Ithumna nathumwui vang sipa̱ khongmilala; nathumna pheichak machakmana, ithumna thishamlaa sālala; nathumna machapmana.’

¹⁸Kaja Johnna maphāshak maphazāmana, kala athumna ‘Ali kameo zanga’ ji;

¹⁹miwui Naomayarana phāshak-phazai, kala athumna, ‘Yanglu, a morkahaka, khamalipa kala khāshinā khalokabing eina morei kaphungbingwui ngasotnaona’ da matui. Chithālala thangmei chi chiwui otsak eina theikhuiya.”

²⁰ Chiwui thili Jishuna matakhak kahai ot tarākha sākahai keinungbing china moreiwui eina ning mangateila ningmaongtong kahaiwui vang ana saklak eina kahara;

²¹“Chorazin, nali ringkashi ngasāranu! Bethsaida, nali ringkashi ngasāranu! Nathumwui lungli hakkhamahā ot sākahai chi Tyre eina Sidonli sāsāsi kaje athumna borāshi ngavailaga hotla teida achā ningngateihairara.

²²Kha ina nathumli kahāngna, bichar sāthanghon Varena Tyre eina Sidonli kasāliva nathumli sakmeida bichar sāra.

²³Kala He Capernaum, nali kazing kāzokta masot mimaraola? Naliva kazeiram tāshungda ngakhuntāra. Kaja nali hakkhamahā ot sāmi kahai chi Sodomli sāsāsi kaje keinung chi aja rāshungda leisāra.

²⁴ Kha ina nathumli kahāngna, Sodomli bichar kasāliva nathumli sakmeida bichar sāra.”

²⁵ Atam chili Jishuna phongshoka, “Ina nali ningshili Avā, kazing eina ngaleiwui Proho, khiwui vangkhala kaja nana otbing hi thangkhamei kala katheiabingwui eina thummihailaga angangnaobingli chitheimi,

²⁶mha, Avā, chikatha chi nawui lukhamashanwui kaphaningna.

²⁷ “Ishāvāna ili ot saikora horsangmihaira. Avā maningla Anaomayarali khipānakha matheimana, kala anaomayarana kala ana theingasakngaida kapangkakhuiabing maningla khipānakha Avāli matheimana.

²⁸“Iwuili rālu, kachota kala otphun kharit kaphungbing saikora; ina nathumli ngasāmkhui ngasakra.

²⁹ Iwui kashai hieina phunglu kala iwui eina tamkhuilu; kaja iya malungkhanima, wuklung tākui kahaiana, kala nathumna ngasāmkakhui samphangra.

³⁰Kaja iwui kashaiva phungpailaka kala iwui otphun ngavenglaka.”