Read Tangkhul Naga MATTHEW 20 Bible Online

MATTHEW 20 - Tangkhul Naga bible

MATTHEW 20

¹ “Kaja kazing wungram chiya shimva̱na awui yāmguili ot sākhavai ngathorthakva̱ ngalangkaphei mi phākazat kathāna.

²Ot kasābing chili thangthangwui ngalangman lupā ava̱va̱ mira da mayā ngarok kahaiwui thili awui drakhā yāmguili chihovai.

³Khaleilaga pung chiko katā eina, keitheilungli khiotkhala masātheimada nganingung eina nganingzatkasā mi kaikhali theida

⁴athumli hānga, ‘Nathumla drakhā yāmguili ot asālu, laga mikhangayi chi ina minaora.’ Chieina athumna vāhaowa.

⁵Pung tharāda khani katā atamlila, kathum katā atamlila chithada vāluishita.

⁶Kala pung phangā maikhali khavā eina mi kaikha nganingzatkasā chi theida hānga, ‘Chāngnārem eina khisāda nganingpamshonlikhala?’

⁷Athumna ngahānkai, ‘Khipānakha mahothuwa.’ Ana athumli, ‘nathumla drakhā yāmguili ot vāsālu’ da hānga.

⁸ “Kazing khaying eina yāmguiwui akhavā china awui kashina chili hānga, ‘Ot kasābing chili hokhuiserlaga rākhanaowa eina haophoklaga rākhare kāshungda athumli athumwui langhai chi mihaolu.’

⁹Chieina pung phangā maikhali ot sākaphokbing china lupā akharip samphanga.

¹⁰Rākharebingli khami tharan, athum chungmeida samphangra da phaningsai kha athumla lupā akharip samphanga.

¹¹Athumna pheisā chi samkaphang eina shimva̱wuitungli matuikazamda

¹²hānga, ‘Rākhanaowa chi pung akhamang ot sai, laga langpongda zinghām sāririli ot kasā ithumli ngaraichā ngasakhaira.’

¹³ Kha ana athum akhali hānga, ‘Itao, ina nathumli khalāng khikha masāmana, lupā akhara da khamayā maningmala?

¹⁴Nawui chi khuilaga ungulu; nali khami thada rākhanaobinglila mira da ina hāngkahaina.

¹⁵ Iwui khalei chi ina sākhangaingai masāpaimara kaji leilā? Lha ina hānkaphāwui vang mikpaikashikhala?’”

¹⁶ Chieina khanaowa china rira kala khare china naora.”

¹⁷ Jishuna Jerusalemli kākhavai zatta leilakha; ana awui sākhangatha̱ tharāda khanili ngateida hokhuilaga, shongfali athumli hānga,

¹⁸“Yanglu, ithum Jerusalemli vaura, kala miwui Naomayarali pāngmon akhokabing eina ain kathembingwui pāngli horsanghaora, kala athumna ali yonshinamda chithithaora.

¹⁹Kala ali mana̱shi khavai, ngaphit khavai kala krushtungli shaoshān khavai Gentilebingwui pāngli horsangmira; kala kakathumathang ali ngakarthuilui ngasakhaora.”

²⁰ Chiwui thili Zebedeewui naomayara khanili ava̱va̱na thānlaga Jishuwui mangāli khuktizangda kachikatha akha sāmi khavai rāpoi.

²¹ Chieina ana sha̱naopāva̱ chili hānga, “Nana khi ningchangkhala?” Sha̱nao china ali ngahānkai, “Nawui wungramli iwui naomayara khani hi akhana nawui yāshong kala akhana nawui uishong pamkhavai kasamilu.”

²² Kha Jishuna ngahānkāda hānga, “Nathumna kapo chi khikhala da nathum matheimana, ina mangki kaji tengkot chi nathum mangshapla?” “Ithum shapa” da athumna ngahānkai.

²³ Ana athumli hānga, “Nathumna iwui tengkot chi mangra, kha iwui yāshong kala uishong pamkhavai mayāmiki kaji chi I maningmana, kha chiya iwui Avāna ngarān kahaiya athumwui vangna.”

²⁴Sākhangatha̱ tharā china chi kashā eina ani chinaonili malungvāthaowa.

²⁵ Kha Jishuna athumli hokhuida hānga, “Gentilebingwui khamungabingna athumwuitungli khayaiya kala athumwui khangam khareibingnala athumwuitungli pangshap lei kaji nathumna thei.

²⁶ Nathumwui ngachailiva chi mathamara; kha nathumwui ngachaili hakki kaje china nathumwui otram ngatha̱me sāphalungra,

²⁷kala nathumwui ngachaili khare sāki kaje china nathum saikorawui raonao sāphalungra,

²⁸ kaja miwui Naomayara eina tangda ali otram ngatha̱mi ngasak khavai kharā maningla ana otram ngatha̱mi khavai kala kachungkhawui vang ngatangman sāda amanglā chigatmi khavai kharāna.”

²⁹ Kala Jishu eina awui sākhangatha̱bingna Jerichowui eina zatkathui eina mi kachungkhana athi shura.

³⁰Kala yanglu, mik khangapeo mi khani shongfapheili pamsāda Jishu rārāli kaji kashā eina, “Davidwui naomayara, inili khalumashanmilu” da vaowa.

³¹Chieina yarui china anili kasainakha pamlu da kharara; kha anina pangmeida “Davidwui naomayara, Proho inili khalumashanmilu,” da vaowa.

³²Jishuna kasha̱nakha nganingda anili hokhuida hānga, “Ili naniwui vang khi samilu jikhala?”

³³Anina ngahānkai, “Amei, iniwui mik rak ngasakmilu.”

³⁴Chieina Jishuna lukhamashan eina aniwui mikli sāza̱ya kala ngalāngda mik kathei samphangda anina athi shurthuihaowa.