Read Tangkhul Naga MATTHEW 3 Bible Online

MATTHEW 3 - Tangkhul Naga bible

MATTHEW 3

¹ Atam chitharan John Ra̱hikmena Judeawui lamhāngli pao hāshokrai.

² “Ningngateilu, kaja kazing wungram nganaishunhaira.”

³ John hi Isaiah marānna hānghaikasā; “Kachikathāna lamhāngli vaozata, ‘Prohowui shongfa ngarānlu, awui apong ngatar ngasaklu’” kaji china.

⁴ Johnna uthā eina sākakhui kachon ngavai, sāhuiwui shānneira̱ nei kala khaoh eina khuira̱ awui kashakazāna.

⁵Chitharan Jerusalemli, Judea katongali kala Jordan kongwui kuikhamareili khalei kha̱ saikorawui eina mi tarākha awui ngalemli rai.

⁶Athumna athumwui morei hāngphatta ana athumli Jordan kongli ra̱hikmi.

⁷ Pharisee eina Sadducee kachungkhana ra̱hik khavaiwui vang kharā chi ana kathei tharan athumli hānga, “He phara̱wui naongarābing! Rāki kaji malungkhavātwui eina yāmkhavai nathumli khipāna hāngkhala?

⁸Nathum khalatta ningngateichaohaira kaji otsak eina chitheilu,

⁹ kala nathum khalatta ‘Ithumwui avāva̱ Abraham lei’ da maphaninghaialu; ina nathumli kahāngna kaja ngalungbing hiwui eina Varena Abrahamli nao kachungkha semmishapa.

¹⁰ Aruila thingrongbingwui angayungli ngahā parhaida lei. Chieina athei khamathā makhamathei thingrong kachiva̱ ta̱teklaga meilungli horsanghaora.

¹¹Ning khangateiwui vang ina nathumli tara̱ eina ra̱hikmi, kha iwui thili rārāda khalei A chiya ili reimei, I awui pheihop phungkida matik machāmana. Ana nathumli Manglā Kathara kala mei eina ra̱hikmira.”

¹² Awui pāngli yāmkok lei kala lanpumli khalei mā hurmathākhuida kapanga mā chi chumli kazipkhuira, kha ahikbing chi mashimitkapai meilungli riktāhaora.

¹³ Chiwui thili ali ra̱hikmi ngasakida Jishuna Galileewui eina Jordan kongli Johnwuili rai.

¹⁴Kha Johnna awui ning suitā ngasakida, “Ili nana ra̱hikmitha̱ki kajina, laga nali ra̱hikmi khavai ili rāli?” da hānga.

¹⁵Kha Jishuna ali ngahānkai, “Hithāsāhaoranu! kaja Varena ngarān kahai chi ungshung khavai hi sāngayilaka.” Chieina Johnna mayāhaowa.

¹⁶Jishuli ra̱hikmihailaga tara̱wui eina shokkhaleoda yanglu, kazingram shoda Varewui Manglā chi nasha̱ thada awuitungli tākapa̱ chi ana thei.

¹⁷ Kala yanglu kazingramwui eina akhon akha vaorai, “Hi Iwui khaluma Naomayarana, Ina ali ningyāng unglaka.”