Read Tangkhul Naga MATTHEW 22 Bible Online

MATTHEW 22 - Tangkhul Naga bible

MATTHEW 22

¹ Jishuna athumli chānjam akha hāngchitheiluishita

²hānga, “Kazing wungram chi awunga akhana anaomayarawui shakzāt zātkhān akha khamili chānjam sapai,

³ ana awui raobingli shakazāwui zātkhānli rākhavai ngahot kahaibingli hokhavai shivātvai, kha athumna marāngaiki jihaowa.

⁴Ana khangatei raobingli shivātluishitta hānga, ‘Ngahot kahaibing chili hānglu, Yanglu, ina ngazin phazātwui vang ngarānkuphaira, mukvāla asā kakā seinaola taithathaira, kala ot saikora ngarānkuphaira, ngalā shakzātwui zātkhānli rāserlu jilu.’

⁵Kha athumna akaho chili khikha maningmana da akhana awui luili vāhao, khangatei akhana awui otli thuihaowa,

⁶khangatei raobing kaikhali athumna tukkhuilaga zakshilāk eina shaomi kala sāthathaowa.

⁷Awunga china malungvātnahaida awui raimi chihovāda mi shaokathatbing chili sāthathaowa, kala athumwui keinung chi mei eina thottāmihaowa.

⁸Chiwui thili ana awui raobingli hānga, ‘Shakazāwui khangarān kuphaira, kha hokahaibing chi teonāhaira.

⁹Chiwui vang eina nathumna shongfa kachida vālaga samkaphaphang mi kachiva̱li shakazāwui zātkhānli rākhavai aholu.’

¹⁰ Chieina raobing china shongfa kachida vālaga kaphāla kashila samkaphaphang saikorali kazipkhuilaga thānunga, kala ngalā shakazāli kharābing china shim chi puihaowa.

¹¹“Kha awunga china kharābingli vākhayang tharan ngalā shakazāwui sāri makasā mi akha zangsai,

¹² chieina ana ali hānga, ‘Itao, nana shakazāwui sāri masāla kathada hili rāzanghaokhala?’ Kha mipā chi akhon mashokthuwa.

¹³ Chieina awunga china raobingli hānga, ‘Ali pheipāng khalaplaga tangkhamang ayarli horshokhaolu, apam chili mibingna kachapla chapra, ahāla tarira.’

¹⁴Khikhalajila hokakhui kachungkhaya, kha kapang kakhui kateokhamanga.”

¹⁵ Chiwui thili Phariseebing thuihaowa kala Jishuwui tuimatui eina ali kathada tukkhuipairakhala da angazeka.

¹⁶Chiwui thili athumwui sākhangatha̱bing eina Herodwui mibing kaikhali shivātlaga ahāng ngasaka, “Ojā, ithumna thei kaja na khamashungana, kala Varewui shongfa mashunglak eina tamchithei, kala kateina nali khinada khuilikhala kajiwui vang kakhanang maleilakmana, maramva miwui kharei kateoli nana khikha mayangmana.

¹⁷Ithumli nawui kaphaning hāngmilu. Caesarli khāshinā khami hi ainla, lah maningmakhala?

¹⁸Jishuna athumwui makaphā ningphanin chi theihaoda, “Phākakhaningbing, nathumna khisāda ili chāng yangnganao kajikhala?

¹⁹Khājanā kashānwui lupāsā akha ili chitheilu.” Athumna lupā akha khuirāmi.

²⁰Chieina ana athumli ngahāna, “Hili kazang ama̱ kala kapi kahai hi khipāwuikhala?”

²¹ “Caesarwuina” da athumna ngahānkai. Chieina Jishuna athumli hānga, “Chithākha Caesarwui chi Caesarli milu, kala Varewui chi Vareli milu.”

²²Athumna hi kashā eina matakhakhaoda awui eina thuihaowa.

²³ Chithang chi ringkhalui maleimana da kahanga Sadduceebingna Jishuli khangahān akha rāsai,

²⁴ “Ojā, Mosesna hānga, ‘Mi akhana naongarā maleila thihaiakha agatona rameiva̱ chili ngakumlaga ashameiwui vang nao nganaomiphalungki kajina.’

²⁵Ara ithumwuili chinaongarā shini leida hili okthuida leisai. Khararra china ngalā khuilaga thihaowa, kala nao mapharāthuda apreiva̱ chi agatoli haimihaowa.

²⁶Chithada sāda kakhanela, kakathumala kala kashine tāshungda nao mapharāla thiserhaowa.

²⁷Athum saikorawui thili sha̱naopāva̱ chila thihaowa.

²⁸Chithākha ringkhalui tharan sha̱naopāva̱ chi athum shiniwui ngachaili khipāwui preiva̱ ngasārakhala? Kaja athum saikorana ali ngakumsera.”

²⁹Jishuna ngahānkai, “Nathum yonhaira, khikhalajila nathumna Kathara Lairikwui tuila kala Varewui pangshapla matheimana.

³⁰Kaja ringkhalui tharan athum ngalāla makhuimara, fakathuila mafathuiluimara, kha athum kazingramli kazingraobing thāhaora.

³¹Thikahaibingwui ringkhaluiwui pongli Varena khi hānghaikhala kaji nathum mapāmalā?

³² ‘Iva Abrahamwui, Isaacwui kala Jacobwui Varena,’ Ishamei ava kathewui Vare maningmana, kha kharingawui Varena.”

³³ Mi kachungkhana chi shāda awui tamkachithei chili matakhakhaowa.

³⁴ Kha Sadduceebingli Jishuna mangahānkākapai sāmihaowa kaji hi Phariseebingna kashā eina athum ngarumda rai.

³⁵ Kala athumwui ngachaili ain kathema akhana ali chāng yangkida khangahān akha sai,

³⁶“Ojā, ningkhamiwui ngachaili kachipā hakmeikapkhala?”

³⁷ Jishuna ngahānkai, “Nana nawui Proho Vareli nawuklung, kala namanglā kala naning tongtingda leishiphalungra.”

³⁸ Hina mataimeikap kaje khare ningkhamina.

³⁹Kakhane khamataiya ningkhamiva, “Nawui khongnainaobingli na khalatta leikashi thada leishiphalungra.

⁴⁰Ain tui kala marān tui saikora ningkhami khani hiwui lungli leisera.”

⁴¹ Phariseebing kazipta leilakha, Jishuna athumli khangahān akha sai,

⁴²“Nathumna Khrista chi khipāna da phaningkhala? A khipāwui naomaryarakhala?” “A Davidwui naomayarana” da athumna ngahānkai.

⁴³Ana athumli hānga, “Chithākha, khiwui vang Davidli Manglāna kasatmida ali ‘Proho’ hoda

⁴⁴ ‘Prohona iwui Proholi hānga: iwui yāshong pamlu; yangkashebingli nawui pheinai masā ngasakranglakha eina tangda’ da hānghaokhala?

⁴⁵Davidna ali ‘Proho’, hoakha, kathada Davidwui naomayara ngasāpairakhala?”

⁴⁶ Kala mi khipānakha ali ngahankakā akhala mamirarthuwa, kala chithangwui eina thuida mi khipānakhala khangahānla masālengthuwa.