Read Tangkhul Naga MATTHEW 26 Bible Online

MATTHEW 26 - Tangkhul Naga bible

MATTHEW 26

¹ Jishuna tui saikora chi hāngkup kahaiwui thili awui sākhangatha̱bingli hānga,

² “Khanithangwui thili Makānkhami Phanit sāra kaji nathumna thei, kala miwui Naomayarali krushtungli shaothat khavai horsanghaora.”

³Chiwui thili pāngmon akhokabing eina ararbing, Caiaphas kaho pāngmon kharewui dolānli kazipngaruma,

⁴kala Jishuli ngathum sāda tukkhuilaga shaothat khavai khangarān sai.

⁵Kha athumna hānga, “Phanitlungli majisa, kaja mibingwui alungli khonkazār shokhaora.”

⁶ Jishu Bethanyli phārrei kakazā Simonwui shimli leilakha,

⁷Jishuna phazāda khalei tableli sha̱nao akhana aman kasaka thao ngalunghamnao akhali sanglaga Jishuwuili rāda awui kuitungli heirora.

⁸Kha sākhangatha̱bing china chi kathei eina malungvāthaida hānga, “Khisāda aremali shimān khangasakkhala?”

⁹“Thao hi aman kachungkha eina yorkhuilaga kachāmabingli mihaipai!”

¹⁰Kha athumna kahāng chi Jishuna theida athumli hānga, “Khisāda nathumna sha̱naopāva̱ hili sheikhautkhala? Ana ili khamathā ot sāmihaira.

¹¹ Kachāmabingli nathum ngasopamchingfara kha nathum ili mangasopamchingmara.

¹² Ana iwui phasāli thao neokhami hi ili chizanpai khavaiwui khangarān sākhamina.

¹³Kachangkhat ina nathumli kahāngna, okathui apam hupvali paokaphā hi hāshok kachida, ana khi samikhala kaji hi ali phaningkhaung sāda hāngchitheira.”

¹⁴ Chiwui thili tharāda khaniwui ngachaili Judas Iscariot kaho china pāngmon akhokabingwuili vada

¹⁵ hānga, “Ina ali nathumwui pāngli miakha, nathumna ili khi mirakhala?” Athumna lupā thumrā shānshoklaga ali mihaowa.

¹⁶Chithang eina thuilaga ana yansai khavai atam kachā phāhaowa.

¹⁷ Khawok makazanga khamui Phanitwui kharethang sākhangatha̱bingna Jishuli rāngahāna, “Makānkhamiwui phāzat zākhavai nana ithumli kali khangarān sālu jikhala?”

¹⁸ Ana hānga, “Keinungli vāda kachikathā mi akhali ahānglu, ‘Ojā china hānga, iwui atam nganailakhaira; nawui shimli iwui sākhangatha̱bingli ngasoda Makānkhami Phanit chi mayonra.’”

¹⁹ Chieina sākhangatha̱bingna Jishuna athumli hāngkahai chi tāzak eina sai kala Makānkhamiwui zātkhān chi ngarānhaowa.

²⁰ Kazing yingkahai eina ana awui sākhangatha̱ tharāda khani ngasoda phazā khavai pama;

²¹athumna phazāmahunglakha Jishuna hānga, “Kachangkhat eina ina nathumli kahāngna, nathumwui ngachaili mi akhana ili yansaira.”

²²Kala athum wukkhananglakhaoda athum kachiva̱na, “Chi ila, Proho” da ngahāna.

²³Jishuna ngahānkai, “Khongphei akhali awui khamui ili rurshaikhangaruma china ili yansaira.

²⁴ Awui pongli kapihaikasā thada miwui Naomayarava jimara kha miwui Naomayarali yankasaia chiva kalākashi ngasaranu! Mi chiwui vanga marāpharākasāna phāmeikharra.”

²⁵Yorkazā Judasnala “Proho, chi ilā?” da ngahāna. Jishuna ngahānkai, “Chi nana hānghaira.”

²⁶ Athum phazāmahunglakha Jishuna khamui khuida ningkashiwui seihā sāhailaga khamui chi serkhaida athumli mida hānga, “Khuilu, shailu, hi iwui asāna.”

²⁷Chiwui thili ana tengkot akha khuida Vareli ningkashi mihailaga athumli mida hānga, “Nathum saikora hiwui eina manglu;

²⁸ khikhalajila hi tuingashitwui iwui asheena, morei pheomi khavai kachungkhawui vang heishokkhamina.

²⁹Ina nathumli kahāngna, iwui Avāwui wungramli nathumli ngasoda kadhara drakhāra̱ mangrumki kaji zimiksho marāranglakha eina tangda ina drākhārong hiwui mamangluimara.”

³⁰ Kala athumna masotlaa akha sāchanghailaga Olive phungreili vāhaowa.

³¹ Chiwui thili Jishuna athumli hānga, “Arui ngayā nathum saikora imangli horhailaga yāmserhaora, kaja kathara lairikli hithada kapihai, ‘Ina yaokahomali sāthathaora kala yao ashangva̱ chi chaiyānghaora.’

³² Kha I ringshok kahaiwui thili nathumli ina Galileeli rida vāra.”

³³Peterna Jishuli hānga, “Athum yāmserhailala I mayāmlakmara.”

³⁴Jishuna Peterli hānga, “Kachangkhat eina ina nali kahāngna, arui ngayā harvāna makhongranglakha nana ili matheimana da kathum shida hatra.”

³⁵Peterna ngahānkai, “Nali ngasoda shaothatrumra jilala ina chi mahatlakmara.” Kala sākhangatha̱ saikoranala chithada hāngsera.

³⁶ Chiwui thili Jishuna awui sākhangatha̱bingli ngasoda Gethsemane kaho apam chili vai kala Jishuna athumli, “Ina vāda seihā sāda leilakha nathum hili pamsālu” da hānga.

³⁷Ana Peter kala Zebedeewui naomayara khanili thānkhui. A kakhanang sikafana pemhaowa.

³⁸ Kala ana athumli hānga, “I wukakhanangna thiki jiura, hili nathum ningkharikta yangpamsālu.”

³⁹ Ana khavāmeilaga ngaleili ngakhumshām zangda seihā sai, “iwui Avā, sāpaisi kaja kakhanangwui tengkot hi iwui eina khuithuimihaolu! Chithālala iwui kaphaning maningmana kha nawui kaphaning eina vailu.”

⁴⁰Chiwui thili awui sākhangatha̱ kathum chili hanunga kala athum piphup eina leisai. Chieina ana Peterli hānga, “Nathumna ili ngasoda pungkhamāngla mahonpamrarmala?

⁴¹ Ngasharlu, mapihailu, kala nathum kasuili matāzang khavai seihā sālu; manglāva sāngaikachangkhata, kha asāna ngazanhaowa.”

⁴² Latluida, kakhanelila Jishuna seiha vāsālui’ “Avā, ina hi makhamang masāpaimara jilala, nawui kaphaning eina vaimilu.”

⁴³Ana hanungluishit kaji tharan sākhangatha̱bing pida leisai, athum mikla marakrarthuwa.

⁴⁴Jishuna athumli haiphunglaga vāluishita kala kakathumalila ngaraikachā tui chi hānglaga seihā sālui.

⁴⁵ Chiwui thili ana sākhangatha̱bingli hanunglaga athumli hānga, “Nathum aruila pida ngasāmda leifala? Yanglu, miwui Naomayarali morei kaphungbingwui pāngli horsangmiki kaji atam chi rāhaira.

⁴⁶Ngakarthuilu, zatusa, yanglu, ili yansaiki kaji hili rāhaira.”

⁴⁷ Jishuna matuimahungda leilakha tharāda khaniwuili zangkasā Judasli ngasoda mi kachungkha thinghun kala raighai singlaga athumwui pāngmon akhokabing eina hangva̱naobingwui eina rai.

⁴⁸Yansaiki kaje china athumli ingkit akha milaga hānga, “Ina amaya̱ki kaje chi a kho; ali tukkhuilu!”

⁴⁹Judas hengsāda Jishuwuili vai kala, “Ojā, nali chingrihairanu” da hānglaga amaya̱ya.

⁵⁰ Jishuna ali hānga, “Ngasotnao, na khisāda hili leili?” Chieina athumna rāda Jishuli pāng parra kala tukkhuihaowa.

⁵¹Kala yanglu, Jishuli ngasokasā mi akhana awui pāng katingshokta raighai sutkhuilaga pāngmon akhokawui rao akhawui khanā yortāmihaowa.

⁵² Chieina Jishuna ali hānga, “Raighai chi raighaihonli sanghaolu; kaja raighai kasing katonga raighai eina shimānra.

⁵³Ina iwui Avāli poakha ana kazingrao ashang tharāda khanili lāngda hengsāda chihorāshapra da nathum matheimalā?

⁵⁴Kha chithāhaosi kaja kathada Kathara Lairikli kapi kahai hithada shokphalungra kaji chi ungshungpairakhala?”

⁵⁵ Pung chichangli Jishuna yarui chili hānga, “Ili nathumna khaleli tukkakhui thada raighai kala thinghun singda kharālā? Thangkachida khorumshimli ina nathumli ngasopamlaga tamchithei, kha nathumna ili matukkhuimana.

⁵⁶Kha kashok saikora hi marānbingwui Kathara Lairik chi ungshung khavaiwui vangna.” Chiwui thili sākhangatha̱bingna ali chihohaida yāmserhaowa.

⁵⁷ Jishuli tukkakhuiya mibing china ali pāngmon kharei Caiaphaswui shimli khuivai, chili ain kathemabing eina ararbing kazipta leisai.

⁵⁸Peterna pāngmon khareiwui kayāng vāshungda lachāham eina shurvai, ana alungli zanglaga akatang chi yangkhui khavai shantribingli ngasopama.

⁵⁹Pāngmon akhokabing eina hangva̱naobingna Jishuli shaothat khavai makhamashunga shākhi phai,

⁶⁰kha mi tarākhana awuitungli kakapika shākhi kachungkha rāmilala, khuikapai akhala mazangthuwa. Naomeikapta mi khanina nganingkāda

⁶¹ hānga, “Mipā hina hānga, ‘Ina khorumshim chi sākhaishapa kala kathumthanglungli sakāluishitshapa.’”

⁶²Kala pāngmon kharei china ngakarthuida Jishuli hānga, “Nali kaphen hili ngahānkā khavai maleimalā? Mibing hina nawuitungli shākhi khami hi khida?”

⁶³ Kha Jishuna khikha mangahānkāla kasainakha pamhaowa. Chieina pāngmon kharei china ali hāngluishita, “Ina kharinga Vareli mingzaida kahāngna: na Varewui Naomayara, Khrista china jiakha ithumli hānglu.”

⁶⁴ Jishuna ali ngahānkai, “Chi nana hānghaira. Kha kachangkhat eina ina nathum saikorali kahāngna, aruiwui eina thuilaga miwui Naomayarana Sāshapawui yāshong kapam kala muiyātungli tongda kharā nathumna theira!”

⁶⁵ Chichangli pāngmon kharei china awui kachon serkhākta hānga, “Vareli kachipat tuina! Ithumna hili lāngda shākhi khangatei darkar masāluimana. Ana kachipat tui khamatui nathumna shāhaira.

⁶⁶Nathumwui kaphaning khikhala?” Athumna ngahānkai, “A thingayia.”

⁶⁷Chiwui thili athumna amaili machora̱ mashorrorda kashaola shaowa, kala kaikhana kakaphela kapheda

⁶⁸hānga, “Ithumli phongmilu, Khrista! Khipāna nali shaolikhala?”

⁶⁹Peter kayāng chiwui ayarli pamsai. Kala rao sha̱nao akha awuili rāda ali hānga, “Nala Galileepā Jishuli ngasosai?”

⁷⁰Kha Peterna athum saikorawui mangāli mamayāmada hānga, “Na khi kahāngkhala I matheimana.”

⁷¹Kala ana kayāng shokkhavai varandashong khavā tharan raosha̱nao khangatei akhana ali theida chili pamkasā mibing chili hānga, “Ala Nazarethwui Jishuli ngasosai.”

⁷²Latluida Peterna mamayāmada mingzaida “I mipā chili matheimana” da ngahānkai.

⁷³Khaleilaga chili nganingkasābing china Peterli rāda hānga, “Kachangkhat eina nala athumli ngasokasā akhana, nawui tuimatui eina thei.”

⁷⁴Chiwui thili Peterna a khalatta khonshāt pokhuida shākhi sāda hānga, “Ina khamashung tui matui kala mingkazaina! Ina khamashung tui mamatuimana jiakha Varena ili tandi miranu, I mipā chili matheimana.” Chichang chili harvā khonguwa,

⁷⁵ kala Jishuna ali hāngkahai, “Harvāna makhongranglakha nana ili kathumshida hatra” kaji Peterna phaningunga. Chieina ana kayāngli shokta soso chapa.