Read Tangkhul Naga MATTHEW 12 Bible Online

MATTHEW 12 - Tangkhul Naga bible

MATTHEW 12

¹ Jishuna Sabbaththang lui akha akāna; awui sākhangatha̱bing thaihaoda athumna māmazan mazokkhuilaga shaiya.

²Phariseebingna chi theihaoda Jishuli hānga, “Yanglu, nawui sākhangatha̱bingna Sabbaththang masakhangayi ot sāda lei.”

³ Ana athumli ngahānkai, “David eina ali ngasokazatbingna thaikahai tharan khi sākhala kaji nathum mapāyangmalā:

⁴ana kathada Varewui shimli zanglaga Ngasokhamiwui khamui pāngmon maningla mashaipaiki kaji chi, a eina ali ngasokazatbingna shaihao?

⁵ Lha Sabbath kachida Varewui shimli khalei pāngmonbingna sabbathwui ain sākhaichinglala athum mayonmana da Moseswui ainli hāngkahai chi nathum mapāyangmalā?

⁶ Ina nathumli kahāngna, Varewui shimli reikhameiya kachikatha akha hili leili.

⁷ Kaja ‘Ina pha̱kaphayāle lukhamashan ningchangmei’ kaji hiwui kakhalat nathumna khikhala da theihairasāsi kaje nathumna khayon makhalei mili khayon mamisāmara.

⁸ Khikhalajila miwui Naomayarana Sabbathwui Prohona.”

⁹ Apam chiwui eina zatthuihailaga ana athumwui synagogueli vāzanga.

¹⁰Kala yanglu, apam chili apāng sheikasha̱ mi akha leisai. Jishuli khayon phenkhangai mi kaikhala chili leisai. Chieina athumna ali ngahāna, “Sabbaththang kazāt raikhami hi ainna mayālā?”

¹¹ Ana ngahānkai, “Nathumwui ngachaili kachikathā akhana yao akha leilaga Sabbaththang khorchopli tāzanghaiakha ana chi makhāngshokmimarala?

¹² Mina yaoli kayakha aman sakmeikhala! Chiwui vang eina Sabbaththang kaphā ot kasā hi ainna mayai.”

¹³Chieina Jishuna mipā chili hānga, “Napāng katingshoklu.” Chieina ana apāng katingshoka kala apāng lākhavāk thada phāchaohaowa.

¹⁴ Kha Phariseebingna chiwui eina shokta kathada Jishuli sāshimānhaosikhala da ngasana.

¹⁵ Khangarān kasā chi theilaga Jishuna apam chiwui eina thuihaowa. Kala mi kachungkhana athi shurvai kala athumwui kazāt saikora raimi,

¹⁶kala awui pongli mi kateibingli mahānglakalu da athumli ningmi.

¹⁷Hi Isaiah marānna hānghaikasā chi ungshung khavaina:

¹⁸ “Yanglu, ina kapangkhui kahaia rao, iwui khaluma kala ina ningyāngkhaunga. Ina ali iwui Manglā sangmira, kala ana Gentilebingli mashun bichar vaomalānmira.

¹⁹Ana mangayātzatmara lah mavaozatmara, kala chānreili awui akhon khipānakha mashāmara;

²⁰teknanai kahai titila ana masātekmara, mitnanai kahai meiwonla masāshimitmara, mashun china mayuiranglakha eina tangda;

²¹kala Gentilebingna awui mingli miyur saikorana chihānra.”

²² Chiwui thili kameo zangda mik ngapeo kahai kala khak ngasha̱ kahai mi akhali Jishuwuili khuirai kala ana ali raimi. Chieina mipā chi matuipaihaowa kala theihaowa.

²³Kala mi saikora china matakhakhaoda “Hi Davidwui naomayara chilā?” da ngazek ngaroka.

²⁴ Kha Phariseebingna chi kashā eina hānga, “Hiya kameobingwui akhavā Beelzebulwui pangshap eina ana kashamkashokna.”

²⁵Jishuna athumwui kaphaning chi theihaoda athumli hānga, “Khalatta ngayarkazam kahai ngalei kachiva̱ shimānhaora kala keinung nilala, shimkhur nilala khalatta ngayarkazamhaiakha manganingrarmara.

²⁶Satanna Satanli kashamshokakha akhalatta ngayar kahaina. Chithākha kathada awui wungram chi leisārakhala?

²⁷Ina Beelzebulwui pangshap eina kameobing kashamkashokna jiakha nathumnwui mibingna khipāwui pangshap eina kashamshokkhala? Chithākha athumna nathumwui bichar kasaa ngasāhaora.

²⁸Kha Varewui Manglā eina ina kameobingli kashamkashokna jiakha Varewui wungram chi nathumwuitungli rāhaira.

²⁹“Maningakha kathada mi akhana kapanga mi akhawui shimli azanglaga pheipāng makhalaphaila awui thongthāng ngaponpairakhala? Khalap kahaiwui thili ngaponpaiya.

³⁰ “Ili makazanga mi chiya ili makhamayāna kala ili ngasoda makakazipa a chi sākakathānana.

³¹ Chiwui vang eina ina nathumli kahāngna, morei kala kachipat tui khamatui kachiva̱wui vang mikumoli pheomira; kha Manglāli kachipata chili mapheomimara.

³²Kala iwui Naomayarali makhamayā tui khamatuia chilila pheomira; kha Manglāli Katharali makhamayā tui khamatuia chili thot hilila kala rākharā thotlila mapheomimara.

³³ “Arong mathā ngasaklaga athei mathā ngasaklu; lah arong zakshi ngasaklaga athei zakshi ngasaklu; kaja thingrong chi awui athei eina theikhui.

³⁴He phara̱wui naongarābing! nathum maphālaga kathada khamathā tui matuipairakhala? Kaja wuklungli kaphaning chi khamorna matuikashokna.

³⁵Kaphā mina awui khamathā kazip kahai chi eina khamathā shoka kala zakkashi mina awui kazip kahai chi eina zakkashi sāshoka.

³⁶“Ina nathumli kahāngna, bichar sāthanghon mi kachiva̱na ana matuishokphāphā kahai chiwui maram misera;

³⁷kaja nawui matuishok kahai tui chieina nali mashung ngasakra kala china nali yonngasakra.”

³⁸ Chiwui thili ain kathembing eina Phariseebing kaikhana ali hānga. “Ojā, nawui eina ithumna machut akha theingai.”

³⁹Kha ana athumli ngahānkai, “Makaphā kala phokaphā thotna machut phai; kha chi marān Jonahwui machut maningla khangatei machut mamimara.

⁴⁰ Kaja Jonahna ngashun ngayā kathumthang khaihwui wuklungli kapam chithada miwui Naomayarala ngashun ngayā kathumthang ngaleilungli pamra.

⁴¹ Bichar sāthanghon Ninevehwui mibingna mithot hili ngasoda ngakarthuira kala nathumli athumna khayon phenra. Khiwui vangkhala kaja Jonahn pao hākashok eina athumna ning ngateihaowa kala yanglu, Jonahli reikhameia kachikatha akha hili leili.

⁴² Bichar sāthanghon Azingvākwui awungva̱na mithot hili ngasoda ngakarthuira kala chili yonshinamra kaja ana Solomonwui thangkhamei chi nganā khavai okathui akatangwui eina rai, kala yanglu, Solomonli reikhameia kachikatha akha hili leili.

⁴³ “Makathar manglā makathara china mi akhawui eina shokhailaga ngalei kathengli awui ngasām khavai phavai kha pamkhavai akhala masamphangthuwa.

⁴⁴Chieina ana ‘Ina pamkasā shim chili latungura’ da hānga. Ana latkhaung tharan shim chili khipākha maleisāmana kala pha̱mathā kharikhailaga mathāsek eina leisai.

⁴⁵Chi theilaga ali zakshi khamei manglā makathar shini ahokhuida athum shim chili ungpama. Chieina mipā chiwui mirin kharepāle khanaowa hina zakshimeikharhaowa. Makaphā mithot hilila chithada shokra.”

⁴⁶ Jishuna mibingli tamchitheimahunglakha, yanglu, awui ava̱ eina achināngarā ayārli rānganingda ali chān ngahānngaida rāngathinga.

⁴⁷Chieina mi akhana ali hānga, “Yanglu, nava̱ eina nachināngara nali chān hāngkida ayarli ngaraili.”

⁴⁸Kha ana ali ngahānkai. “Khipāna ishava̱ kala khipālongna ichināngarākhala?”

⁴⁹Kala ana awui sākhangatha̱vāk pāng chiza̱vāda hānga, “Hili ishava̱ eina ichināngarā leili.

⁵⁰ Kaja kazingramli khalei iwui Avāwui kaphaning kasaa chi igatona, izarva̱na kala ishava̱na.”